Aizawl kawngpui a bung!
Tunlaiin khua leh khua inkalpawhna kawngpui ṭhat lohzia kan sawi nasa. Hetihlai hian Aizawl khawpui chung kawngpui an laih chhiat nasatzia hian sawi a hlawh lo. Sawi chhuah loh chuan sorkar hian engah mah a ngai lo dawnin ka hria. PHE aṭanga tui connection diltute hian kawngpui hi an duhna lai laiah an lai chhe tawp a, chu chu kawng enkawltu hian engtin mah an ti zui lo a ang hle.
Veng hrang hrang hi kal kual ila, khawpui chhung bik na na na hi chu tun hma zawng aiin kawngpui hi a mam ṭha deuh tawh niin a lang. Kawng chhe zual bik vengte chu awm bawk mah se, Aizawla kawngpui lûnlai hi chu kal hrehawm khawpa chhia a ni hlawm lo a, duhthusama mam ni lo mah se lirtheia tlan chak ngamna tur khawpin a ṭha tlangpui. A tichhetu erawh chu kawngpuia tui pipe phumna tura kan rek kaw nasa lutuk hi a ni.
Ka hriat sual loh chuan miin kawngpui kâna tui pipe a phum duh a nih chuan, kawngpui siamtu (PWD?) hnenah dilna a thehlut ang. Anni lamin kawngpui an siam ṭhat lehna tur pawisa pe turin pipe phum tumtute kha an hrilh ang a, Treasury lamah pawisa chhun luh a ngai. Tichuan, kawngpuiah pipe phum a nih pawhin, PWD lamin an rawn hnawh phui leh vek tur a ni - hei hi kalphung tur niawm tak a ni.
Tuna kan kal danah chuan, kan in zawn remchang laiah keimahni thuin kan lai chat tawp mai. A ṭhenin cement con-crete-in kan hnawh phui leh a, a ṭhen chuan lei pangngaiin kan hnawh leh mai
ṭhin. Cement-a hnawh mah tlan tinuam lo leh tlo lo a nih vei nen, leia hnawh hi chu awmze nei lo ang a ni. Hetianga kan Aizawl khawpui kawngpui hmun tam taka 'laih chhiat' a nihlai hian, kawngpui enkawltu lam aṭanga 'action lak' thawm hi kei mi bengvar lo deuh hian ka la hre fuh lo tlat.
Tunah hi chuan kawngpui laih chhiat hi a hlauhawm lo a, ka tui lakna pipe phum ka duh chuan ka remchanna berah ka lai chhe tawp ngam. Hengah hian Local Council-te hi inrawlh awm tak an ni a, kan AMC lamte pawh an chanpual ni lo mah se khawpui enkawltu an nih angin ṭawng chhuak se a ṭha khawp mai. Engpawhnise he thu hi phunchiar thila sawi ni loin,
ṭhahnemngaih thilah kan kawngpui ṭha neih vete a lo tlo zawk theihna turin ka ziak a ni.
Aizawlah hian kawngpui metal mam ṭhalai hi hmun tam takah a bung a, hei hi thuneitu lam hian a hmu lo der zel dawn nge, dan pangngaiin tlawmngai pawl lam an au chhuak leh mai dawn? Nge, kan zavaiin kan thlir liam mai mai dawn?
- Tetea