Regional Editor Conference-ah J&K journalist-te nen

Press Information Bureau (PIB) buatsaihin October 17-18 khan Hotel Mount View, Chandigarh-a Regional Editor Conference neih a ni a, Mizoram aṭangin MJA president Pu Vanlalrema Vantawl nen kan tel ve a, a hlawk thlak hle. Thil tam tak ka hriat belh a, nakin zela ka tana ṭangkai tur tawn hriat tam tak ka neih phah a ni.

Conference-ah hian national media-te bakah India ram hmun hrang hrang aṭangin journalist an tel a, state tinah pahnih ṭheuh telin, Jammu & Kashmir aṭang erawh an ram dinhmun anih vang a ni maithei pasarih sawm an ni.

Conference-ah hian J&K journalist rual an lo telve a, hun engemawchen awm ho kan ni bawk a, thil chi hrang hrang kan inzawt tawn a ni. Kan inkawmna hrang hrang aṭangin tun hnai maiah chuan India leh Palistan an indo ka ring lo ve ngawt mai.

J&K journalist-te chuan

Conference ṭan hma zanin Haryana Chief Minister Manohar Lal Khattar chuan a bangla-ah dinner min buatsaih sak a, tunlai mipui ngaihven Jammu & Kashmir-a journalist-te bulah U Marema nen ṭhut hmun kan rem chat a, a bengvar thlak hle.

Dinner-ah kan lo inkawm nel hman avangin conference chhungin kan inkawm zui a, mi ngaihven rawn rama cheng an ni bawk a, zawhna ka zawt hnem hle a, ning hmel pu miah loin min chhang zel a ni.

National media hrang hrangin India leh Pakistan boruak an ziak te, Jammu & Kashmir boruak an ziahte chu J&K journalist ho chuan an pawm hauh lo. Media hrang hranga a lan dan angin boruak a ralṭi lo niin an sawi a, national media ho chu tunlai ṭawng takin 'Over' an ti hle.

J&K journalist hmeichhia kum 50 bawr vel chu tunlai hian J&K boruak dinhmun a hlauhawm em tih ka zawt a, "J&K hi ram ralmuang tak a ni, ramri hmun ṭhenkhat tih loh chu," a ti. Ramri depa an journalist-te
ṭawngkam aṭang chuan tun dinhmunah chuan India leh Pakistan hi an indo maiin ka ring lo.

Surgical strike chungchang ka zawhna erawh an chhang duh lo a, "A thlen tak tak leh tak tak loh sawi turin document engmah kan nei loh avangin kan chhang thei lo," an ti.

Ka sawi theihnghilh ṭep chu Haryana Chief Minister hian present min pe a, chung zinga ka rilru hneh deuh mai chu an ram tana ruahmanna hrang hrang amah ngeiin a ziak a tel a, ka ngaihsan phah hle.

Home Minister-in a hawng

Tunlaia India ram puma sawi hlawh ber chu India leh Pakistan inkar boruak a ni awm e. Hetiang boruak karah hian Union Home Minister Rajnath Singh chu conference hawng tura tih a ni si, a hma zan aṭangin kan thlenna leh conference neihna ni nghal Hotel Mount View chu police ho hian an hual tua tua a ni ber mai.

Uisa thiam rual te, bomb a awm leh awm loh endiknate leh metal detector-te nen police ho an tei suau suau mai chu ngaih a ti ṭha lo lek lek zawk a lawm le! Zing dar 9 vel aṭang chuan kan hotel chu police-in an hual khat vek a ni ber mai, Union Home Minister meuh lokal tur a ni bawk a, media lam pawh kan khat hmur mai.

Home Minister leh Bru

Hun ṭha ka neih bawh pelh ka hlau a, Rajnath Singh zawhna zawh ve ngei tumin ka rilru ka buatsaih ve nasa hle. Zawhna zawh loh hlauin U Marema nen hma takah conference hall lutin, tlar hma ber a lo awl tawh loh avangin a hma ber dawttuah kan ṭhu nghal chat a, darkar chanve chuang a duh ang zawng zawng a sawi hnuah zawhna hun siam a ni ta...

Journalist 100 chuang kalkhawm kan ni a, Home Minister hian hun a nei rei si lo. Tunlai boruak a ni bawk a, India leh Pakistan chungchang an zawt sap sap mai le, min ko lo mah se, ban phar ka ban san duh bik lo. India leh Pakistan boruak lam zawh ka tum ve lo, a chhan chu duh zat zat chhiar tur media dangah a awm dawn tih ka chiang.

