Ministry pahnihte rawngbawlna leh prosperity gospel!

He thu ka ziah dâwn hian ka inngaihtuah nasa hle. Ministry pahnih ka tihte hi, an kalna hmun apiangah hmuh theiha rawngbawlna hlawhtling tak hnutchhiah thei reng an ni a. Mi tam takin taksa leh thlarau damna an chang bawk si. Thlarau mita meng lo, tisa mit fiah tak pu chunga he article chhiartute laka ka chan tur pawisa zo lovin, he thu hi ka'n ziak ta a ni.

Ministry pahnihte thuchah tam ber han ngaihthlak a, an thuchah bulpui ber leh an sawi tam ber han ngaihthlak hian, sap rama rawngbawltu hausa chungchuang Joel Osteen-ate thu sawi ṭhin rilruah a lo lang ziah ṭhin si a. Osteen-ate ang rawngbawlna hlimthla kha, Ministry pahnihte thuchah kal tlangin kan hmu tam tulh tulh a nih hi. Anmahni leh an rawngbawlna sel ngam a harin, baibul awm lo se he thu hi ka ziak ngam kher lo ang.

Tichuan, ṭum khat chu he Ministry-a an speaker pakhat zawk hnenah zawhna ka zawt ta a. "Eng vangin nge kawng nuam leh hahdamthlak, hlimna leh lawmna lam hawi hlir thuchah i sawi? Tawrhna leh hreawmna, mahni hreawm pawisa lova nitin kraws put thu i sawi ngai loh?" tiin. Ka beisei loh deuhin min chhang ta a nih kha.

"Ringtu nuna tawrhna leh hreawmna lo thleng sawi vak vak ai chuan, Lal Isua kan zui avanga malsawmna leh hlimna kan chan sawi tam hian, a ngaithlatute nun a hneh zawk. Lal Isua hnung zui hrehawmna leh tawrhna sawi vak vak hi ṭha ka ti lo," ti lam hawiin min chhang ta a. A mi chhanna ka hriat achin he mi rawngbawlna ka hmuh dan hi a danglam sâwt hle.

Ministry pakhat zawk speaker hian eksident râpthlak tak a tawh hnu aṭangin, a thuchah kal hmang a rawn thlak danglam leh tháwk bawk. A rawn dam chhuah leh hnu khân, he lei hi Pathianin ṭha famkima a siam, natna reng reng awm lohna tura a siam a ni a. He lei hi mihring fate tân liau liaua Pathian siam niin, Pathian lal ram (heaven ni lo, kingdom of God) hi kan nunah a thleng tur a ni.

Vanah chauh Pathian lal ram a thleng tur a ni lo. He leia kan dam chhûng la la hian kan nunah, Pathian lal ram leh, chu lal rama taksa damna, malsawmna tinrengte hi kan chanvo a ni tiin a kalna hmun apiangah, tun thlengin a rawn tlângau ta a. Amah ngei pawh a hausa chakin, hmuh theih khawpin malsawmna a dawnte chu an pung chak ta reng a nih hi.

He Ministry pahnih hian, rawngbawltu dangte tih ngai miah loh hmangin, inkhawm tura min sawm kal an rawn chîng thar bawk. Khawi hmunah emaw crusade an huaihawtin, inkhawm kimte hming lo chhinchhiahin a tawpah, scooty leh thil hlu eng emaw kha mi vannei man turin ṭhum an vawr a. He mi hmang hian ṭhalai tam tak an hip thei ta ṭhin a ni.

Mahse, kawng leh lam zawngin heti hian ka ngaihtuah ṭhin. Pathian hminga thiltih chu a malsawmna dawn nghalna, chawplehchilha hamṭhatna dawn nghalna angin Pathian an zuar tih hi a ni. An tih tirha a dawngtu lah khân, a rawngbawlna kawnga a mamawh tak a dil mek laia scooty dawng a nihzia, testimony hmangin a rawn chhu zui leh zel a. A Pathian thu riauna lai zawn dâwn chuan, hmuh theih a ni tlat a ni.

Tunah phei chuan crusade an huaihawt reng rengin, inkhawm kim tâna lawmman dawn tur ṭha tak tak tawktarhin, mi tam tak an ko haw thei ta ziah reng a. Pathian lahin an rawngbawlna kal tlangin hna a thawh chhunzawm reng bawk. Baibul tarmit aṭanga lo thlir uluk loh phei chuan, hamṭhatna Pathian thu an zawrh hi a sualna a awm hlek lo a. 'Ka tân Lalpa a ṭha a ni' tih hla tui taka sak mai loh theih a ni lo.

Mahse, kil khatah baibul zirtirna ka lo chhiar ve tawh ṭhinte chuan, mei angin min mût tlat a. "Hreawm tam tak tuarin Pathian ramah kan lut tur a ni reng a ni" tia Paula thu sawi ka ngaihtuah a. "Kawng awlsam a ni lo, Van ram kan panna kawng hi, Hling tam tak awmna a ni e"–tia thlarau mi JW Peterson-a hla phuahte pawh ka ngaihtuah ṭhin.

Baibul châng tar lan tur tam tak la awm mah se, Lal Isua ngeiin, "Tu pawhin mi zui a duh chuan, mahni hreawm pawisa lovin a kraws puin mi zui rawh se" tih thu hian, Ministry pahnihte'n Pathian zara hamṭhatna an tuipui ta lutuk, anmahni pawh leilung dana an neihnun sâwtzia lo lang ta hi, a milpui chiah em tih min chhuttir lo thei lo a ni.

