KAN NIHNA A LANG
Kan khawsak phung leh kan nun phung, kan ṭawngkam chhuak te leh kan hawiher, kan khawsak duh dan, kan nun dan leh keini aia hniam zawkte leh piangsual rualbanlo te kan biak dan leh kan en dan aṭang hian thil chik zawk mite chuan eng ang mi nge kan nih tih an lo hre thei tlat zel. I awi zawng a ni emaw chu?
Ṭhian kawm tur kan thlan dante hian eng ang mi nge kan nih tih hi chiang takin a lantir. Sap thufing chuan, 'Sava hmul in ang te chu an cheng dun thin,' a ti. Chuvang chuan kan ṭhian kawmah i fimkhur ang u. Ruihhlo ti mi leh zu in mi i kawm chuan i ruihhlo ti lai rawn hmu mahsela, i nihna chiang takin an hre nghal thei. Kan bul hnaia awmte aṭangin miin min teh ṭhin.
Eng tin nge i hunawl i hman ṭhin han inzawt teh. Hunawl kan hman duh dan aṭang te hian kan nihna chiang takin a lang ṭhin. Englai pawha facebook, whatsapp, wechat, twitter etc, khawiha online reng kan nih chuan miten eng ang mi nge kan nih tih hi an lo hre khiau zel. Status i update duh dan aṭang leh i wall a i thil post duh dan aṭang pawh nupui/ pasal tlak i nih dawn leh dawn loh a lang thei a nia!
I sum thawh chhuah sa te kha eng tin nge i hman ve
ṭhin? I in chhungkhur mamawh chi hrang hrang ngaihtuah nan te leh nu leh pa enkawl nana i hman tawh hnua i sum la chuang te kha i nakin hun atan bank-ah i khawlkhawm thin nge ruihhlo tih nan, nula chhai nan leh pawisa khelh mai mai nan te i hmang ṭhin? Kan sum hman dan leh kan thehchhuah dan te hian eng ang mi nge kan nih tih hi chiang takin a lantir ṭhin.
I nuna harsatna leh manganna, hreh-awmna leh beidawnna lo thleng ṭhin te kha eng tin nge i lo hma-chhawn ve ṭhin le? Nangmah kha han inzawt teh. Kan nuna thil lo thleng ṭhin kan lo hmachhawn dan leh kan lo beih let dan te hian kan nihna chiang takin a lan tir ṭhin.
Harsatna lo thlengte hmachhawn lova tlansan mai ṭhin mi nge i nih a, hneh ngei tuma lo bei let ṭhin mi? I nuna beidawnna, harsatna lo thlengte i hmachhawn dan aṭang te khan eng ang mi nge i nih tih chiang takin a hriat theih.
Kan inchei dan, kan lawm zawng, kan lehkhabu chhiar duh zawng te leh midang chanchin kan sawi duh dan te pawh hian kan nihna a ti lang chiang viau ṭhin.
Abigail Van Buren-a thusawi hian kan thuziak, i han khar dawn teh ang. Mi a nihna hriat theih dan- ‘Ama tana thil ṭha ti let ve thei lote chunga a chet dan, amah tilet ve thei lote a en dan' aṭangin a lang chiang viau bawk ṭhin.
- Nawlchunga Chinjah, Siaha