INKHAWMPUI EI LEH IN

Vanglaini chan-chinbu-ah inkhawmpui a ruai ṭheh leh ei leh in chungchang thuziak a lo lang ṭhin a. Ka lo chhiar ve ziah a, a ziaktute rilru ka ngaihtuah a, ṭawmpui ve vena lai ka nei hlawm a. An ngaihdan erawh chu a inang lo hle. A khaikhawmna a awm loh chuan thu inchuh theih tak a nih avangin a kal zel dawn niin a lang. A lehlam ve ve thuziak aṭangin ti hian khaikhawm ila kan pawm tlang thei ang emaw le.

1. Inkhawmpui nikhuaa palaite chaw ei siam hi kan tih
ṭanna a la rei vak lo. Intih hmuh awlsam tak hnam kan nih tilangtu a ni. Inkhawmpui thlengtu kohhranin tih zel kan tum ta.

2. Mizote hi mi-khualte chunga ṭhat chhuah ṭhin, mikhual duhsak tak hnam kan nihna a la nung reng tih lantirtuah ka ngai.

3. Min tipumkhattu ṭha tak chu eikhawm hi a ni ve tlat. Rawng-bawlhona atan pawh a ṭha ang. Thil hautak lo duh ṭhin tura ka ngaih Revd Chuauṭhuama'n a sawi mawi ve tlat hi hriat a nuam hranpa ve reng reng.

4. Sorkar thil tih leh mo lawmna ruai nena tehkhin te kan awm a; hei hi thil thehkhin chi-ah ka ngai lo. Inkhawmpui eikhawm hi chu koh-hran mipuite sum tuak leh thawhkhawma buatsaih a ni a. Koh-hran mipui zingah thil tuihnai, man tam si ei pha lo tam tak thlengtu kohhranah an awm em tih ka rilru in ka inzawt a. Chutiang chu an lo awm hlauh a nih chuan inkhawmpui intuituahah ka ngai a. An awm lem lo a nih erawh chuan changkang deuh taka ei leh in buatsaih a nih pawhin ka pawm tho mai.

5. Tlaia ruai ṭheh avangin mahni in lama haw loa zan inkhawm tlang ta an tam phah em em loin ka hmu.

6. Kei chuan ei leh in siam hi ṭha ka tih laiin kohhran tam tak hi chuan an ti hautak lutuk ka ti. Hautak vak lo, a chi hrang (variety) tam lo, puar ve theihna si hi ngaihtuah ni se a
ṭha mai law'm ni?

- C.L.T. Muana