MZP-in dan loa thawktu lak an do maw?
MZP ten NHM hnuaia dan lo leh advertisement pawh chhuah lova thawktu an lak MZP-in an dodal thu leh sût tura sawrkar an phût thu ka lo hmu ve a. Hemi chungchanga ka rilrua awm angte Vanglaini June ni 6, 2025, Zirtawpnia chhuakah khan Pu Lalhlanpuia khan a rawn ziak nual mai.
RTI hmanga zawhna chhanna aṭangin ZPM-in sawrkarna an chan hnuah NHM hnuaiah dan lovin, advertisment chhuah lovin hnathawktu mi 7 lak a nih tawh thu kan lo hmu a. Social media-a thlalak kan hmuh aṭang chuan tu zawhna nge kan hre thei lo va. Zawhna 6-naah, "Sawrkar hmasa hun laia doctor lem laknaah khan MNF MLA/Minister an inrawlh em?" tih zawhna a tel avangin MNF worker tu emaw zawhna a nih a rinawm.
Kha RTI zawhna chhanna kha MZP chuan bawhzuiin Mizoram sawrkar chu June ni 10, 2025 hmain ZPM sawrkar hun chhunga NHM hnuaia dan lova thawktu lakte chu bân turin an phût a. MZP hian MNF worker ni awm tak document thehdarh an bawhzui hi a mak ka ti viau!
RTI zawhna NHM Mission Director-in a chhanna lehkha thlalak social media-a kan hmuhah chuan, dan lova NHM hnuaia thawktu mi 7 an lakte kha engtik laia lak nge, engtika appointment pek nge ziah lan a ni lo. A hun kan hriat theih chu 'ZPM sawrkar hnu' tih a ni mai a; tun hnai tea lak an ni thei a, kum 1 chuang liam taa lak an ni thei bawk.
NHM bakah CSS hnuaia thawk zingah dan lova lak an tam lutuk tih hi mipui pawm dan a ni. Chuvang chuan CSS hnuaia contract-a thawkte Mizoram sawrkar hnuaia dah ngheh turah pawh harsatna a awm phaha sawi a ni bawk. Dan lova lak na nâ nâ chu dah ngheh ngawt theih a ni si lo. MNF sawrkar leh Congress sawrkar laia dan lova thawktu lak a tam lutuk kha dan dik taka advertisement chhuah thlap leh interview neih thlapa lak, open competition paltlangte'n tunah hian an tuar mek a ni hi.
ZPM sawrkar hnua NHM hnuaia dan lova thawktu lakte bik chauh bân tura MZP-in sawrkar an phût hi a mak ka tih lai chu a ni. Engvangin nge ZPM sawrkar laia dan lova lakte chauhah hma an lak? NHM emaw, hmun dang emaw pawh ni se, dan lova thawktu lakte zingah lâkna a rei tawh deuh, MNF leh Congress sawrkar laia lakte kha ngati nge an ngaimawh ve loh? A rei deuh tawh avangin a pawi lo bikah an ngai em ni? Lakna la rei lo deuhte chu a pawi bik tihna em ni?
Miin RTI hmanga thil dik lo an hmuh chhuah MZP-in an bawhzui hi a ṭha e, dan lova hna lak duh lova sawrkar an nawr pawh a ṭha reng mai. Ti zel rawh se. Dan dik taka sawrkar hnathawk tur lak an duh tak tak a nih chuan dan lova hna lakna pawh chhui ve se la; mi tih saah chauh innghat lovin, dan lova thawktu lak an awm leh awm loh chhui ve rawh se.
MZP hian ZPM sawrkar laia mite chauh ngaimawh lovin, Congress sawrkar lai leh MNF sawrkar laia dan lova sawrkar hnathawk lak an awm leh awm loh pawh chhui chhuak se, dan lova lak na nâ nâ chu bân turin sawrkar nawr ve rawh se.
- Lalthansanga