Hmuh nuam, hmuh nawm!

A biangah thlan tui a luang thla ngiai ngiai a, a sam ṭawnna a siam ṭha niap niap a, a biang a tai tek a, a nui ver ver a. A ke a bilh avangin a bai deuh auh auh mahse inkhelh hun a tawp meuh chuan a telna team zawk an champion tih hriat fahranin, a ke na theihnghilhin a ṭhiante nen inkaihkuah kualin an zuang tawr tawr a. Beisei phak bakin Mizo hmeichhe naupangten football khelh an thiam a, bul ṭan dan ṭha tak niin a lang.

Chutiangin, mipa naupangte pawh inkhelh an thiamin, an kum ang rual 'awmze' nei leh mumal taka an khel thei kha hmuh a nuam a, hmuhnawm a tling. Heng bakah hian thil tam tak kar hmasaa khelh zawh tak 1st Inter District Grassroots Football Tournament for Sub Junior Boys & Girls, Rajiv Gandhi Stadium-ah kan hmu. Mizo naupangte hnena football khelh thiamna Petu hi fakin awm rawh se!

Mizoram hmun hrang hrang aṭangin mipa naupang leh hmeichhe naupang 200 chuang zet Rajiv Gandhi Stadium, Aizawlah an fuankhawm a. Pawn lam
aṭangin an inkhel entu an nei tam lem lo. Anmahniho kha an inkhel mawp mawp a, a khel lo zawng kha a entu an ni leh nghal mai. State Level Tournament khelh a nih hma hian October thla tir khan District Level Tournament an khel tawh a. Chuta ṭang chuan District aiawh turte thlangin hun eng nge maw chen State Level a khel tur hian an lo inbuatsaih tawh a. Kumin June thla a bul ṭan chauh kha thla 5 emaw awrh training an nei hman a, hmasawna hmuh tur a tam hle.

Grassroots Football Development Programme hnuaiah a bul tanna atan District paruk ah football training center 60, Aizawl District - 16, Lunglei Dsitrict - 14, Champhai District - 11, Serchhip District - 7, Kolasib Dsitrict - 7, Mamit District - 5 ah te din a ni a. Mizo naupang 3000 ten Training an nei mek a. Center pakhatah naupang 50 zel awmin, Center tin hi Trainer pakhat leh Asst. Trainer pakhat ten an enkawl a. District 6 a Grassroots Football Training Centre 60 te chuan june ni 14, 2016 khan Training an nei tan. Grassroots Football Development Programme hawnna June ni 23, 2016 khan Chief Minister Pu Lal Thanhawla hoin Lammualah neih a lo ni tawh a. Grassroots Football Development Programme lian ber SSA - Tata Trust leh Mizoram Football Association te ṭang tlangin an din leh enkawl hnuaiah 1st Inter District Grassroots Football Tournament For Sub Junior Boys & Gilrs - 2016 chu ni 25 - 28 October chhung khan khelh zawh a ni ta.

He Grassroots Football Development Project-ah hian Football piah lamah Mizo naupangten rilru sang tak leh inthunun theihna te, kan hnam rohlu - tlawmngaihna te, rinawmna te, huaisenna leh ram leh hnam hmangaihna te naupangte rilrua tuh ngheh a, insawizawina dik leh mumal tak hmanga naupangte rilru leh taksa thantir te, naupangte'n ngaihsan tur dik ngaisang a, chin dan (habit) ṭha an ṭhan len pui nana kaihhruai te, naupangte nihna tak leh talent haichhuah saka, kaihhruaina mumal tak hmanga an talent tihpunsak te, an lehkha zirna kawnga tihchangkan te bakah football chu an lehkha zirna kawnga phurna siamsaktu leh ṭanpuitu a nih theihna tura ruahmanna siam a ni.

Mizorama football thuneitu leh enkawltu Mizoram Football Association leh SSA - Tata Trust te chuan Grasroots Football tihhmasawnna tur atan inremna thuthlung (MoU) an ziah angin hmeichhe football promote na atana training centre tinah hmeichhe tana seat 5 hauh sak nise tih chu, a hlawhtlinna hmuh theih nghal chu District paruk aṭangin hmeichhe team pangngai tak an rawn tir thei kha a ni. Naupang zingah kum dik lo leh birth certificate lem hmang an awm ṭhin tih bona kawngah pawh hmasawnna hmuh tur a awm a. Hei ringawt pawh hi ring taka kut benna tham a tling.

1st Inter District Grassroots Football Tournament 2016 a hawnna inkhawmah India rama Footballer lar leh Grassroots Football Development Programme a Ambassador ni bawk Mizo tlangval Jeje Lalpekhlu'an fuihna thuchah (voice message) ṭha tak naupangten an ngaithla a. Mizo zinga AFC Coaching A license nei hmasa ber leh FIFA in Mizoram enkawl tura Technical Director atana a rawn dah Danny Lalduhawma kaihhruaina hnuaiah oath taking an lak te kha an naupang tan a hlu a. An inkhel kaihhruaina leh he tournament hlawhtlinna atana Mizoram Football Association te inpekna a fakawmin, SSA - Tata Trusts te nen an thawhhona a ṭha hle.

Naupangten ṭum danga an inkhelhah chuan warm up lak hnuah, inkhel an
ṭan nghal deuh tawp a, tun ṭumah erawh inkhel tura an luh dawnin rimawi play in, inkhel turin field chhungah an inzui lut dam dam a, a tir lamah team inchibai dan hre lem lo te an hawi buai deuh nachungin, a tawp lamah chuan an zei ta fu. Match official-ah pawh hmeichhe inkhelhah hmeichhe referee leh asst. referee ten an inkhel an conduct te kha an tan chuan thil thar hriatreng tlak a ni ang a. Player tam zawk grass a la khel ngai lo ten grass-ah ngei an inkhel thei te kha an titi tui leh phurna petu a nih a rinawm. An inkhelhna field sirah perimetre board a in hung ve
ṭhap a, chumi hung chhunga inkhelh te chu an tan chuan a nuam dangdai an tih thu an sawi nak nak a. Hmun hrang hrang aṭanga kalkhawm te chu hmun khatah thleng khawmin, inṭhian ṭhatna ṭha tak a hrin chhuah ngei a beiseiawm.

Zan lamah naupang pualin programme hman ṭhin a ni a, zaithiam TBC Zaithan-puia, Joseph Zaihmingthanga, BoG ten zaiin zan lamah an awm tlei a, fuihna thu tak tak an sawi bawk a. Mizo zinga Mt. Everest lawn chhuak hmasa ber David Zohmangaiha'n Mt. Everest a lawn dan chanchin a sawi laia ngaihnawm an ti hmel te kha a hmuhnawm a, fuihna thu
ṭha tak a sawi te kha naupangten manhla an tiin an kumkhaw sawi a tling ngei ang.

- Hmingsanga