CYMA Football leh lawmman
Central YMA Football 2025 chu khelh zawh a ni ta a, inkhel lam chu ka chem kalna lam a nih loh avangin sawi vak tur pawh ka hre lo. Mahse, Vanglaini aṭangin lawmman zat te ka lo bih ve a, champion team Republic Vengin cheng nuai khat chauh an dawng erawh a tlem lam hret chuan ka hria.
Team pakhat senso han chhut ta ila. Team khatah player 25 bakah coaching staff panga an awm thei a, an vaiin 30 a ni. Chutihrualin mi 20 ang velin han chawk rual ta ila. Jersey man hi a tlawm lamin chhut ta ila, Rs 500 vel a ni thei ang. Player 20-ah chuan Rs 10,000 a kal nghal a, coaching staff kawr tur nen chuan Rs 12,000 vel chu kal tura ngaih a ni. Player inthuamna atan a tlawm lama chhutin Rs 14,000 chu a ni tawh hrim hrim.
Branch YMA inelna a ni a, tlawmngai turin player-te ngai ta ila a, player enkawlna senso-ah branch YMA-in senso a nei lo thei ang. Mahse, player erawhin ground panna atana an petrol hman leh thil dang neuh neuhah an inseng nual thung ang.
Inkhelh niah erawh Branch YMA team hi an seng hnem leh hret ang a, tui man leh thil dang neuh neuh chhutin mi pakhatah Rs 100 ang zelin chhut ta ila. Mi 20 anga chhut chuan inkhelh niah Rs 4000 vel an hmang dawn tihna a ni.
First round aṭanga final thleng khel tur chuan match riat an khelh a ngai a, Rs 32,000 vel an hmang ang. Team khatin a tlawm thei ang bera an sum senso tur chu Rs 46,000 vel a ni dawn a, hetah training-na tura ground hawh man te chhiar tel a ni lo zawk.
Sum hman zat tlem uchuaka chhut pawhin lawmman chanve chu senso atan hman a ni tho tho. Chutihrualin thil chiang tak erawh, hetiang zat lek sum hmang chu an champion kherin a rinawm loh.
CYMA Football atana lawmman hi inelna inbuatsaihna atana zângnadawmna ang lek anga sawi theih lek a ni a, Mizote World Cup hming puttir ve meuh atan chuan a bei tham hle. Champion thei chin chuan an chawi belh dawn a, an duh ber nomawi leh hming ṭhat a tih theih ang.
Lawmman chungchang hian CYMA lam pawh an ngaihtuah chiang lo. Quiz inelna an buatsaih turah pawh lawmman nuai khat tho a ni a, lengkhawm inelna hnuhnung pahnihah pawh nuai khat tho lawmman a ni.
LPS Youth Icon 2024-ah khan Lalsangliana khan nuai hnih leh trophy bakah Suzuki Burgman leh Bosch Washing Machine te a dawng a, tun ṭuma champion Republic Veng aiin a dawng tam daih.
Republic Veng football team hian lawmman dawn tam lamah chuan an veng nula Jennifer Lalrinzuali Renthlei pawh a ntluk lo. Miss Mizoram 2024 Jennifer khan nuai hnih bakah Vespa scooter a dawng.
Tehfung hrang hrang a awm thei ang a, sum aṭanga teh tur a nih chuan CYMA Football champion chu LPS Youth Icon leh Miss Mizoram aiin a hlu lo zawk. Mahse, Vanglaini-a a inziah danin CYMA final-a inkhel entu zat kha kha mi 10,000 chuang a ni a, a hmuna entu aṭanga teh chuan CYMA Football champion chu a hlu ber thung ang.
- Lalzahawma