Lui sa humhalh chungchang
Kan ram luisa, sangha, kaikuang, chakai, chengkawl etc. te humhalha kan ram economy atan pawh a pawimawh thu hi a veia te chuan kan vei nangiang a, kei ve tehlul pawh hian hemi thuah hian article ka ziak ve nasa hle. Kum 6 lai kal ta khan YMA Group zawng zawngah lehkhate ka thawn darh a, chhanna ka dawng nual. Kum 30 chuang kan lo vei tawh chu nimina YMA rorel inkhawm chuan, ‘Lui dunga nungchate humhalh dan a awm theih nan CYMA in sawrkarah thlenin hma la rawh se” a rawn ti ta a. A va lawmawm em!
Tunah hian khaw engemaw-zatin an ram lui tlawh chhan an humhalh thu TV-ah te an rawn puang leh ta a. Rs 10000 chawi leh na taka hrem tur thute pawh an tarlang. Hetia khawmal te tein mahni duh dana kal mai lo hian sorkarin Dan inang tlang kan hlawk tlanna tur a siam tur a ni a. Sawi leh sawi hnu U.T kan nih aṭangin kum 44 a liam ta, tu sorkar mahin lui humhalhna dan mumal leh kaihhruaina an la siam lova, kum 20 lai sorkharna keng tawh Cogress pawhin an siam chuang bik lo.
Tunlaia kan sangha humhalh dan hi a bangbo deuh em ka ti. Man reng reng awih loh tih bur hi chu mipui tan a hlawk nep hle ang.
Hetiangin ti ila: Sangha hi len leh nghakuai chauhvin man ila. Len sin lutuk hman loh tur te ti ila, sangha man tur ten fee emaw royalty emaw te pein khawtlang sum hnarah chantir ve ni se.
Sangha kan humhalha kha mipuiin hlawk nana kan hman ve dan ruahman a ṭha ang. Hetia nghafuan ven khap mai hi ala tawk hauh lova, kumtluana hmalak a ngai a ni. Kan ramah lui lian ṭha tak tak, Ṭiau, Khawchhaktuipui, Tuichang, Tuivawl, Tuirini, Tuirial, Tlawng, Tut, Teirei, Langkaih, Chhimtuipui, Mat, Khawthlang tuipui te chhim leh hmar zawngin a luang thlur sung a. Heng hi luite deuh sangha
ṭha awmnain a fin leh ṭheuh a, hengte hi humhalh ṭha ila chuan phai sangha mana tangka tam tak nitina kan senral hi nasa takin kan hum thei dawn a ni.
Hetia CYMA berin hma a lak tak tak chuan a hlawhtling em em ang. A sorkar lam bawk hi a ni ben harh ngai leh ṭhin chu ni. Khawpui mi ṭhenkhat leh Officer ṭhenkhatte ven an ngai bawk ang. Khaw tin YMA leh VC ten inang tlangin hma la sela, kan ram luisa te hi mipuite hlawk tlan nan i humhalh tak tak teh ang u.
- Rualkhuma Hmar