Miin kraws thu aia buaipui leh thupui zawk, Pathian thu ni ve tho si a neih chinah reng reng, Paulate hniakhnung zui an bansan fel der tawh tihna a ni a. Chhandamna aia chanchin ṭha dang tuipui nei kan ramah, Evangelist kan ngah tulh tulh hi a mak lo. Thu hriltu der leh zawlnei suak tam tak lo chhuahna hunah kan awm tawh si a.

Ringtu dik tak tân tawrhna leh harsatna, buainate hi thlarau chaw lakna hnâr, Pathianin a tâna mi hmantlak tur a chher hriamna a ni a. Heng harsatna leh hreawmna, thlemna kal tlanga a fiahna pal tlang zo lo reng reng, Pathianin a rawngbawltuah a thlang ngai lo. Mahse, chutiang aia a malsawmna leh taksa damna ngawt thupuitu chuan, rah tam tak chhuah ahnékin a tawpah sawisel kaiin a awm leh mai ṭhin a ni zawk.

Rawngbawltu dangte ang lo takin, he Ministry pahnihte hian hmun nuam lai leh langsar ber berah, duat leh ngaihsak tinreng hlawhin rawng an bawl a. Thingtlang kilkhawr ber ber, ek in awm mumal lohna leh ei leh in chhiatna hmun, thilpêk lawmman dawn tur awm chu sawi loh, mahni zawkin chân chunga rawngbawl a ngaihna hmun an lo tlawh tawh ṭhin a nih pawhin, tun hnai kum tam tak chhûng chu an tlawh tawh ngai lo a ni maithei.

Chung hmunahte ai chuan, sap ram leh fawren lama an rawngbawlna hlimthla, malsawmna tam tak an dawnte hlimthla nen kan hmu ta reng mai a nih hi. Ringtute tân erawh ringtu nun kawnga harsatna leh buainate hi, kan ṭhanlen zelna tura kan chaw ei ngei ngei tur, kan chakna hnâr an ni si a. Hebrai lehkhathawn kal tlanga rinnaa fak hlawh rualte kawng zawh kha, nawm zawk châng awmin leh malsawmna ni ve bawk ṭhin mah se, an kawng zawh tam zawk erawh kawng nuam ni lovin kawng harsa leh hreawm, tawrhna hlir emaw tih mai tur a nih kha!

An hlimthla kal tlanga kan hmuh theih chu, kan rawngbawltute hi khawvel thila mi lar (Celebrity) kan tihte nen an inang tulh tulh tih hi a ni. Dawnsawn an lo hlawh dan, rawng an bawl laia enkawlna an dawn dan zawng zawngte pawh, rinnaa mi huai kal hmasate kawng zawh nen a inang lo tial tial a. Van ram aia lei leh a malsawmna thlakhlelhna nun neitu, kawng dik niawm taka lang a tawp thihna ni si kawng zawhtu an lo ni mai ṭhin a nih hi.

US lama Megachurch kan tihte hlimthla, kan Ministry pahnihte rawngbawl danah kan hmu chho tam ve tial tial a. Ministry-te hian an member-te hi thla tin tih turin, hlawh tia sawi tur ni si lo pawisa an sem ve ṭhin ta hial a nih hi. Pathian leh sum rawng in bawl kawp thei lo tia, Lal Isua ngeiin a sawi lâwk anga kohhran (ministry) lian tam tak an lo tlukchhiat tawhna hian, fimkhurna nun min neihtir a pawimawh ta hle.

Kenneth Copeland, Creflo Dollar, Jesse Duplantis-ate'n Executive Jet nen ngata rawng an bawl tawhna, an hausak leh neihnun bakah, an chenna in leh lo nuam lutuk avanga sawisel an hlawhna khawvelah, heng Ministry laka an sum leh pai ui hauh lo, mahse mi rethei leh pachhia, hnuchham leh fahrah tâna luan chhuah erawh phur leh lawi si lo ringtu kan ramah an tam êm avangin, Pathian remruat ang dik diak ni kher lo pawha malsawmna dawn tur a la awm zel ang.

Pathian hian a mite hi tawrhna leh hreawmna, harsatna leh buaina kal tlangin a fiah ngei ngei tih baibulin min zirtir a. Fiahna tâwk ngai lo ringtu inti reng reng, piang thar dik tak an ni ngai lo. Josefa chu a rinawm leh rinawm loh, he khawvel ropuina leh châkna lakah fiah a dawl em tih Pathianin hreawmna kal tlangin a fiah zet a. Fiahna a pal tlang zet hnuah chauh, malsawmna a chantir a nih kha. A enga mah hmaa Pathian malsawmna hi kan chanpual, kan chanvo a ni tih thuchah hril ṭhinte hian Pathian thu an sawi lo tih i hria ang u.

Paula'n Timothe-a hnenah, "Nang erawh chu engkimah fimkhur la, hrehawm tuar la..." tia min fuihna leh, Ministry kan sawite thuchah sawi tam zawk hi an inpersan hle a nih hi. Kan Ministry-te hi an kal sual ta duai a, zirtirna dik ata an peng bo ta e kan ti hauh lo. Pathian an buan dan leh Pathian tâna an inpêkna thukziate hi, entawntlak a tling hle zawk a.

Zoram hi thu hriltute tân chuan khawvela ram nuam ber, duhsak leh ngaihsak tinreng an hlawhna ram a ni a. Thu hriltu hlun zingah rethei leh pachhe tak an awm ngai meuh lo! Mahse, hei taka hi thu hriltu tam tak pen bo chhan, rawngbawlna kumhlun an neih theih loh chhan a ni lawi si. Chuvang tak chuan rawngbawltu tam tak lo kal sual tawhna lamtluangah, kan Ministry-te hian ke an pen ve palh chuan a pawi dâwn êm mai tiin fimkhur a ngaihzia thu kan han tar lang zawk a ni e. 

- Lalremliana Pachuau