Traffic jam tihziaawm nan

Traffic jam harsatna tihziaawm nen public transport/service vehicle-te dah lal a pawimawh a, private motor-te hrêk beh zawk tur a ni.

Mizote hi mi dang hmakhalh duhna leh chuhhelhna rilru kan pu nasa ta riau mai a, hei hi a chhan chu, mi chunga lên duhna leh chapona vang a ni ber awm e. Lirthei intlan chhawk system kan kalpuinaah pawh sum nei deuh chuan tlan loh ni nei lo turin lirthei an lei belh leh mai duh zel a, kan rama mihring awm zat (population) nena khaikhinin Mizoramah hian lirthei a tam teh asin.

Ram changkanga an tih angin traffic management system (lirthei tlan dan enkawl) hi kan her danglam hle a ṭul tawh a. Private motor-te hi hrêk nasat a, public transport/service vehicle-te hi dah pawimawh zawk tawh tur a ni; hei hi a ṭul tawh tak zet. Entir nan, taxi, city bus, etc. te hi dah pawimawh tawh zawk ila, private motor pung lutuk tur hi hrêk beh tlat a, a neih dan tur kalphung pawh khirh tak leh expensive (hautak) taka siam ni se la. Chutih rual chiahin, public transport vehicle-te service kalphung mumal leh rintlakin siam bawk ila, kan ziaawm phah khawp ang.

Hemi atan hian sorkarin bengsika ngaihtuahin, huaisen takin hma la ngam se, kan ziaawm phah ngawt ang. Kan khawpuia traffic jam nasa lutuk hi kan titawp thei lo a nih pawhin, a ziaawm phah ngei ngei ang.

Dik tak chuan, private motor neih hi mi khawsa thei leh mi hausa takte tan lo chuan a hautak a, a buaithlakna lai tam tak a awm thei a. Mahnia enkawl ṭha thei lo tan driver chhawr a lo ngai a, hlawh pek a ngai a. Driver rintlak tak leh mi ṭha hmuh tur an tam lo bawk nen, private motor neih leh enkawl hi thil hautak deuh chu a ni.

Chuvangin, public transport vehicle (public service vehicle)-te hi dah lalin dah pawimawh zawk ila, an service kalphung pawh rintlakin siam ni se la; tichuan private motor neih ṭul ti kher lo kan tam phah ngawt ang le.

- C. Lalthanmawia, IPS (Rtd)