BRO Chief Engineer hmalakna

Vanglaini, October 26, 2016 (Nilaini) a chhuakah BRO Project Pushpak CE, Pu KK Razdan-in CM hmaah BRO kawng enkawl chungchanga harsatna an tawhte a sawi fiah thu kan chhiar a. Heng kawng zingah hian Buichali - Lengpui Road hi Aizawl hnaivaia kawng pawimawh ber pawl a ni ngei ang. Sihhmui lama Tlawng Bailey Bridge a chhiat apianga a helna awmchhun a nih bakah, Sihmui kaltlanga Airport Road sial a nih hma zawnga Lengpui Airport kalna awmchhun a ni ṭhin.

Sihhmui Lei siamṭhat a nih hnuah pawh motor lian, Metric Ton 15 aia tam phur tan chuan, he kawng chauh hi khawthlang kal nana kawng awmchhun a la ni fan. Sihhmui Lei a chhiat chhung zawng, motor te leh lian zawng zawng kalna a nih vangin, he kawng hi a rim em em zual a. Sihhmui Lei motor lian kal phal loh a nih hnuah pawh a rim chhun zawm ta zel a ni. Zoram khawthlang tan an chhuahka awmchhun tak meuh a nih vang hian ‘top most priority’ pek loh rual a ni lo. Mahse a maintenance leh thawm ṭhathna hi hlamchhiah a ni hlauh thung si.

Fur nat kum a lo ni bawk si nen, NIT sak mek chak lakna a lo ni bawk nen, motor lian ke 12 nei thlengin, a chhuna zanin an zawh tlut tlut a ni ber. Double road satliah mai ni ta chu, tunah chuan kawng chhuat khuar lo lai hi a awm lo a ni ber. A blacktop chin phei chu Buichali aṭanga Lengpui khaw luh dawn thlengin hmuh tur alawi a awm tawh lo.

Motor te, 4 wheel drive lo tan phei chuan han kalna chi ziazang pawh a ni lo. Mamit District pum tan chuan lungchhiatthlak tak a ni ringawt mai. Bairabi bul Tlawng Lei lah vana rah ang a la ni bawk si, Sihhmui lam Tantia Company Lei dawh tum mek lah chuti bawk; khawvel tawp hmain an dawh zo ang em tih mai tur a ni.

Tun kum fur ṭantirh dawn vel khan BRO, Pu Razdan-a hote chuan Airport thlen hma zero point aṭanga bul ṭanin, black toping an bei mup mup a. He kawnga kal fo ṭhinho chu, lawm sa lohvin kan lawm hman a; V/C ho nena ṭang kawpin an in chhuang khu luih luih nitin mai ṭhin. Mahse Lengpui khaw pelh chiah, Central Bamboo Centre gate an thleng vel tihah an tawp san ta daih mai a. Buichali thleng te chuan, a thui loh tehlul nen, han thawh zawh hram awm tak hi a ni a; V/C ho tak pawh hian engtin nge an ngawihsan daih theih lah hriat ni suh.

A zahve zeta thui, black top thei tawh si, Km 4 emaw vel chauh hmabak awm an han chawlhsan hlauh hi, sum awm loh vang mai mai a ni theiin a rinawm hauh lo. Kan CM zahawm tak hian hetiang hi thil awmdan a ni tih hria se chuan, a chhuahchhal duh ngeiin ka ring. Bialtu MLA Pu John-a pawh hian a bial chhung link road pawimawh tak a nih bakah a huan kawng a ni bawk si a, a ngawi tlat thei hi, pa tuar chhel fe chu a ni phawt mai.

BRO hian kan sorkar hi a palzut a nih hi, tih mai a awl e!

- Rin Sanga, Zarkawt