AIZAWL KHAWPUI TAN RAWTNA TLEM

Aizawl khawpui tawt lutuk tihziaawm nante, khawpui thianghlim leh felfai a nih theih dan tur ngaihtuahin Sorkar-a kan mi pawimawhten nasa takin an ngaihtuah a, hma an la mek bawk a. Smart City a nih theihna tura Sorkar ruahman dan leh Aizawl Master Plan-te hre ve lem lo mah ila traffic jam tihziaawmna kawng a nih beiseiin rawtna tlem han tarlan ve ka duh a.

1) Road volume tihzauh/ tihlen: Aizawl khawpui chhung kawngte hi tlangram state khawpui dangte aiin a zim lutuk bik awm lo e. Hetih lai hian kan kawngpui neih thui zawng hi a sei lem lo hle. Ngaizel atanga Zemabawk inkar hi 15 Km pawh a tling kher lo mai thei. Kan kawngpui neihte a thui loh laiin motor veivak a tam a, 10 Km bial chhungah motor heti zozai tlanna tur chuan a thui tawk lova, Traffic Police Duty tan vai kian fel duak duak chi a ni bik lo. Chuvangin, kan road volume tihlen theih dan kawng awm chhun nia lang chu Parking place/area a tlem thei ang ber siam bakah metalled road chin-a motor dah phal loh hi a ni mai awm e.

2) Motor Vehicle Rules leh Rules of the Road Regulation khauh taka kenkawh: Heng Rules-te hi hre mah ila kan zawm tlan chuan si loh chuan kan harsatna hi a kiang chuang lo ang. Heng rules-te hi Mizo tlawmngaihna nen a inhmeh em em lai hian 'min lo hrethiam lawk teh' tih hian a chawk buai leh vek thin. Dan kengkawhtute hian dan chu dan a nih angin kengkawh mai se. A bawhchhiate pawh dan anga hrem mai nise. Ngaihdamna changtu chuan tisual leh tawh lo bawk se. Motor hmangtu leh kawngpui hmang thintu ke-a kal mipuite hi heng rules-te hian min phuar ve chiah lo mah se, kan hriat ve atana pawimawh leh tul tam tak a awm a. Kan inzir tlan deuh chu a ngai a ni.

3) Lirthei intlan chhawk: Sorkar ruahmanna angin tun dinhmunah chuan Local Taxi chauh an intlan chhawk a, City Bus-ten an mahni remruatnain an intlan chhawk bawk a. Hei hian Traffic Jam nasa lutuk tiziaawm deuh mah se, beisei ang erawh a ni hauh lo. Motor Number kawpkim leh kawpkim lo hi Tawhtanni atanga Inrinni thleng hian zing dar 7 atanga tlai dar 6 chhung hi intlan chhawk mai nise. Local Taxi leh City Bus te erawhchu Group hnihah then pawkin Sticker A leh B pein intlan chhawk nise.

4) AMC (Control of Parking and Collection of Parking Fees Regulation) 2012 siamṭhat: He rules kan hman lai mek hi nasa taka siam danglam a ngai ang. He rules hian Aizawl khawpui traffic management lam aiin sum lak luh theihna lam hi a awn deuh zawkin a lang. A chunga rawtna pahnih atang ringawt pawh hian siam danglam ngai tur a tam hle thei ang. Regulation 11 leh 14 pawh siam danglam deuh a that a rinawm. Regulation 6 hnuaia Schedule - I ah pawh hian 'NOTE' awm ve ringawt pawh hi Acts and Rules kalphung ni pawhin a lang lova, regulation emaw provision anga ngaih tur nge tih hriatthiam mai a har deuh. Nakum 2017 November hmaa motor garage neih vek tur tih pawh he Note hian a tibuai thei dawnin a lang bawk. Schedule III-a List of Parking Areas pawh hi paih then teuh a ngai ngei ang.

5) The Mizoram State Agricultural Produce Marketing (Development and Reulations) Act 2008 tha taka ken kawh: Aizawl kawpui felfaina tur leh Tarffic management chungchangah hian he rules hi tha taka kenkawh bakah ennawn leh pawh a ṭhat a rinawm a, a bik takin marketing regulations hian mipui nunphung leh motor chet velna kawngah harsatna a siam theih avangin enforcement lamah kan chak deuh a tul ta hle. Kawngpui kam remchang laia kan inzuar mai thin pawh hi a fel tawk lo hle. The Mizoram Agriculture Products (prohibition of movement) (Amendment) order 1999 pawh tha taka kan kenkawh loh chuan kawngpui hmangtute tan harsatna a thlen viau thei bawk.

