NGO hruaitu nih man a tam...

Ka thu ziah hian rah ṭha a chhuah nghal mai chu ring lo mah ila, hetiang lama rilru sengte kaih harh nan tiin ka rawn ziak leh ngawt dawn a ni. Mizoram pum huapa NGO inthlang ṭhinte sum leh pai senso leh OB nih man tamzia hi a taka hretu zinga mi ka ni awm e.

Ni, inthlan dawnah chuan hruaitu nih tumten an hnuaia vote neite chu campaign-in an fangkual ṭhin a, an vahvelnaah hian motor te an hire a, an motor hire te hi a chuan nuam leh senso sang takte a ni
ṭhin. Tute emawin motor ṭha leh manto hi zahawmnaa an ngaih vang nge, an ngaih ve vang zawk pawh ka hre lo! Engpawhnise, motor an hman man ringawt pawh hi turu hem hem ṭhin tak chu a ni. Hruaitu nih tuma an vahvelnaah hian an va kalna te nen khan chaw ei khawm te a lo ngai bawk ṭhin a, inseng tak chu an ni tawh a ni.

Inthlan dawn a lo nih meuh chuan tlang hran hran aṭanga lokalte motor hman man thlengin an han tum sak ta a, ṭhenkhat phei chuan ei leh in man an la phut bawk! Hruaitu nih tum tan chuan lu haina tur hi a tam hlein ka ring. Topup thun sak beisei lah an bang chuang lo, ṭhenkhat a in chi lo phut tlat lah an bo bik si lo.

Pocket money thlenga pek ngai pawh an tam. Hetiang reng renga NGO inthlan kan hmachhawn ta hrep hi tu mawh nge tih pawh ngaihtuah tham tak chu a ni. Ka ṭhianpa sawi dan chuan inthlana an chhungkaw sum a sen ral ringawt pawh cheng singriat vel a kai thei maw le. Hei hi a mimal sum a hman chauh a ni a, khawi emaw aṭanga ṭanpuina pawisa an hmuhte nen phei chuan sang tak tur chu a ni.

Heti khawpa hruaitu nih man a tam a, a san em em lai hian hruaitu nih chu a nuam a ni ang an la inchuh luih luih tho a ni. Ṭhenkhat chuan MLA emaw Minister hnen aṭangte in campaign fund an dawng a, hei vang te hi a ni mahna an tlin hnua hmalakna ṭhenkhat sak deuh ṭalh a awm ṭhin ni. Hruaitute chuan a ni lo an ti mai thei, mahse, hmalakna ti thuanawptu pakhat chu a tling hrim hrim. Tute emaw hnen aṭanga kan tlinna khawp sum kan hmuh a, kan sum sen ral tamtak min tumpui miau chuan beih vak leh tih vak chu har ve tak tur chu a ni.

Heti renga kan kal chuan kan NGO te pawh hian an tlakchhiat phah ang a, hmalakna awm ngawih ngawihah pawh an ngawi fo ang a, kan ram leh hnam hian a chhiat phah ngeiin a rinawm. NGO-te pawh hian inthlan dawna campaign a zinchhuah te hi phal lo bur se, chu ringawt pawh chuan sum sen tur tamtak chu a chhawk zangkhai ngei ang. Tin, inthlan niah sum leh engemaw sem a awm lohna turin a viltu tur election buaipuituten ruat ta bawk se a ziaawm deuh ang. Insen ve ngei ngei a ngaihnaah erawh sum leh pai an seng a nih pawhin ka dem hauh lo kei chuan.

Mizorama pawl lian deuh YMA, MSU leh MZP inthlan a OB chuh tur meuh hi chuan an mimal ṭhatna piah lamah hian sum an sen ve ngam a ngai tlat a ni. An mimal sum kha hmang fe mah se daih loh leh tlin loh chinte a lo awm a, chutah chuan tute emaw an pur ta ṭhin a, tute emawin an puih tawh chuan eng ang pawhin lo tling se a puitute dik lohna hai lan emaw dodal a ṭul hun pawha dolet chu an tan a sak ta ṭalh ṭhin niin a lang.

Heng NGO lo pawh hi pawl hrang hrang inthlanah hian sum leh pai sen chu a ngai chho ta zel a, hei hi kan ram leh hnam pen dik lohna pakhat a ni. Sum sen ngei ngei a ṭulna chin erawh ka hrethiam, ṭul vak lo leh a behbawma sum kan khawhral nasa lutuk erawh a ti ziaawm turin kan NGO hruaituten ngaihtuahna leh ruahmanna an siam a ngai a ni.

- Biaksiamtluanga