In sak ṭanpuina mi dang pek daih kha!

Hman ni deuh, April thla chawhma lam khan Vanglaini chanchinbuah hian Sakawrdaia pa pakhat, Pu Joseph Lalhlimpuia chuan Pradhan Mantri Awas Yojana–Gramin aṭanga in sak ṭanpuina a dawn chu mi dang tan an hlan thu te, chumi hmang chuan Sakawrdai Joint YMA-in mi dang, khawsak harsa tan in an saksak thute kan hmu a.

Vanglaini chanchinbuin a ziah dan chuan, Pu Joseph Lalhlimpuia te hian PMAY-G aṭangin in sak ṭanpuina an dawng a, mahse, in an nei tawh avangin a pawisa dawn chu in sak mamawh zawkte tan hlan a duh a, hmalaksak turin Joint YMA a ngen a, YMA hnenah a pawisa dawn chu a hlan a ni. Tichuan, Sakawrdai Joint YMA chuan an khuaa khawsak harsa, in saksak tur thlangin, in an saksak a, in saknaah pawh Sakawrdaia YMA branch hrang hrangte an inhnatlan chhawk ṭhin a ni.

Ka lo ngaihtuah zui ve mai mai a. Pu Joseph Lalhlimpuia hian PMAY-G hnuaiah in sak ṭanpuina a dil a ni ngei ang. Ṭanpuina dil lai chuan ṭanpuina sum a mamawh viau a ni thei a, mamawh lutuk lovin a dil ve hrim hrim a ni thei bawk. Mahse, ṭanpuina pawisa an pek hmain Pu Joseph Lalhlimpuia te hian in sakna khawp sum an lo nei leh si ang a, ṭanpuina nghak tawh chuang lovin, in chu an sa ta a ni ngei ang. In an sa tawh tih hre lovin sawrkara thuneitute'n ṭanpui tlakah ngaiin ṭanpuina an pe ta a nih a rinawm bawk.

Pu Joseph Lalhlimpuia ten in an sak tawh si avanga in sak ṭanpuina sawrkar aṭanga an dawn (cheng 1,50,000 ni tak maw?) mi dang, khawsak harsa zawkte'n in an neih ve theihna atana YMA hnena a hlan hi thil lawmawm tak niin a ngaih theih a. Mi dang tan malsawmna a ni chiang mai.

Amaherawhchu, an thil tih dan hi tih dan phung dik erawh a ni theiin kei chuan ka hre lo. Ṭanpuina a dil a, a hmu a, mahse, a mamawh tawh si lo a nih chuan sawrkarah a pe let mai tur a ni. Sawrkara pe let lova sawrkar sum mi dang hnena a hlan chhawng ringawt hi a dik lo. Ka ngaihdanah tak phei chuan, hrem âwm tak a niin ka hria!

In sak ṭanpuina a hmuh sum hmanga in an saksak takte chhungkua hian an mamawh tak zet a ni mai thei a. An mamawh tak zet a nih chuan an dil ve ang a, a ṭul angin khawtlang hruaitu VC te, YMA te pawhin recommend in, hma an lakpui mai tur a ni zawk.

Pu Joseph Lalhlimpuia te ang case hi a dang awm leh ta se, an tih ang hian ti ve ta se, a dik thei lo, kalphung dik a ni lo. Sawrkar lama a buaipuitute an buai phah ang a, an insawifiah a ngaih phah hial mai thei. Chuvangin, kalphung dik a ni lo va, thil tih dan tur a ni lo. Sawrkar aṭanga ṭanpuina kan dawnte hi kan duh ang anga kan hman theih a ni lo va, kan dawn chhan ang ngeiin kan hmang tur a ni. Nakin zela fimkhurna atan ka rawn ziak ve a ni e.

- Zohmingliana