I NUIHZAT MAI LO ANG U

Burma aṭanga Mizorama rawn ral tlan Pitar pakhat hi, "Ka pi, i ṭha em?" an ti a, a lu a thing mat mat a, "Eng tin nge i awm, Na i nei em ni?" an han tih leh chuan a lu a thing zel mai a ni. He tih lai hian a tupa tleirawlte chuan Mizo ṭawng thiam chiang lo tak hian, "Ka pi hian Mizo ṭawng a thiam lo a, in thusawi a hre thiam lo a nih kha, a rawn ti a. Ni e, "Ka pi, I ṭha em," an han tih a, a lu a thinna chhan kha, Mizo ṭawng a thiam loh vangin a lu a thing mai a lo ni. Mizo ṭawng thiam ni se chu, na a nei a nih si loh chuan, "Ṭha e," a ti ngei ang le. Mizo hnahthlak ṭheuh pawh ni hlawm mah ila, Mizoram pawna kan unau awmte hian Mizo ṭawng hi thiam lo an tam em em mai a. Hetih lai hian, loh theih lohna avangin Mizoramah an rawn raltlan a ngai ta si a, Thlahtu thuhmun unau pawh ni ila Mizo ṭawng thiamte ai chuan thiam miah lote nen hi chuan inpumkhata thil tihho a harsa hle zawng a nih hi.

Khawvela hnam tinte hian inpumkhat kan mamawh vek a, Hnam inpumkhat nana thil pawimawh tak pakhat chu ṭawng khat hman hi a ni ṭheuh hlawm awm e, Chuvangin, tuna Mizorama rawn raltlante pawh hi chi khat chul khat kul unau pawh ni ila, tlang hran daihah kan awm a,, rorelna pakhat hnuaiah kan awm za si lo a, unau kan ni e, ti ti mah ila, ṭawng kan inhriat pawh loh chuan, ṭanho a harsain inpumkhat kan harsa viau a nih hi. Chuvangin, thlah khatte hi chuan ṭawng khat hmang thei ila, a tih awm hle a ni. Nimahsela, chenna tlang a dan hian ṭawng hi a dang hret hret awl em em a, Kan intlawhpawh vak loh phei chuan a danglam chak thei hle a ni. Ṭawng mai bakah kan hla thlukte pawh a lo inang lo hma khawp mai.

Tunhmaa kan pi leh pute hun lai khan inkal pawhna an nei ṭha lo hle mai a, Tun lai angin an intlawh pawh zen zen thei lo a ni. Khangte avang pawh khan a ni mai thei Mizo hnam hrang hrangte ṭawng hi inzul viau si hian a lo danglam tak viau ni, hnam hrang hrangte kha, tlang hrang hrangah an awm tlangpui si a, zawi zawiin kan ṭawng hi a lo dang lam ta ni tur a ni Hun lo kal zelah mahni hnam ṭawng vawnhim duhna a lo lian ta tial tial a, tun hi kan thleng ta ni tur a ni. Thlahtu thuhmun kan ni ti ti ṭhin mah ila, kan ṭawng a lo dang lam deuh avang hian, inpumkhat kan harsat ta hle a nih hi maw. Chuvangin, ṭhangtharte hian rilru zau tak kan put a ngai tak zel a ni.

Kan hriat ṭheuh angin tunah hian Mizoram chheh vela kan u leh naute Mizo ṭawng thiam lo, Mizoramah an rawn raltlan mek a ni a, heng kan unaute hi Mizo ṭawng thiam mumal lo mah se, an ṭawng paite hi, i en hrangin i nuih zat lo hram ang u, Hrethiam taka kan lo enkawl a, kan lo kuah khawn an ngai hle a ni Heng kan unaute hi tunah Mizo ṭawng thiam lo mah se, an rawn raltlan chhung hian, mi tam tak chuan Mizo ṭawng an thiam phah dawn a, hei hi kan ram leh hnam inpumkhat nan a ṭangkai hle dawn a.Tunah hian an ram lamah kir leh mah se, an rawn raltlan hma ai chuan Mizo ṭawng an thiam tawh dawn a, hun lo kal zelah hnam inpumkhat nan pawh kan la ṭangkaipui hle ang, Chuvangin, Mizoramin raltlan tam tak kan neih hi, Mizo ṭawng theh darhna ṭha tak a ni a, Mizote tan chuan malsawnna a va ni em.

- Hausanga Hauzel