CCE leh lehkha thiam hna hmu lo
Tunlai zirdan thar, Continous and Comprehensive Eva-luation (CCE) hian sawi a hlawh a. Mi tam takin an sawisel a, fail awm lohna school chu a ṭha hle a nih loh vek chuan chhe lailet der tia sawi loh rual a ni lo.
CCE hi tunah kan kui ṭiak chauh a ni a; a chhiat a ṭhat hre tur chuan a rah hun kan nghah a ngai. Zir dan hluiah kha chuan pencil test hmang chauhin zirlaite thiamna teh a ni a, zirtirtute pawhin test/ exam tin zawn ranin an zirtir ṭhin.
Vawiina kan zirlaite hian nupui/ pasal leh fanaute an neih hunah engtin nge an chawm ang a, ei leh bar engtin nge an zawn ang tih hi kan ngaihtuah thlen a ngai ta. Engtin nge vawiina kan zirlaite hi seilian se kan tih tih hi mutmawh hnarmawha kan neih a hun ta.
Kum tin a sang telin mithiam lehkha thiam thar an awm reng mai si a; hna a vang si. Lehkha thiam hna hmu lo hi kum telin an pung a. Harsatna lian zawk a thlen hma ngei hian kawng dang dap a, zir dan kalphung thlak hi chu tihmakmawh a ni. Nu leh pa harsa te tete'n neih thing lung khawngin fate lehkha an zirtir a, an pass ta cheng a, sorkar hna awm leh chuang si lo; lungngaihna hlir tih ang mai an chang zo leh si ṭhin hi a pawi a. He harsatna lian tak sut kian dan tur hi kan zawn a, kan dap tlan a ngai ta a ni.
Vawiina zirna in hrang hranga zirlai-te hmakhua hi i ngaih-tuah ngai em? Heng zinga tlemte chauh hian pen hmangin ei an zawng dawn asin! A tam ber, zaa sawmkua pakua (99%) te hmakhua hi kan thlir thiam a va ṭul em. Sorkar hnathawk lo pawha mahni ke-a ding thei tur mihring chher chhuak tur hian thlir zau a ngai a, ngaihtuah thui a va
ṭul tak em.
"Naupang, chu a kalna awm kawngah chuan zirtir ula, a upat hun pawhin a thlah lovang" (Thuf. 22:6). Kawng hrang hranga naupangte thiamna leh theihna hai chhuak a, ti puitling tur chuan CCE (zir dan thar) hi ṭha thawkhat hle tura ngaih a ni.
Mi ze hrang hrang, zirlai inang lo tak takte hi ‘dut no, hlam leh tawng’ ringawta teh tawh loin gram leh kg te, inch leh feet te a kan teh tel a ngai ta a ni. He zir dan thar hi hrethiam duh loa, ring kan ti khawng lui tlat a, thuthlung hlui huna kan kir leh a nih chuan vawkpui chirhdiaka inbual tura a kal leh ang lek fang kan ni ang.
- T.Sangtluanga (Te-a), Champhai Bethel