Zawhna zawt turin min rawn ko ve ta hlauh mai le, Pakistan leh India boruak lam hlir an zawh laiin 'November thla tira Tripura refugee camp-a Bru awmte hruaikkir tum hlawh chham ta se, ṭum dangah hruakir tum a ni dawn leh dawn loh' kan zawt thut chu a hrilh hai ve hlein ka hria.

Ka zawhna chu Rajnath Singh chuan a chhang ta, Bru repatriation atana theihtawpa an inbuatsaih avangin a hlawhtlin ngei dawn thu a sawi a 'I'm confident' tiin a thusawi a khar. Union Home Minister meuhin a hlawhtlin ngei tur thu a sawi a, kei chuan ring chiah lo mah ila, a hun lo thleng phawt mai teh se.

Hindi thiam loh a pawi

Road Transport & Highways and Shipping Minister Nitin Gadakari-in conference ni hnihnaah thu a rawn sawi a, opposition leh ruling party-te thu in chuh ṭhin chungchang ka lo zawt a, mahse Hindi ka thiam loh em avangin duh angin a thusawi ka chiang thei ta lo a, pawi ka ti hle.

National Highway atana contractor tur thlanaah state sorkar a inrawlh theih leh theih lo ka zawhna chu Nitin Gadakari chu Hindi-in min chhang a ni. Ka duh anga ka hriatthiam loh avangin sap ṭawnga ziakin ka pe leh a, mahse Hindi thoin min chhang a, lu a hai mup mai. Ka hriat theih chinah chuan langtlang takin e-online hmana tender an chhuah avangin, tumah an inrawlh theih loh thu a sawi kha a ni.

Minute 3 vel min chhang a, ka hriat chin a tlem hle. India rama kan awm reng hrih hmel si a, chuvangin Hindi lama hmasawn zel a ngai tih hi min ka rilruah a awm phah.

Mah se, inti ṭal teh ang Rajnath Singh pawh khan Hindi-in thu a sawi a, mahse English-a zawhna chu English vekin a chhang mai. Gadakari erawh chuan English-in min chhang ve ta lo a, mahse Hindi lo thiam deuh ila chuan harsatna awm lo tur.

Mizoram VIP te ka fak

Conference ṭan hun tura tih zing dar 10:30 nimah se, Rajnath Singh a lokal tlai avangin 11 pelhah ṭan a ni chauh. Ka bulah hian Jalandar (Punjab) a journalist a ṭhu a, ani chuan darkar 1 vel chuan a tlai hrim hrim ang, "Kan ramah phei chuan dar 11 ṭan kan duh chuan VIP te an tlai dawn tih mipuiin an hriat sa avangin dar 10 programme tur angin an ti tawp ṭhin," a ti.

Minister dang an rawn kal pawhin, ṭan hun tura tihah kan ṭan meuh lo. Gadakari hunah pawh lunch ei zawhah ṭan hun a pel tawh nen hmanhawh deuhin ka kal a, minute 5 vel ka ṭhut hnuah 'Kawng lakah a rawn thang mek' an la ti chauh mai!

Ṭum khat Guwahati-a confe-rence-a ka tel ṭum pawhin khuallian tur Assam Chief Minister chu darkar chanve vela ṭan hun a pelh hnu pawhin a la thleng loa, Assam journalist chuan darkar 1 tala tlai tura besei tawp turin min hrilh.

Kan ramah chuan prog-ramme hrang hrangah hian VIP-te tlai avanga ṭan tlai ka hre mang lo. Hun vawn dik kawngah chuan India ramah chuan kan VIP te tluka fak tlak an awm dawn lo a nih hi ka ti.

PIB-te an entawn tlak

Mizote'n kan tlak chham fo chu hawihhawmna a ni awm e. Conference buatsaihtu PIB-te hi an fakawm ka ti tak zet a, hotel kan luh chiah aṭangin hrehawm kan ti hlauin min lo dawngsawng ṭha hle. Khawi hmunah pawh inhmu ila, biak hmasak kan chang lo. An mikhual nih a nuam a, a zawng chhang tlak hle.

Min lo dawnsawn danin a zir em avangin kan inthlahrung loa, neitu rilru ka pu nghal thei. An hnen aṭang hian Mizote'n zirtur an ngah hlein ka hria, function ka telna tam takah chuan an mi sawmte dawngsawngtu mumal pawh an awm ngai loa, anmahni tei teia an tei ka hmu fo. VIP-te lo dawng sawng ṭha hlur a, midang ngaihsak miah lo programme buatsaih ka tawng nual.

An hun leh tha mai bakah sum senga kan programme ngai pawimawhtute chunga hawihawmna lantir lo pawimawhzia PIB staff-te khan min zirtir a ni.

- Malsawmdawngzela Hrahsel