Congress hotupain thu dik lo a sawi
Congress party hotu lawk berte zinga mi Pu Lalnunmawia Chuaungo, MPCC Senior Vice President, IAS val ngatin June ni 14, 2025 Zirtawpnia Congress Bhavan-a an chhung inkhawma a thusawi kha han sawi zui ka châk tlat mai a. A chhan chu–a thusawi kha a inkalh vang leh a dik loh vang a ni.
MPCC-in press release an siamah khan Pu Lalnunmawia Chuaungo chuan ZPM sawrkarin kut hnathawktute thlai thar leina atan cheng vaibelchhe 110 an dah thu a sawi a, "Kum kan hmang liam a, vaibelchhe 110 an dah aṭang khan cheng khat pawh kut hnathawktute thlai thar lei nan an hmang lo. A lei tura tutu emaw an rawih te chuan cheng nuai 10 dawn an hmang a, kuthnathawktute kutah engmah a lut lo... kum 2025-ah phei chuan thlai thar leina tur a bika dah an nei lo a ni," a ti a ni.
"Vaibelchhe 110 an dah aṭang khan cheng khat pawh kuthnathawktute thlai thar lei nan an hmang lo," a tih lai hian, a hnu lawkah chuan, "Hmunphiah 10,900 quintal vel awrh an leisak a..." tih te, sawhthing chungchangah, "May 20 thlenga sawrkarin an leisak chu 1,14,622 quintals a ni a..." tihte a awm leh thung.
A awmzia chu, Pu Lalnunmawia Chuaungo hian kut hnathawktute thlai thar lei nan sawrkarin cheng khat pawh an hmang lo nia a sawi laiin, a hnu lawkah sawrkarin hmunphiah quintal 10,900 vel leh sawhthing quintal 1,14,622 a lei tawh thu a sawi leh a. A thusawi hi a inkalh tihna a ni!
Sawrkarin hmunphiah leh sawhthing a lei chuan pawisa tam tham tak a sêng ngei dawn a, kut hnathawktute thlai thar lei nan cheng nuai têl a hmang ngei ang tih a chiang. Mahse, Congress hotupa Pu Chuaungo-a chuan cheng khatmah hmang lo angin a sawi duh tlat si!!!
Sawrkarin rate a siam angin han chhût ve ta ila. Hmunphiah quintal 10,900 a lei tawh chuan kg. 1 Rs. 80 (rate hniam zawk) anga chhût chuan Rs. 8,72,00,000 (nuai 872) hmunphiah lei nan a hmang tawh tihna a ni a. Sawhthing quintal 1,14,622 a lei tawh a, kg. 1 Rs. 50 zela a lei bawk chuan Rs. 57,31,10,000 (nuai 5,731.10) a hmang tawh tihna a ni. A belhkhawm chu Rs. 66,03,10,000 (nuai 6,603.10) tihna a ni bawk.
Congress Senior Vice President-in ZPM sawrkarin thlai thar lei nan cheng vbc. 110 aṭangin cheng khat pawh kut hnathawktute thlai thar lei nan an hmang lo, tia a sawi hi dâwt hulhual a ni. Hetianga IAS lai ni thei, mi vengva leh mithiam, ram hruaitu nih tumin dâwt chiang taka a sawi hi a zialo tak zet a ni.
Political party-te hian sawrkar hmalakna leh thil tih dik lo chu sawisel rawh se, a ṭul a nih chuan lungawi lohna te pawh lantir rawh se. Mahse, dâwt chiang lutuk hmang hi chuan inbei inbei suh se. Dâwta inbeih hi sim mawlh rawh se, mipuiin kan hnê tak zet a nia. Bakah, dâwt an sawi fo hian ram hruaitu tlak lo an nihzia mipui min hriattir mai mai a ni tih inhre bawk se a ṭha hle ang.
- Zothansanga