Social media kan rûi a ni ber e

Thu dik pawh ni se, sawi chhuah dan leh sawi chhuahna hmunin a zir loh chuan thil hlauhawm tak a ni ṭhin; a dawngsawngtute dinhmun azirin sawi chin tâwk thliar thiam a pawimawh.

Thil langtlang kan thupui viau lai hian, ngialngan lutuk hi mi zawng zawng hriata puanzar a ṭul lem lo. Naupang hriat âwm tâwk puitlingin kan hrilh ṭhin ang hian, mi dang hriat âwm chin kan thliar thiam a ṭul hle. Hmasawnna tur leh hmalakna ṭha tak awm thei ni si loah kan inham buai phah fo thin a nih hi.

Youtuber ṭhenkhat duhthawh lutukin viewer neih tam tuma ṭan lain, uchuak tak leh âwn lam nei rânin content an siam ṭhin. Entu mipui zingah lo khawngaih leh lo ring mai an awm ve zel bawk. Facebook lamah pawh chutiang thoin, thu dik puan chhuahna a ni nge, phuba lak tumna tih pawh hriat thiam a har a, chutiang chu ngampa taka post hmuh tur a awm leh ṭhin. Thinrimna chuan thu dik leh thil dik ngaihtuah thei lovin min siam a, tharum thawh châkna leh ṭawngkam chhe pui pui a hring chhuak ta ṭhin a ni.

Tun hma lam deuh leh tun hnaia TBCC chungchang thil thlengah hian mipui hriata kan thil tih hian nghawng buai tak a nei ṭhin a. Mimal tu tu emaw kan dem kual hnuah a ṭhenin kohhran kan dem a, a ṭhenin sawrkar kan dem tel bawk. Kan ṭan lam min thlawp an ni emaw, ni lo emaw, thu rem tura lo ding chhuak apiang, kan chân loh dana rawn sawi reng reng chu dawihzep, thu dik ṭan ngam lo leh hma la ngam loah kan puh hmiah hmiah zel tawh mai. Dem tur kan dap kual nasa hle ṭhin.

Home indaih loh vangah te, NGO chak tawk lohahte (a ṭhenah chak kan ti viau thung) duhthu kan sâm kual chiam chiam a. Kan dinhmun thlirin hengte avanga home din chiam ai chuan social media filter thiam content creator ṭha neih dante hi ngaihtuah zawk ila, kan thawveng hma zawk lo'ng maw. He lama mi thiamte ai hian a hre lem lo ngal chakte hian an pal chak ṭhin bawk si.

Dikna puanzar tum inti hian buaina kan chawk chhuak a, kan ṭan lam lah chu dinhmun dik a ni leh nih loh kan chiang chuang bawk si lo. Hengah hian sawrkarin hma la rawh se, kan ti a; sawrkar lah hi heng ho lo chhawr tawh ṭhintu an ni fur. A bikin youtuber lar eng emaw zat hi political party-te'n campaign laia an rawih, thu dik hrûla party dang beih nana an hmanruate an awm fur. Chung rual chuan politics thil ni lovah pawh mipui hmuh duh zawng nia an rin chu an thiam ang tawka cheibawlin min hlui ṭhin a ni.

Kan bengverh zawng hi a ho han ti ṭhin mah ila, kan kal kân hlei thei chuang lo. Mi tam takin hrethiam mah se, thu tak hla taka ngaia lo tuipui viau hi an tam em em tho si. Chung mite chu kan chenpui te, kan ṭhian te, kan chhungte an ni ve leh zel bawk si; kan inveng seng lo a ni ber e.

Dâwt muhlûm chu an sawi bik kher lo; nimahsela, nunphung pangngai tibuai a, kan tualzâl nun ralmuang tirâlkheltu an ni tlat si. Mi buaina chhan chhuah tumin an harsatnate mi dang hriatah an puanzarsak a, nimahsela, an hmalak danin a zir loh avangin a lehlam an tibuai a, khaikhawmna fumfê awm hlei thei lovin kan khawtlang nun hi dan mumal awm lo leh chenna tlak loah kan chhuah mai ṭhin. Internet khawvelah hian Zo fate kan rûi tak zet a ni e!

~ Rotluanga Varte