Hmasawnna leh environment

Kumin chu khua a danglam hle mai. Thlasik rim a nam tawh hun turah pawh chhûn lamah ni a la sain khua a la lum hle a, chuti a nih loh vek chuan ruah a sur leh buan buan a, climate change hi a takin kan hmachhawn mek a ni.

Khawvel sik leh sa danglam chak lutuk tihziaawm nan thingphun, ramngaw humhalh te kan inzirtir nasa hle a, Mizoramah pawh Green Mizoram tiin kum tin thing ṭiak sang tam tak kan phun a. Sorkar pawh thingphun lamah hi chuan a ṭhangharhin a inhawng hle.

Chutihrualin kan environment humhalh kawngah hian sorkar ber pawh hi duh ang hian a la ṭhangharh tawh lo hle.

Environment & Forest lamin theih-tawpa ramngaw humhalh an tum laiin, lo neih leh huan ram neih chungchang lam ngaihtuahtu te, kawngpui leh hmasawnna tur thil dang ngaihtuahtute hian min hual veltu nungcha leh ramngaw humhalh hi an rilruah a la lian tawk lo hle.

Hmasawnna tura ruahmanna kan siam tam takah hian nakin zela nungcha leh ramngawtena an tuar dan tur hi kan ngaihtuah lutuk lo niin alang.

Thlai chîn chung-changah te, mi rama hlawk leh ṭha, kan ramah pawh a ṭha duh a, eizawnna atan a ṭha tih avang ngawtin chîng turin kan inzirtir zel mai niin a lang a. Nungcha leh Mizorama tual ṭo dangte tan eng angin nge a hnawksak ang a, engtiang chiahin nge kan ram a tihchhiat ang tih kan ngaihtuah lo a ni berin ka hre
ṭhin. Kan ram tibua leh nungchate tan pawi tur hi kan ngaihtuah pha lo hle.

Kan ram thing leh maute hi kan rohlu a ni a, kan nungcha, kan chehvela chêngte avanga nun hlim a, nun nuama awm kan ni chauh. Hmasawn kan tum luatah hengte ngai pawimawh hauh loin hma kan han la a, kan ram hian a tuar zel ang. Environment & Forest chauh hi sorkar department zinga environment humhalh tur an ni bik lo a, department dangte pawh hian environment humhalh kawnga hma an lak ṭhat loh chuan awmzia a awm lo ang.

Tun kum 10 vel chhunga kan ṭhatna tur chauh ngaihtuah lo hian kum za lo awm leh tur hi i thlir pha teh ang u.

- Ramropuia