NLUP ka duh ve e...
Vawk pul hri an kiam e tiin NLUP atân vawk an sem leh dawn ta a. Hmanni lawk khan Auto Rickshaw an sem bawk a nih kha. He sum, mipui bum nâna PM Special Package an tih, ni hauh si lo hi Plan sum aṭanga an sem a ni. Plan sum chu eng nge ni le?
Budget-ah hian Plan leh Non-Plan a awm. Non-Plan chu sawrkar hnathawk hlawh leh an hnathawhna kawnga an inrelbawlna tura sum dah a ni. Plan sum erawh hnathawhna tur, mipui tân liau liaua dah hran, hmasawnna tur atâna dah bik a ni thung; Budget-a mipui zawng zawng chan hi a ni tihna a nih chu.
Congress sawrkar hian he Plan sum, budget pumpui
aṭanga 30% something hi a sawisak dan hi a namai lo hle. Sawrkar hnathawk nghet lo, Non-Plan sum aṭanga an hlawh pêk tur awm lo te'n an han pawt hek phawt a. March Final, Pu Manzuala lehkhabua Minister leh Dept Director ten sawrkar kum tawpa an eiruk chiam chiam hmang khan he Plan sum hi an han pawt cher zual sauh bawk a.
Chutah, sawrkar chuan NLUP a sem a ngai leh ta a. PWD paw'n tun hnaiah kawng chhiat chhanah sum a awm loh thu an sawichhuak ta a nih kha. Plan sum hmanga a nuai tel a ral apiang hian Dept kaltlanga hnathawhna tur sum pawhpen a ni ta a! Congress tihdan thîkin MNF lam lah chuan nuai thum sem an la han tum zui! NLUP an han sem meuh chuan hnathawh nâna sum awm hi Budget pumpui aṭanga 12% vel a tling ta chauh zuk nia!
He Plan sum hi kei, mipui tân a nih miau avangin vawk hi ka duh ve a, Auto-Rickshow pawh hi ka duh ve ngam ta chauh a ni. Kan Health Minister lah chuan huai tak maiin Mizoram Per Capita Income a pung a han ti zui a. A pung reng ang chu! Anmahni ang rual, Minister leh MLA te hausakna, 600% chuanga a pun lai hian mimal sum lakluh hi pung lo chi ni nghal lo chuan! Keini mipuite sum lakluh erawh a pung chuang lo va, kut-hnathawktute lakluh pawh a pung chuang lo mai a ni zawk.
Thu dik lo hmanga mipui bum in tum apiang hi kan lo ngaithlain kan lo chîk ve tih hria ula. Thu dik tak mipui hrilh hriat hmanga in dawtsawi pholang ṭhin an awm tih hi hria ang che u. An duh duha min chinglet ṭhin sawrkar kan neih chhan chu mipuite vang a ni. Zoram mipuite aia hneawm tih hi ka neih awm ka hre meuh lo! Kan zahpuiawmin kan huamhap êm êm a. Mahni hma kan sial zawh poh leh biak in lamtualah kan hrut hniam a!
Midangte hriata kan kam a
ṭhat zawh poh leh kan thilsual tih ruk a chhah zual a. Pu Saikhuma ten Zoram mipui kan boral turzia an sawi hi tunah pawh a thleng mek a nih hi. Kohhran kawra kan hman ber hmangin Pathian fakna hla sa ṭhinten 'I believe i can fly' sap hla lênglâwng mai mai Pathian fak nân an sak ngam a, Pathian rawngbawl an intihna ram hi Pathian ber tân hrem loh rual a ni hlei nem!
Misualte chanvo tur chu he leiah ngei hian Pathianin a la pe ang tih hi kan Pathian thu a ni. Inthup mawi nâna Missionary, kan eiruk suma chawm kan awm ṭhup vang hian hrem zawng kan pumpelh chuang hlek lovang. Jt. Director missionary chawm nek inchhûng nawm loh tluk zetin contractor inchhûngah hlimna a awm chuang lo.
Plan sum ka chanpual aṭang hian NLUP hi min pe ve rawh u.
- Lalremliana Pachuau