6) Maxi cab leh night bus-te khawpui hmawr lama sawn: AMC term hmasa-ah khan khawpui pawn lamah sawn chhuah an lo ni tawh a. Mipui tan harsat a thlen nia hriat avangin tihdanglam leh a ni a. Aizawl khawpui chhungah an rawn tlan lut dawn a nih chuan motor number kawpkim leh kawpkim lo tlan ni ang hi zawm ve se. An zawm ve dawn lo a nih chuan chhun lamah chuan khawpui daifema an din mai hi a tha ang.

6) Pick Up (commercial vehicle) service mumal taka ruahman: Aizawl hi kan commercial centre lian ber leh pawi-mawh ber a la nih rih avangin heng bungraw phur nana kan hman-te hi mumal leh fel deuh taka ruahmanna kan siam a pawimawh ta hle mai.

7) AMC Licencing Regulations 2012 kenkawh/hman theih tura siam: He licensing regulations hian dodalna nasa tak a neih avang khan hman a ni ta lo em tih ka chiang ta lova. Aizawl khawpui singsak fel nana rules pawimawh tak a nih tel avangin hman theih tura chinfel thuai a pawimawh hle awm e. Kan kawngpui-an hmun hma zawng zawng deuh thaw hi dawrin a khat deuh vek mai hian harsatna nasa tak min thlen-na chin a awm. Licence fee duhthawhna avang ni lovin, khawpui nunphung a lo fel zawk theih nan a pawimawh a. Smart City kan siam theihna tura pawimawh a nih chuan Dawr awm mek tam tak hi chu license kan pek zui loh ngam pawh a tha hle ang.

8) Public Transport system tih-changtlun: State pawn leh State chhung hmun dang atanga Aizawl-a rawn lut turte pawh motor number kawpkim leh kawpkim lo intlan chhawk hun chhungah hi chuan huam tel vek sela. Passenger phur chi lirthei-te pawh an intlan chhawk dawn avangin public transport system hi changtlung taka kan siam a ngai ngei ang. Private motor neite pawhin an tlan loh niah chuan public transport hi an hman tur leh an innghahna tur a nih dawn avangin mipui rintlak ni tura kan buatsaih a pawimawh ang. Local Taxi hmangtute pawhin Stand atangin hmang ila stand-ah bawk chhuk leh zel bawk ila. Hmun thawl leh remchang tak a nih lem loh chuan duhna hmun hmuna chhuk kan tum thin hian midang tan harsatna a thlen tam a ni.

City Bus-te pawh an timing zawm thei ngei tura ruahmanna tha zawk siam ni se. Mihring thut theihna seat aia tam passenger phurh awih loh ni sela. Stand atanga an chhuah hun a nih chuan seat la khat lo mah se chhuak ngei se. Mipui lam pawh hmanhmawh deuh mah ila, seat a full tawh chuan a dawt leh Bus-ah chuan tum mai ila. Stand-ah chuang tur kan lo tam deuh a nih pawhin kan thlen hmasak dan indawtin lo in tlar mai ta ila. Heti anga ruahmanna fel tak kan neih theih chuan public transport system hi mipui pawhin tangkai takin kan hmang thei ang.

9) Vehicle Road Off: Commertial vehicle-te tan replacement policy kalpui a ni a. A bik takin passenger phur chi zingah pawh Local Taxi hi a tam em em a, motor hlui replace theih a lo nih chuan private vehicle a pung leh sawt dawn tihna pawh a lo ni a. Heti ang ho hi road off tur kan tih si loh chuan State/District dangah kan thawn chhuah tal a tha ang.

10) Lirthei intlan chhawkin a huam loh turte: Lirthei intlan chhawk hian mi zawng zawng huam thei se a duhawm viau laiin ram inrelbawlna leh mipui mamawhna bik avanga lirthei intlan chhawkin a huam ve loh tur siam tel hi a tulna chin a awm ve ang. Heti ang hian han siam chhin ila: Governor, Legislator-te, Commissioners/ Secretaries, Head of Department, Law & order kengkawhtute, Fire & emergency vehicles, Ambulance, Independent & statutory body-a head/chairman/member, Central Govt Offices-a head, leh Press mite chauh hi ni se.

Tumna tak tak, rinawmna leh dikna nena hma kan lak chuan kan tithei ngei ang tih hi a rinawm a. Khawpuiah chuan facility a tha a, a chen man pawh a to a ni tih pawh kan hriat tlan a hun khawp mai. Mizote hi hruaitu tha kan neih chuan thuawih thei tak leh tihnuam tak kan ni a, ruahman tha kan neih chuan kan zawm thei mai zel ang tih hi a rinawm a ni.

- C. Lalchhuanmawia

Chaltlang Lily Veng