NUNHLUI NGAIHAWM

Kan thuziak tam zawkah fam chang tate ngaia khawharna natzia kan sawi a, mahse, favang tlaini tla tur mawi em em leh zan boruak thiang kuk ka thlir changa suangtuahna mu hnu tho leh fo ṭhin, sikul naupang kan nih lai hun hi sawi loh atan chuan ka ui ṭhin.

Kar tluanin sikul kan kal a, zirtawpni chawhnu aṭang chuan kan nu leh pa, unaute riahna lo lama riak lut turin kan inbuatsaih a. Tlai dar thum sikul ban dar a lo ri a, hmanhmawh em ema kan tlan haw dawr dawr lai leh thim thut thuta kan nu leh pa, unaute hnathawka an riahna khawhbawk kan thlen lai hunte mitthla-ah a thar uai uai mai.

Zanriah chaw pawh ei puar hman mang lovin chunglai khawhbawka riak ve te thlama han lenkual chu kan thlahlel em em ṭhin. Inrinni tlai a ni a, losul zawng zawng ruala feh haw nih ve te kha kan thlakhlelh ber lai kha a ni ṭhin a, haw kawngah hai favang te lovin inlam pana feh hawng kan in zui thliai thliai lai hunte kha a va ngaihawm em.

Middle sikul leh High sikul kal thlengin chu hun chuan tlangram lo neia eizawngte a chenchilh reng a, nulat tlangval kan han hre chho ve ṭan a, ngaihmelh biak ngam si loh hmangaihna a bul kan ṭan lai hunte kha tun huna han dawnkir leh hian lung tilengtu leh nunhlui ngaih tizualtuah an lo chang zo ta.

Zep thu a cheng lo ve, sikul chawlh karlakah mi ute nen hlothlawh pawh thiam mang hlei lo kha kan han inlawm ve ṭhin a, a chang chuan kan ngaihtuahna zawng zawng luah zotute nen fehna a thuhmun loh changin feh hawn kawnga kan inchhawlṭhuai ṭhin lai hunte hlei hlei kha lung tileng zualtu an lo ni ta.

Nilengin kan nu leh pate puiin feh mah ila zan lama mi ute in-a len leh zan thla eng lawma khawlaia thiam ang tawka Guiter te chi (Ukulele) nen tui taka zaiin “Leng zawng an tam khawvelah hian, mahse nang ang min hnem an awm lo, Nangngaia lunglen ka bang dawn lo, i zunleng ngai hi han dawn la, min tiriang lulsuh tha-ainawni” tiin khawlaia kan zai-kal vawn vawn ṭhin lai te kha tun hunah hian nunhlui ngaihawm, lung tilengtuah an chang zo ta.

Tunlai hun nen ka khaihkhin hian hun leh nun hi a lo va inthlak danglam nasa tawh em. Tunlaiah chuan tlangvalten nula an inchhungah kan rim meuh tawh lova, nulaten kan tlangvalte an rim tawh zawk emaw tih mai tur a ni tawh a, chu lo lehah inchhunga inkawmkhawm tel tel aiin khawlaiah kan nula tlangvalte inkawm hmuh tur an tam tawh zawk a, hei hi nu leh paten kan zirloh a ni thei angem aw! Hawh u i ngaihtuah tlang teh ang u.

- Lawta Khiangte