Fak leh chawimawi phu Pu Bualhranga

Zofate zingah Pu Bual-hranga aia fak leh chawimawi phu an awm chuang awm lo ve. Pawlitisian entawn tlak sumdawng hlawhtling leh vantlang tana inphal a ni.

Kan Pawlitisian neih tawh leh ni mekte zingah Pu Bualhranga ang hi pakhat mah an la awm lo. Zoram mipui tam zawkin kan ram hruaitu, Minister, MLA leh MDC te hlawh leh enkawlna senso a tam lutuk tiin kan phun luai luai ṭhin. Kan hruaitu hmasate leh ni mek zingah pawh tam lua nia ngaia mipui lamṭang niawm taka sawi ve pawh an awm ṭhin. Mahse a tak taka “em em a” tia lantirtu chu Pu Bualhranga lo tumah an awm lo. Pu Bualhranga chuan “Ram rawngbawltu hlawh leh enkawlna hi tam lutuk a tih avangin a MLA pensawn hlawh hnawlin, a la duh lo a ni. Ram hruaitu ni mekte leh la nih zel tumtute tan entawn tlak a va ni tehlul em!

Pu Buala hian Politik khelmualah chauh thang a chhuah lova, vantlang tan pawh tha a thawh hlawk em em a ni. Synod Newsletter September 2016 kan chhiar chuan, “Synod Hospital Chapel sakna atan Pu Bualhranga leh Pi Thanmawii Dawrpui Veng, Aizawl chuan Rs. 57,74,000 (cheng nuai sawm nga leh pasarih, sing sarih leh sang li) mi pe” tih i hmu ang.

Pu Bualhranga te nupa hi lehkhabu dawr siama eizawng an ni. An eizawnnaah an hlemhle lova, kuttling lovin pawisa an lak sawi tur a awm lo. Pu Bualhranga hi Zofate tan entawntlak, fak phu, chawimawina Nopui dawm ngei tur a ni dawn lawm ni. Ngal fimin dam rawh se.

- MC. Lalrinthanga