MIZORAM HOUSE-TE

India rama khawpui tlema zawngah Mizoram sorkarin in, Mizoram House kan tih hi a nei ve thliah a, khawpui ṭhenkhatah phei chuan pakhat aia tam kan nei. Hengte hi a nihna takah chuan sorkar mi pawimawh te, sorkar hna ṭul buaipui leh ram tana an feh chhuaha an innghahna tur ni awm tak a ni a, mahse hetiang taka hman hi chu mipuiin kan tlin lova, sorkar pawhin a tlin thei bik lova, a inpawt fán ve nasa ṭhin.

Mizoram House-te hi mi tin maiin tlangnel leh inti neitu takin kan pan chawt hlawm a, a awmna khawpuia Mizo-te phei chuan Zawlbûk ang hialin kan hmang a. Inkhawmna, ruang thlah, intihhlim leh engkimah kan hmang a ni deuh maiin a lang. Mikhual thu-ah pawh sorkar hnathawkte chu a neitu an ni sa deuh a, anni bâkah hian damlo, zirlai leh engmah ni lo, keini angte pawh min lo khawngaih theih chuan kan han riak ve thlarawk zel a, huangtau ngamna chhan tur nei hauh lo pawh kan tlangnel hle a, kan thla pawh a muang ṭhin.

A enkawltute dinhmun hi ngaihtuahpui ta ila, hna hahthlak tak a ni tih a lang. An hna bâk hi kan thawhtir nasa khawp a, zan rei kan sawi lova, min bazarpui tur te, damlo tlawh tur te, ṭumhmun leh rela inhmuah leh inthlah te, kan fate zirna lama admission buaipui leh hostel-a awmte tlawh turte-in kan beisei fo a, Guardian-ah kan hman rawn a, 'Kan fate kha chu chu lo va pe lawk teh' tih vel hi a tam hle a ni àwm e. Zan lamah harh fim tawh mang lo chunga kan chhungte mi lian vauchhera riahna indil luih te pawh a awmin a lang a, pawisa leh thil dang kan kawltir nghek nghek bawk a, kan chhawr dan leh kan beisei ang hi mi tam tak chuan kan tlin lo tih a chiang reng mai. A tirtu tan 'vawi khat chauh' ni mah se, anni tan chuan 'ni tin zan tin' thil a tling thuai a, an sorkar hna leh sorkar pisa dawr tur lo awm reng bawk nen, an hah hle a ni.

Chuti chung chuan Mizoram House-te hi thianghlim leh nuam taka vawng turin kan inbeisei a, min ngaihsak hle turin kan phût deuh bawk a, kan hawi kual a, sawisel tur kan hmu zut mai bawk si. Hengte zinga tam tak phei hi chu anni tih theih pawh a ni lo nghe nghe. Kan House-te hi sorkarin a thuam ṭhat loh chuan, engti zawng mahin a nuam rei thei lo ang tih a chiang a, tunah pawh House ṭhenkhat chhung bungruate chu a rei tawh tih hriat tak, chul tawh tak takte a ni a, hmun ṭhenkhatah chuan khumfa a tam tihte pawh a ri. Kan house-te hi a lun em avang leh a rei ve tawh avang te, mi chi hrang hrang chêt tlat rengna a nih avang te, sorkar sum indaih lohna avanga a thar lei zel a remchan loh avang te, sumdawnna hmun anga amah leh amah intum thei tura a thlen man a san bawk si loh avangte hian, tun aia tihnawm lehzual dan tur a váng a ni mai thei.

Tun aia nuam leh hahdam zawka siam kan duh chuan, a thlen man hi a lêt hnih let thuma tihsan phawt a ṭul a rinawm a, sumdawng rilru pu deuh chunga khauh deuh taka inenkawl leh, fir deuh hleka chêt a ṭul a rinawm. Tualchhunga kan Tourist Lodge-te pawh mimal kuta hlan kan sawi ut ut kha. Sorkar thil nia kan ngaih tawh chuan kan rilru hi a zalen huau mai a, kan huangtau ziah bawk a, mahni eng tehchiam ni lote pawhin tute emaw pawimawhna chhuan tur hi kan dap thuai zel bawk a, hmasawn aiin hnungtawlh lam hi kan àwn deuh zel a ni.

Dan leh inkaihhruaina te hi han siam ve-in, han tár ve ṭhin mah se, a taka bawhzui chu a enkawltute tan hian a awl lo tih a hriat reng mai a, zahawm taka vawn duh mah se, a hmangtute ber huan kan tlin lo miau a ni. Neitu nia inngaih hi a ṭha a, kan inngaih dan erawh chu a dimdawi zawng a nih a
ṭul. A pangchang leh huangtau zawng ngawta neitu nih kan tum chuan, kan inpawt hniam zel dawn tih a hriat reng mai.

- RK Lianzuala