PU B. DANIELA SUNNA

Hun lo taka Pu B Daniela thihnaah hian Zofate leh YMA khawvel chuan a chan nasa tak zet a. YMA flag pawh a ngul chanve-ah kan zar a ni ta ber mai. Amah ngeiin a ṭawngkama a hman lar em em ṭhin “YMA Baptisma chang, YMA chhum hmin” tih nunpui tlat mi kha a ni a. YMA thil tum te, thuthlung leh thuvawn te nghet taka vuantu hruaitu tling a ni. YMA danpui anga in hrut hraih duh changah te pawh zawldawh chunga khawtlang rawngbawl tih thupui hmang tlat mi a ni.

Vanneihthlak takin Pu B.Daniela kaihhruaina hnuaiah khan kum 1987 aṭanga 1993 kumbul thleng khan CEC-ah ka awm ve a. Khatih chhung zawnga a mizia leh nunphung ka hmuh ve dan chu pa nelawm leh fiamthu duhtak, thu dik ṭan tlat mi huaisen a ni. Thuhnuairawlh thei mi tak ni mahse thu inthup leh puanhnuai thilah chuan inchawchhuah duh nghal mai mi, tlang tak a ni ṭhin. Committee kaihhruai a thiam a, thulai lak leh thu rit leh harsaah te pawh committee boruak ti zangkhai thiam mi niin ka hmu. A hunlai khan CYMA-ah thu khirh leh harsa pui pui khel chang te pawh a awm ṭhin. YMA chanchinbu sum vawn felhlel thu te, CYMA Hall sakna tur grant hman dik loh chungchang te, medical zir tur quota thu a MZP leh sawrkar inkara CYMA-in ban a phar ṭum te khan hruaitu tling leh rilru fim pu tlat mi a nih a lantir a ni.

Ka hriat reng chu kum 1985 Kolasib Conference a zu chungchang agenda kan ngaihtuah ho kha a ni. Khatah khan Political Party pahnih boruak avangin zan rei tak thlengin thutlukna kan siam thei lo a. Boruak rit leh inhnialna nasa tak karah zan riahsana a tuk zing fira boruak thara ngaihtuah chhunzawm leh tura rorel palai min tin pui thiam te kha a fakawm thlawt a ni. Kum 1991/1992 khan CYMA Cultural Sub Committee Chairman chanvo ka chelh a. A kaihhruaina hnuaiah 1992 Chapchar Kut ropui leh hlawhtling tak AR Lammual-ah buatsaih niin khuallian CM Pu Lal Thanhawla te nupa pawh nilengin hun tawp thlengin an tel ve a. CM thurawn angin kha mi aṭang khan Chapchar Kut chu kum tin vawiin thleng hian official function-ah hman zuia a ni ta nghe nghe. CM Running Trophy Cultural Competition te pawh hi Pu Daniela hunalai a bul ṭan te kha a ni.

Ṭum khat chu kum 1990 nge 1991 ka chiang ta lo, Sub-Headquarters YMA conference Lunglei, Rahsi Vengah hmangin, fa anga a enkawl ṭhin zaithiam Tv. Lalramnghinglova te nen kan thawk phei a. Kan lo haw leh lam Pangzawl khaw thlen hma kilometer 5/6 zet chu kan hmaa tlan truck pakhatin pass min pe duh lova. Tlan pelh veleha driver velh tak ka nap laiin a ni chuan “YMA hminga kal kan ni a, zawldawh tur kan ni e” tiin min khap a ni. YMA rawngbawlnaah reng reng hi chuan thil engemaw tal kalsan neia thawh chi a ni tia a sawi ṭhin te kha a hriatreng tlak khawp mai.

A hun lai khan CYMA-in nungcha leh ramngaw humhalh ram pum huap chawimawina sang Indira Priyadarshini Vikshamitra (IPV) Award a zuk dawn
ṭuma a lawmzia te, kum 1993 Vaivakawn Conference a President tharah Pu Vanlalzawma kan thlan tlin ṭuma a lawm thiam em em dan te kha, hruaitu ṭha chuan hruaitu ṭha bawk an chher chhuak ṭhin tih thlen dik tirtu ni ve hian ka hria.

Hruaitu tling leh ropui a nihna chhan pakhat chu thawhpui OB ṭha leh fel bakah CEC sangawizawn pui ṭha tak a neih te kha a ni ve bawk a. A OB puite zinga mi Pu R. Tlanghmingthanga, Pu K Sangṭhuama, Pu F Thanghulh te, sawi vek sen an ni lo, khan an
ṭawiawm ṭha in an nawr kal chak a ni ve bawk. Hun pumpui hmanga YMA rawngbawl tir theitu a nupui Pi Krosthangi hi “Pa ropui phenah nu rinawm an awm
ṭhin” tih fiahna a tling bawk. Thurawn pe a finchhuahtu ṭangkai tak mi pahnih a neih, YMA Office thawktu nghet hmasa ber Pu C.Lalropuia, Sihphir leh H. Zoliana Ramhlun South te hi sawi hmaih phal chi an ni lo.

Aizawl veng lian tak tak zinga YMA Branch ding ve hlei thei lo, YMA huang chhunga hnuk luttu leh Zoram dung leh vanga YMA huang zauhtu, YMA ti parvultu leh pawl rintlak, Sawrkar khalh ngiltu pawl thil tithei leh ropui taka chherchhuaktu Pu B. Daniela hi “Father of the Modern YMA” nihna pe ve ngawt mai ila min hnial kalhtu an tam ka ring lo.

YMA vul zel rawh se.

- Zothankunga Mission Veng