Kohhran siam ṭhat a hun

Kan rama Kohhran hian danglamna hret hret chu nei hlawm bawk mahse, inrelbawl dan leh sum hmanral thuah chuan an kalphung inang tlang a tam. A tlangpuia lak chuan thlarau lam leh ringtu nun takna lam kan kalsan hret hret a, sum leh pai leh a behbawm, intuituah leh inrelbawlna lamah kan kal nasa deuh tlangpui.

Kohhran lian ber Pres-byterian hi kan ram Kohhran hlim thla nihna chen nei a ni a, siam ṭhat a ngaihna lai tlem i lo tarlang teh ang. Kum 2014 khan Kohhran Upa 5014 an awm a, Pastor/ Minister 508 an awm a, Kohhran pawh 1270, chhungkua 126955 lai an awm bawk. An la pung zel.

Biak In insak mawi siak lam hi chu dah ṭha ila, Synod hnuaia thawktute an invulh dan kawng khat hi sawi ila, a hlimthla a chiang mai awm e. Kuminah Presbytery pakhatin agenda “Synod hnuaia thawkte an pension hnuah Medical Re-imbursement an bill ṭhin hi tihtawp ni rawh se” tih chu an ngaihtuah a, a tlang lo.

Synod hnuaia thawktute hian an pension hnuah pawh MR an la bill thei cheu a, chu chang ni lovin an chhungte damlo pawhin an bill thei an la ti leh zel a. Chutah chuan a tawp mai lova, an chhungte dang Sorkhara MR bill thei an awm pawhin chumite ai chuan Synod hnuaia thawkte lam behchhanin MR an bill zawk fo; a chhan chu Sorkhar aiin bill a hlawk zawk a ni maithei.

Sorkhar hnathawkte hi chuan an pension hnuin MR an Bill thei tawh lo. He facilities hi chu a lutuk deuh a ni. Synod hnuaiah hian Pastor ngawt pawh 500 chuang an lo nih chuan thawktu zawng zawng chu an ṭhahnem hle ang.

An thawhlai chuan MR lo bill sak hi chu damloh thilah thil nihphung a ni a, tuman an sawisel lo. An pension hnu chuan dawr an kai thei a, an sumdawng thei a, company hnuaiah an thawk thei a, Politics lamah pawh an duh duh an zawm thei a, Pension hlawh an la reng bawk. Sorkhara thawk aia dinhmun ṭhaa in dah hi chu thei tehreng pawh ni ila a mawi lem lo.

Hei hian corruption chi-khat a hring thei a, hna te a lo vang tawh a, Synod hnuaia hna ruak lak thuah induhsakna, hmelhriat neih
ṭhat a pawimawh ta em em mai a. A phaw vuakah corruption te han sawi ve ṭhin mah ila, kan haw ziktluak ngam tak tak lo.

Presbytery leh Synod Palaiah hian Upa leh Pastor deuh hlir an ni tawh a, Synod-ah phei chuan Pastor te hi a sawi huai huai an lo ni tawh a. MLA leh Minister ten anmahni hlawhg tihpuna an rual ṭhup ang maiin Synod-a thawkte pawh an hamṭhatna turah chuan an rual ṭhup ṭhup zel ni berin a lang. Kohhran sum leh sorkhar sum hi a inang chiah lova, Kohhran sum chu mipui thawhkhawm vek a ni a, sorkhar sum chu a ni vek lo deuh.

Chuvangin, Mizorama Kohhran lian ber sum kalpui dan hi ennawn chu a hun tawh hle. Synod hnuaia thawktute MR Bill dan hi mipuiin a chinchhuakin hre kilh kelh sela thawhlawm thawh dan pawh a nghawng thei hial ang. Engatinge miten Kohhran an sawisel ngam tak? Engatinge Kohhran hi miin an hmuh tisa viau tak? Engatinge an zah loh tak viau? Mi thiam loh a ni vek hauh lovang. Kohhrana mawhphurtute hian thiamlohna an nei ve ngei ang.

Politiciante chu lo phuai deuhvin dawt var te pawh lo sawi deuh mahse, leilam thil a ni a, ṭha lo mahse hriatthiam chin a awm. Kohhran erawh chu a takin a thianghlim tur a ni. Sum leh hmuihmer an um lutuk tur a ni lo.

Tunhma deuh phei chuan ni khatah committee ṭum hnih nei se, DA an la double an ti. Phaiah zin dawn se seat hmaa ṭhut ṭheuh an duh avangin motor te pawh an ken tam phah an ti, dik tak maw? Khasi rama Assembly palai turte hian kan in tir tam em em a, bus sawm tela kalin sum zawng a hek hle ang le. Thlarau lam chaw an rawn paw haw le lu bawk si lo.

Mirethei te tein Pathian ram zau nan an ei ai ai an rawn thawh a, Zokhua
aṭang phei chuan an buh thar sawma pakhat an rawn pe, heng hmeithai rethei ve te te te thawhkhawm hian a hotute (Sanhedrin) lamin sum ren vak lova kan lo hmang te hi chu khawvel lama teh chuan ka theih tak emaw tih mai tur a ni ang. Van lam aṭanga teh chuan a zahthlak ngawt ang le. Pathianin ‘Eliza hetah hian enge i tih?’ a ti a nih kha.

Pathian leh Kohhran hming chhal si a Pathian ram thawhlawm kan hman vel dan hi chu a zahpuiawm ṭan deuh lo maw? Siamṭhat ngai niin kan inhre der si lo. Hei hi a ni Kohhran kal sualna bul chu. Kan ramah hian Thlarauva meng fiah rintlak kan va mamawh em. Synod hnuaia thawktute hian mahni hmasialna leh hlemhletna rilru hi pu lo hram sela, Kohhran mipuite thawhlawm hi mahni inhaivur nan leh intuituah nan hmang tlem deuh sela, a lawmawm ngawt ang. Lo ngaihtuah chhunzawm ve teh u.

- R. Thangkanglova