Kei mipa hi ka mittui a tla sawk mai...
Hmanni chu Ṭawngṭai Bethel Camping Centre, Chawnpui lamah Central YMA leh Mizoram Sawrkar hmalaknaa Campers te riahna tur In sak belh vilin ka zuk nileng ve leh a. Ka sawi tum ka sawi hmain kan peng lawk teh ang.
He camping centre hi ruihhlo chi hrang hrang ngaitute leh mi awm ṭha duh/ thei lote dah nan leh enkawl nana a ṭhat ber vang ni bik loin, an in enkawl danah chhuah ruk leh mai mai a harsat vang te, Pathiam rinchhana seat limit siam lova engtik hunlai mai pawha luh theih a nih vang te, camp fee leh ken luh ngai engmah siam a nih loh avangte a lûn em em mai a ni ber. Hei tak hi YMA leh Sawrkar pawhin a ngaihven chhan niin ka hria.
Hemi tlai hian tlai tina an Pathian biak inkhawm neih ṭhin hunah chuan room hrang hrang panga te Lenkhawm zai in an lo intihsiak dawn hi a lo ni a. Ka tui ve na lam a ni tih min lo hriatsak chu niin, endik turin min sawm ta tlat a, ṭang ṭung bik lovin ka thiam ang angin ka han endik sak ta a. Thim hnuah kan haw thei ta chauh a.
Damdawi addict leh ruihtheih thil dang vanga chhungte leh YMA ten an dah deuh hlir 630 chuang an awm a, an han zai mai chuh, a ngaihnawm asin âw... Pathian hian ngaihnawm a ti hian ka ring thlâwt. An mihring puiten misual/ addict/ zu ngawl vei/ rúkrù ti mahse, Sam 96 a, "... Leilung luah zawng zawngte u, Lalpa chawimawiin zai rawh u..." a tih zingah khan an tel vek a ni tihte ka ngaihtuah a, ka rilru an khawih lutuk tlat. Ṭhat chu an duh, ruih tur awm lohna hmunah chuan an himin an hlim mai, an hneh theih loh Setana khawih theiha an awm veleh an tlu leh mai ṭhin; Setana hi a van huat thla la awm tak em, tih te ka ngaihtuah. Setana hnehtu Lal Isua nun neitu an nih vek theih nana ka rilrua ka dilpui mawlh mawlh lai chuan ka mittui a tla thei nia!
Heng kan unaute tana ka tih theih tlemzia te, pek tur nei lo kei ve tehlul ka mit meng leh ka ṭawngkâ aṭang ringawt pawha ka hmangaihna an chhiar thiam si chuan, an sualsan chung pawha an nitin nuna ṭhatna tinrenga vûr ṭhintu kan Pathian hi engtin nge maw an hriat fiah theih ang âw...
Duh taka a siam vek, an nu leh pa leh chhungte fel loh vang te, anmahnin humsual an dai palh vang te, Kristian chhungkua din lo nu leh paten an Chhandamtu an hmel hriattir loh vang te an ni si... Hmelma pa lah hian a ûm hlum hma chu a duh tawk dawn si lo.
Chhiartu duh tàk, tih theih kan nei asin, kan vanneih bik em avanga lawmthu sawi mai lovin, an tan ṭawngṭai rawh le. Áw Lalpa, an thil tihsual ngaidam la, an nunna I laksak hma ngeia Nang chu an Lal leh Chhandamtu, sual hnehsaktu I nihzia an hriat a. A taka nunpuitu an nih theih nan min buatsaih sak hram ang che. Amen.
- R.L.Zomawia