Ukil rawih man a sang em?

Amah Pu Thang-kanglova’n ukil rawn pantute hian an thiamzia, an dikzia an khingpuite aia an fel zawk thu hlir an rawn sawi a, ukil pantute hi mi fel hlir zuk nia a tih ang deuhvin court-a thiamthu sawi tur nei inti ten an thiam thu sawi pui turin ukil an ruai ṭhin a ni ber.

Ukil rawih man hi bithliah a awm lova, a ruaitute nena an inkar thu a ni. Pu Kanglova’n, sing kan sawi thuai mai a tih hi chu a dik mai bakah a sawi tlem mah zawk a ni.

Delhi lama ukil ṭhen-khat vawikhat din chauhva an in chhiar dan aṭang hian kan ngaihruat thiam mai awm e:

Khawvela awm chhungin thubuai hlabuaiah kan fihlim vek thei lova, eng vang pawhin miin thubuai a neiha courta kal ngai khawp a nih chuan a rilru a hah lo thei lo. Engto tham fe fe thubuai neih theih a ni. Ukilte hian mi rilru hah leh mangang nasa takin an chhawk thei a. Mi tam tak harsatna hi ukilten an sutkian sak
ṭhin a, chu hna chu an la thawk zel dawn a ni. Mi ṭhenkhatin ukilho dawt leh hnialhrat avanga ei hmu ang dawn dawna an sawi ṭhin hi chu a dik famkim chiah lo.

Doctor zawng zawngin damlo an tidam thei bik lo ang hian ukil ruaitu zawng zawngte hian thiam an chang vek bik lo. Ukil rawih avanga chan ṭha zawk chang ta erawh chu an
ṭhahnem khawp ang. Miin a thiamthu duh tawka ukil a han hrilh a fee an pek bawk chuan court-a thiam thu sawi hma hauhvin a eng a thawl hawk ṭhin.

Thil pawimawh tak chu thubuai chin fel theih loh kan neih chuan a hma thei ang bera ukil rawn a
ṭha ber. Thiam chang tum ngei ngei pawh a rei lutuk chuan a ṭhen chu court-in a ngaihtuah thei tawk ṭhin lova, Limitation Act-in a lo bar tawh ṭhin. Chuvangin, pawisa inpek thuah te, in hmun lo ram inchuh thuah te, rokhawm thilah te, miin emaw sorkhar ngei pawhin dik lo taka kan ram min tih buai chuan a rang lama ukil rawn a ṭha ber. Pu KL-a te anga lunglen chang changa Reiek tlang au chhuahpui leh hlut ṭhin ang hi a ni lo.

Pu KLa sawi takah chuan thawk-khat lai khan a nu kum 90 pel fe tawh a thi hlauh mai a. Amah KLa zawk emaw ti an awm nual hman a, kei pawh min rawn phone hman hlawm. A nu a nia kan han tih chuan an thaw huai hlawm, a tuarpui awm khawp mai.

Pu KLa leh a Pu R. Thang-kanglova te chuan Pastor leh upaten an hna an hneh lova, sual an veng hneh lova ukilin ei an hmuh phah zu ti zawk hlauhva. Dan leh hrai lamah hma kan sawn nasa a, tunah chuan Mizoram Bar-ah mi 330 chuang an awm. Mizo MJS lah sawm tel kan lo nei ve ta a, High Court Judge pawh Mizo hnahthlak 2 kan nei ve ta; an zahpuiawm lo viau.

Ukilte hi doctor leh sum-dawngte anga insawimawi awih a ni lova, min ruai tura mi va zai ruai tur lah an ni hek lo. Tin, Judge-te hi tlawn leh tham chi an ni lova, thuneihna hmanga ṭan lamte tichak tura nawr chi pawh an ni lo. Tun hma deuhva, milianten an lainate kha kha lo man rawh u, kha kha lo chhuah rawh u ti an awm ṭhin anga sawi kha chu a reh ta viau mai. Dan tlawh chhana thutlukna siam tur a ni tih kan hriat a ṭha khawp mai.

Tunlai hian Sorkarin thiltisuala puhte din saktu atana ruat Defence Counsel te an nuar a, vawi khat dinah Rs. 700 ni ṭhin kha tihpun ni rawh se an ti a. Hei hi private a ukil rawihte fee nen ngaih fin loh tur a ni. Delhi lama ukil hote dinna fee kan han tarlan hi chu private a inrawihna a ni. Eng pawh nise, vawikhat dinah (per appearance) an hlawh tlem lem lo khawp hlawm mai; heta ṭang hian Mizorama ukil fee te hi a lo sang lua love.

A ṭha ber chu ukil rawih ngai lova awm hi a ni a, a ṭha lamah pawh ukil rawih ṭulna a tam tho mai. Service thuah te, ram compensation thuah te, motor accident claim thuah te leh thil dang dangah ukil rawih a ṭul chang a tam mai. Tawk rih teh se.

Ukil Supreme Court Delhi High Court

P. Chidambaram 6-7 lakhs 7-15 lakhs

Harish Salve 6-15 lakhs 6-15 lakhs

A.M. Singhvi 6-11 lakhs 7-15 lakhs

C.A Sundaram 5.5-6.5 lakhs 7-15 lakhs

Dushyant Dave 5-10 lakhs 5-10 lakhs

Salman Khursid 5+lakhs 8-11 lakhs

Parag Tripathi 5-7 lakhs 5-10 lakhs

Kapil Sibal 5-15 lakhs 9-16 lakhs

Shanti Bhushan 4-6 lakhs 4-16 lakhs

Shyam Divan 2-4 lakhs

Ramnjethmalani 25 lakhs

Indu Malhotra 1-3 lakhs

- Rualkhuma Hmar