Politician leh ram mipuite

Mizoram mai ni lo, India ram state tin pawh ni mai lo, khawvelah hian induhsakna a nasa a, mahni ṭantu lam lo chu ṭanpui let duhna rilru an pu lo emaw tih mai turin; mahni party mi lo tan phei chuan dilna-in awmzia a nei thui lo ṭhin hle.

Mizoramah MLA bial 40 kan nei a, a chang fuh bial chuan minister bial an hauh laiin MLA fang bialtu te, parliamentary sec-retary bialte an hauh bawk a. Minister bial nih a, anmahni party mi leh sa, inthlan laia mi ṭangkai tak a nih phei chuan a bialtu chuan a vulh nasa ṭhin hle. An party mi ni lo tan chuan duhsakna chu vana rah ang a ni.

Politician-te hi ram rawngbawltu ṭang-kai tak an ni a, fel tak tak, theihtawpa ram rawngbawl an awm a, an fakawm hle. Chutiang bawk chuan an duhsak loh zawng lakah chuan sual thiam tak an ni thung. Anmahni vote-tu leh vote zawnpuitute erawh chu an hre em em a, vote zawnpuitu pawh ni lo, anmahni vote lotute thlengin an thliar hrang thiam lutuk hi erawh chu an fing lutuk mah mah a ni.

Sorkar lai party mi leh sa lo tan chuan hna dilin awmzia a nei thui lo hle. Hnaruak awm ta se, MPSC kaltlang lo; department aṭanga lak theih mai ang chi a awm pawhin a ruka laksa an nei tlangpui ṭhin. Advertisement pawh a mawiah an chhuah a, written test an ti ve bawk a, interview hnuah result a chhuak a, beisei nei leh tiṭha tak tak pawh chhawk an ni fo; an la ni zel bawkin a rinawm.

Minister zawng zawng hian engemaw tal thil diltu an nei vek a, dilna lehkha-ah chuan department officer hnenah emaw, a changtu minister-ah emaw ṭha deuhin an ziak a. Chu thil diltu chu thingtlang hla tak aṭanga lokal, beisei nei em emte an tam hle
ṭhin a, mahse thil inpek theih loh a ni tih hre loin minister recomment-na kha an kualpui zak zak a, beidawngin an haw leh ṭhin. An khawngaihthlak ṭhin teh e. Minister khan duhsak zawng a nei ru tawh a nih chuan a dil chi loh tih kha
ṭawngkamin ti mai se, mi beidawnna a nasa lo tur zawk niin a lang.

Mahse Mizorama politician-te hi fakna chin an awm kan ti thei ang. Heng fakna tam takte hi Mizo tlawmngaihna an chhawm nun vang a ni thei bawk. Sorkar hnathawk eiru thei leh eiru ṭhin dinhmuna dingte chuan an eiru a, mipuiah luanchhuahna an nei meuh lo. An chhungkaw bil tan an hamṭhatna dawn leh an eiruk chu a lut vek. Politician te chu eiru pawh lo awm se, mipuiin a zar an la zo tho. An eiruk ni lo, ham-
ṭhatna thianghlim tak an dawn tam zawk chu mipuiah a luangchhuak ṭhin. Hetiang kawngah hi chuan an fakawm ngawt mai.

- Lalkhirhvela