Tlawmngaihna (selflessness)
"Aw tlawmngaihna hlu, aw nunna par, kan tlang ram nuamah hian Zamual liam lovin vul reng rawh"
Motor lian, City Bus-a kal hi motor te (taxi etc) a kal ai chuan kal man (fare) a tlawmin a him zawk a, motor neih chu sawi loh, a khalh pawh thiam lo keini ang rual tan chuan City Bus-a chuan hi a nuam ber mai. Theih hram chuan City Bus-ah hian tawt deuh mahse ka chuang ṭhin a, bus chhungah hian thinurna aiin thinlung lawmna thuruk ‘tlawmngaihna’ ka chhar fo mai! A chang chuan traffic jam hi chu a ninawm deuh.
Kan Chief Minister zahawm tak Pu Lal Thanhawla te nen hian trafic jam kara han chuan ho te hi ka chak rum rum
ṭhin. Kan hnam pasalṭha leh mi ropui Taitesena, tlawmngai hmingthang Vanapa leh mi huaisen Chawng-bawla te khan mi hriat loh leh hmuh loha thil ṭha tih duhna thinling (tlawmngaihna) an nun pui a. Miten kan thil ṭha tih hi hria se hotute duhsakna leh chawimawina ka dawng mahna an ti ngai lo; tunlaia tlawmngaihna nen chuan a inmil ta lo deuh em aw?
Ṭhangthar nula leh tlangvalte hi kaihhruai ngai leh zilh ngaite awm bawk mah se nungchang mawi leh tlawmngai tak tak, a bikin City Bus chhungah hian ka tawng ṭhin. "Ka pu
ṭhu rawh, kei chu ka ding mai ang" tiin an ṭhutna (seat) nuam tak min kian ṭhin a, "Mizo nih hi ava nuam tak em" ka ti rilru ṭhin.
Hetiang tlawm-ngaihna leh aia upate zahna thinlung pu hi Mizoram pawna City Bus - Silchar, Guwahati, Bombay leh India ram khawpui dangah hmuh tur a la vang khawp mai.
Thil ho te angin lang mahse, tunlai
ṭhangthar nula leh tlangvalte tlawm-ngaihna hian min ti lawm a, kan nula leh tlangvalte ah hian beiseina (vision) sang tak ka nei tlat a ni.
Nu leh pate thu awih, aia upa te zah thiam zirlai taima leh rinawm bawk si, Pathian ṭih mi ṭhalai fel tak takte hi kan ram nghahfak, nakin lawka Mizoram hmachhuan leh ti mawitu an la ni dawn si a. Mizo-a ka lo piang ve ringawt pawh hi Pathian malsawmna a ni.
Keini val upa leh tuna kan ram leh hnam hruaitute pawh hian kan hnam rohlu ‘tlawmngaihna’ hi i vawng nung zel ang u.
- H.F. Rohlupuia Tualte