Dan lova thawktu lak leh MZP

Tun hnaiah social media hrang hrangah ZPM sawrkar tawh chhunga NHM hnuaiah advertisement chhuah lova thawktu lak zat RTI hmanga zawhna NHM Mission Director-in a chhanna copy (thlalak) a darh a. ZPM sawrkar chhungin NHM hnuaiah thawktu advertisement chhuah lova lak mi 7 an awm thu tarlan a ni.

Advertisement chhuah lova NHM hnuaia thawk tur lakte chu mipa pathum leh hmeichhia pali an ni a, lab. technicial 3, staff nurse 2 leh data manager leh executive assistant pakhat ve ve an ni. Dan lova lak an nih chhan zawhna chu, "Mipui tawrhna pumpelh turin urgent taka lak an nih avangin..." tia chhan a ni.

MZP-in sawrkar hnathawktu dan lova lak, advertisement takngial pawh chhuah lova lak a nih avanga an dodal hi a ṭha a, mipui nawlpui pawhin kan duh loh a ni.

MNF leh Congress sawrkar kal tawhteah khan NHM, SSA, RMSA leh hmun dangahte thawktu dan lova lak, advertisement pawh chhuah lova lak tam tak an awma sawi a ni ṭhin. Thuneitute–Minister/MLA leh officer te khan an duh duh kha an thun tawp tawp mai niin a lang. SSA-ah phei chuan zaithiam an thun mawlh mawlh mai a nih kha. Khangah khan zirlai pawlte'n an dodal ngai lo niin a lang.

MNF sawrkar liam taah khan advertisement chhuah lovin SEDP hnuaiah emaw ni khan zirtirtu tam tak lak an ni a, advertisement anga ngaih theih ber pawh MNF unit/block tih velin an tihchhuah a ni. Dan lova thil tih a ni. Khatih hun lai khan MZP-in an dodal lo. Kha MNF sawrkar laia MZP President te kha (an hming chu sawi lo mai ila) MZP President an nih loh veleh MNF-ah an lut nghal. SEDP hnuaia zirtirtu lakte kha programme/scheme hnuaia thawk tur an nia, kan ti a ni mai thei, NHM hnuaia thawk tura lakte pawh scheme hnuaia mi tho an ni a, an vaiin sawrkar sum hmanga hlawh pek vek an ni.

Congress sawrkara Pu Rinliana Sailo Health Minister a nih lai khan Health Department-ah NHM chu sawi loh, contract/muster roll-a thawk tur chu sawi loh, a ngheta thawk tur mi eng emaw zat advertisement chhuah lovin, dan lovin lak an ni. A rûka an lak a ni ngei mai a, mahse, a hnuah a lang chhuak leh tho. Media-ah tihchhuah a ni a, Vanglaini-ah ngei pawh chiang taka tihlan a ni. Mahse, MZP emaw, MSU emawin an dodal emaw, sût tur leh bân tur emawa sawrkar an nawr thawm kan hre lo.

MZP hruaitute azir hian Minister leh Department zingah beih bik riau te, beih ve duh miah lohte an awm duh khawp mai a, chutiang chu awm tawh suh se. Tuna MZP hruaitute hi chuan tuna NHM hnuaia mite chauh ni lovin, nakin zelah pawh dan lova sawrkar hnathawk tur lak a awm chuan tih bik nei lovin dodal zel se, NHM hnuaia mi chauh ni lovin, department dang leh hmun danga mite pawh dodal zel se a ṭha hle ang.

ZPM sawrkar pawh fimkhur rawh se. Kan danglam bik dawn an ti a, an danglam bikna leh an ṭhat bikna chu mipuiin kan hmuh a ngai. Sawrkar kal tawhte'n dan lovin sawrkar hnathawk an lo la tawh ṭhin a nih pawhin, an ti ve kher tur tihna a ni lo.

- Lalhlanpuia