Kohhran hian a tih tur chu a ti asin

Tunlai chu ṬBCC thu leh hlain Mizote khawvel a luah hneh hle mai. Kan mamawh lem loh, kan duh aia tam youtuber nei ramah hian kan ṭawng hi fimkhur a va ngai tak em; chu chuan ngaihdan inan lohna a hring a, social media lama inhnialna a chawk chhuak ṭhin.

Chutih mek laiin, advocate pakhat thusawi video a darh nasa hle; a thusawia kohhran demna lam ang dawn dawna a sawi chuan ngaihdan leh hmuh dan a phir a, sawi zui pawh a hlawh hle reng a ni. A thu sawi ngaithla chiang lem lote’n an thlawp hle bawk.

Kan thlirna mual i sawn hlek teh ang aw. Mizoram Chief Minister ka ni lo tih in hriat tluk zetin ka thusawi hi a dik ber lo vet ho tih in hre chiang vek awm e.

A hmasain kohhranin ramthar (ramthim) tan sum kan seng ta lutuk hian sawisel a hlawh ta fo mai. Ni e. Ramthar chu ramthar a ni reng ang. Drugs addict-te hnena hian chanchin ṭha hi hril a ni tawh a, ramtharah chuan hril lohna tam tak a la awm; chu chu kohhran mission chu a ni.

Tin, kohhran aṭanga bul ṭan tum hi thil theih loh a ni. Chhungkua aṭanga bul kan ṭan loh chuan All NGO pawh hian hma a sawn thei tak tak ngai lo vang. Kumtluanin speaker leh evanelist ṭha tak takte’n camping/crusade an nei deuh reng a, an lut a, jail-ahte an han tâng rên râwn a, an la nghei thei zel. An rawn chhuak a, Tuikuk pathian bum fin theih loh an sawi ang mai, an fel lai ber hi an hlauh awm lai ber a ni a, an duhthlannain an ti leh ṭhin. Kohhran kan mawhpuh leh a a ni.

Nun kawng dik zawh tur khawpin Mizo Kristiante hi kan inkhawm tam tawk e. Sunday school, sabbath school aṭanga zirtirna dawnga seilian vek kan ni a. Theihtawpin ṭawngṭai inkhawmah ngawlveite tan ṭawngṭai thupuiah kan nei a. Ṭhalai pawl tam takin ruihhlo zuarte leh ngawlgveite tan chawnghei ṭawngṭai kan nei châmchî bawk. Home leh center-ah kohhran hian sum tam tak a sêng a, budget-ah hial pawh cheng nuai 35/45 te a dah asin. Ngati nge kan hai der tlat le?

Drug-a sum dawng ṭhinte chhan chhuaktu tur hian tute nge pên chhuak ṭhin? Kohhran em ni? A teuhin a hnai lo mai. Dânhremite’n jail aṭanga an chhuah theih nan sum ṭhahnem tak petute tan theihtawp an chhuahsak ṭhin a ni tih chu ka hre tlang awm e. An lo chhuak a, an bawibur tê kengin kan ṭhalai tam tak nun an dâwi âtsak a; kan in vui liam mawlh mawlh mai a nih hi.

Kan hnam leh ram hmelma hi a huangtau ta mah mah a; kan hnam min chimral mektu ruihhlo lakah hian kohhran hian dem hlawh lul suh se. An tan kohhran hian Pathian hmangaihna an hriat theih nan bâng lovin chunglama meikhû ang main dilna a thlensak reng zawk a ni. Drugs addict-te hi kan endawng tur chu a ni hauh lo, an duhthlanna mah ni se, an thlang sual a, bânsan an duh; mahse, an mahniin an bânsan thei tawh si lo. An tan Samari miṭha kan nih a ngai, chu chu kohhran pawhin a hai lo, hmangaih leh lainat takin a thlir mek a ni.

Nehemia 2:17-18, “Chutichuan an hnenah, ‘Kan chan a chhiatzia hi in hmu a, Jerusalem a ram tih te, a kawngkhârte a kâng tihte pawh in hria a: hawh u, sawichhiat kan nih tawh loh nan Jerusalem kulh chu i din leh ang u,’ ka ti a. Tin, ka Pathian mi duhsak thute ka hrilh a, ka hnêna lal thu sawite pawh. Tin, anni chuan, ‘I tho vang u khai; i din teh tak ang u,’ an ti a. Chutichuan chu hna ṭha thawk tur chuan an kut an tichak a.”

Drugs tawlhtute avangin kan ram a rûm a; kan ram leh hnam a dam theih nan kan zaa kan ṭan a ngai ta. Kan kawtchhuah, inkalpawhna zawng zawng India sawrkarin hung a tum pawh hi kan ram leh hnam tan hian a ṭha zawk mai ang em le? Luh rûkna a tamin, kângmei ang hialin ṭhalaite a kâng duai duai a, chhungkaw tam tak mittui nen kan indawm kun reng mai a nih hi.

Ruihhlo rawn tawlh ṭhinte hian an dam chhunga jail-a an awm hi an tan pawh a ṭha zawk ang. An chhuah theih nan tuma’n an tan dinsak lo ila. An cho a, an rîm a, an rîm thlu a ni mai. Kohhran aiin sawrkar leh dânhremite hian mawh an phur zawk ka ti ve tlat. Kohhran chu suamhmang Setana vuak thluk ngawlhveite chhan chhuak a, an hliamte damdawi hnawihsakin, Kalvari damdawi ngei pe turin a in kau reng zawk a ni.

Heng buma awm mekte hi an lainatawmin an khawngaihthlak tak zet a, an duh thlan sual chuan an nunah thu a sawi ring em em a. An inthlahrung a, an chhungte, mahni in lumah pawh khawsa ngam lovin khawlaia mi bathlarahte an riak a. Chaw ei mumal lovin an awm a, rûk mai loh chu an tan kawng dang a awm si lo. Kohhran mi, mi ṭhenkhatin kan kal pêl a, an duh a, a ti a lawm, tiin. Jerusalem kawnga suamhmang tawktu khan suamhmang an awm tih hria se la, a kal hauh lo vang le. Chutiang chiah chuan tih chhin châkna chuan a sal a, a man bet a; anmahniin an tâl chhuak zo tawh lo. An hliamte enkawl turin home leh addict center-ah YMA leh chhungkaw tam takin an hruai mai zawk a ni.

Kan ram leh hnam a dam theih nan kohhran hi i bêl tlat ang u. Kohhrana inhmang hrâm hrâmte zingah ngawlhvei an awm mang lo va, kohhrana inhmang ngai lote zingah a ni ngawlhveite an lo chhuah ṭhin ni.

- Zothansanga, Chhiahtlang Kawnveng, Ph : 9612333536