LO KHRAWDIAT VE ILA!

Tun hnaiah lehkhabu, a hming danglam tak, KHRAWDIAT an tih chu a lo chhuak a, phek 330 lai a ni. A chhuah hma aṭangin Facebook-ah a rîvâ kan lo hre zauh zauh a, a lo chhuak ta chu ka han keu va, ka rin ang chiahin a ziaktute chu mi leh sa inang lo satliah pawh ni lo hian an lo inpawlh sawp nasa ngei mai.

Thuhmahruai chuan phêk 4-na a chang phâk chauh va, phêk 1-3 chu 'Thuhmahruai Hmahruai' a ni pek. A ziaktu ber kher lah chu VL Ringa Sailo, chemte vawm thiam kha a ni daih a, he bu hming hrilhfiah tum hian phêk thum zet mai a lo bei niin. A hrilhfiah thiam loh a leiah entirna a pe thla chiam mai a ... Sapin 'CRAWDAT' an ti a, vaiin 'KHERWADI" an ti, te a tia! A sawi sei bawk a, a awiawm loh hman nasa khawp mai. A laihawlah 'Thih chhan : Khrawdiat' tihte a awm nuk a, chumi hnuah amah vêkin 'Thuhmahruai' chu a ziak leh a! He pa hian a bu chhungah 'Hmawlhte' tih ringawt a ziak a, hmawlhte chuan a tir tlem a chang a, a duh duh a sawi san daih a, a tawpah '.... chuvangin hmawlhte hi...' a ti leh a, sermon sawi se kan mangang ngawt ang!

A ziaktute hi Mizorama kawng hrang hranga hriat hlawh, he bu-a bilh khawm an nihna thu chauhah lo chuan inanna nei tlém tak tak an ni a, Synod han tiha a Sanhedrin lai tak ni awm tak leh Sunday School takngial pawh kai ngai lote, chanchin reng reng, a hlui apiang tuipui leh a thar bawhzui chi te, hmunphiah tel lova engmah sawi thei lo te, zu khap duh em em leh in reng mai te, Kohhrana chanvo pawimawh neih avanga thlarau nun ro telh telha hre tlat te, pathlawi te, mi hriat ve reng pawh ngaihnawm bik deuha sawi thiam riau chi te an ni nual a. An thupui lah chu, 'Pa ka nei a' tihte hi zuk nia. A
ṭhen chuan lungleng thei tak anga mi hriat hlawh beiseiin, 'Hmanlai an chang zo ta .... Romei zing riai karah .... Ka lung tilengtute .....' tih te pawh an hmang ve a, a chhungah chuan sakei sum 9 chunga chuan leh Thaichhawninu 'pachal' sum 9 vel tho sa ei thute a awm daih! Tun ṭum chu lawi êk soup hàwp thu a awm lo hlauh.

A ngaihnawm ve riauna erawh chu - anmahni hriat zawng an ziak hi niin ka hria. An han hre chiang hlawm angreng khawp a, a changtupa an nihna ngei mai kha an ziah hlawm deuh vek avangin, an thuziahah na na na hi chuan Authority an ni vek mai a, hnial pawh tum ila tih dan a váng khawp ang. 'Leimin veng naupang'-in ama chanchin a ziah phei chu hnial dan váng tak a ni a, 'Ka lung tilengtute' tih te pawh hi 'A nih loh kha, kha zawk kha a nih kha' tih chi a ni lo! Dina leh Dara phei hi chu thingtlang lam Specialist ang deuhva ngaih hi an ni sa a, tun thleng hian khawpui nun pawh an la hre tak tak lo rëng a! Thingtlang lam sawi erawh chuan Resource person nih tling khawpin an hre ṭhing ve ve. Bawlhhlawh paihnaa mi Toothpaste kawr paih chhara seh sàwr hiar mep mep thu thlenga zêp lo kha an ni a, 'Paula theology' te chu ziak dawn se an buai dùn ve ngawt ang.

He mite ho ropui riauna chu, tun hma aṭangin Krismas dawnah hian ṭanpui tur, mi harsa zawk hi Aizawl pawn lam thleng thleng hian an zawng chiam zel mai a, a cháng chuan mahni inthupin, hmai tuam titihin zan thimah an tei chhuak a, a chang leh, 'Kum tluanin mahni theih tâwk khâwl hlawm ila, kum tawpah kan keng khawm ang a, kan sem dawn nia' an ti mai a. Ka hriat rûk dan phei chuan chuan kum khat chu thil hlui ngaihven deuh hian, 'Pu Hmawlhtea thawh zatve tal chu ka thawh ve ang' a ti vei rawk a, Pu Hmawlhtea chuan nuai zatve dawn lai a theh chhuak ta mai si a, Pu Hrehluia chu a mangang viau mai, an ti.

Hetiang hi an chin dan a ni a, 'Chhiat tawk buaipuitute thingpui lum nan Rs.1,000/- a pe' tih te hi puang ve lo mah se, kum tam tak hi 'Krismas rilru dik' an lo pu tlat tawh hlawm a, chu chuan he bu pawh hi a rawn khrawdiat ta a nih hi. Lo chhiar ve ila, ngaihnawm kan tih loh pawhin, kan leina chu miretheite hnen thleng tur a nih miau avang leh, an ei rûk dawn miau loh avangin, sawma pakhat pêk tluk laia ngaih ṭhatthlak a ni ve dawn. Phêk 5-naah, "Dik tak leh ṭha takin kan hmang leh mai ang" an tih kha. I lo khrawdiat ve ang u hmiang.

- RK Lianzuala