Pafa 3-in kutdawh pawisa an pe lai ka hmu

Tunhma chuan College Veng pawh khu Venghlui vek a ni thin. Veng hrang hrang atanga Pachhunga College kalte kha Treasury square atanga ke hlira an kal thin lai khan, fiamthua thu tak angreng an sawi thin chu- Pachhunga College naupangten nitin lawmna an nei ziah, Venghlui chho zawng zawng hah taka an kal hnua Treasury an thlen hian an lawm em em thin a ni, an ti thin. A dik a ni. Tuna Venghlui mawnga kan awmna atanga treasury kal thleng tur hian lirtheiah ka chuang ngai meuh lo. Ka tlangval lai atanga kea kal nuam ti mi ka ni. Tun thleng hian a theih chen chenah kea kal ka la duh. Mahse, ka thei vek bik tawh lo. Tunah zet chuan Venghlui dung suartluan tur chuan hah thikula beih fet a ngai ve ta. Mahse, treasury ka'n thlen meuh hi chuan, tunhma PUC zirlaite angin ka thaw ve huai thin. Ka kal hah chhawlhal chuan, ka taxi chuan man aiin theitui vawt ka in thin a, a la bang chu Kutdawh ka pe thin. Chutia ka tih chuan kal hah man awm riauvin ka hriaa, nuam ka ti thin a ni. Mahse, chutiang chuan ka ti ziah bik kher lo.

Thu ril leh thil ropui sawi tur hre ve ta lo chuan, Peterate angin, thil ropui leh tha nia kan hriat ve chhun, thil ho te te te hi sawi lovin ka awm thei thin lo a ni. He Khawvel chhe tawh tak kara mi rilru hrisel, Pathian tihmi, piangthar dik takte nunphung leh an chezia, an thil tih leh an nungchang ka hmuh hian ka lawm thina, puanzar ka chak thin a ni. Chu bakah, kan ramah hian mi rilru hrisel leh chhungkaw dik an lo la awm zel a ni tih hriat hian min tithlamuang leh thin a, chutiang chhungkua atanga naupang lo seilian turte hian beiseina thar min siam leh thin a ni. Sawisel ngai kan insawiselna karah hian, infak tawn te hi ching thin bawk ila, kan ram tan eng a lo zau zel anga, Isua duh zawng a ni bawk si a. Kei pawhin thil tha lo leh mi dik lo, rilru hrisel lote tim miah lova Chanchinbu lama ka sawisel hmiah hmiah karah hian, mi dik leh rilru hriselte chu chawplehchilhin ka rawn fak fo tho thin hi. Huat tur dik leh ngaihnep tur dik leh, fak tur dik leh ngaihsan tur dik kan hriat zel theih nan fak tlak chu ka fak zel dawn a ni.

Ni 7.6.2025 zingkara Aizawl Bazarpuia ka bazar zo haw phei chuan, cheng 10 note hlui lam hi Kutdawh pek turin ka kawr ipteah ka dah a. Zing dar 7.10 vela Zodin cinema hall bula Kutdawh bul ka thlen chuan, ka rilruah, ' a.. hepa chu ka pe zing tawh, tuntum chu pe lo mai ang' ti rilru chunga ka kal pelh rual chiah chuan, Kutdawh bulah chuan Scooty MZ 02.C.3877 a rawn ding a, a khalhtu an Pa chuan a fapate 2, kum 5/6 mi awm velte hnenah chuan, " Zuk pe rawh u le" a ti a, naupang te te te chuan phur takin Kutdawh chu pawisa an pe ta a ni.

Kei chu ka mur chum chum a, ka zak ta em em a, inthiam lohna hlirin ka khat a, Pathian lakah ka zak em em a ni. Mahse, ka kal lui thova, thui erawh ka kal ngam lo. Bible-in, " Mi a thil tih chunga thiam loh inchantir lo chu a eng a thawl a ni. Nimahsela, engpawh rinna tel lova tih chu sual a ni" a tih kha ka rilruah a lo lang nghal a, ka thil tihah khan thiam ka inchantir lova, sual a ni. Ka let leh ta a, cheng sawm note hlui pawh chu pe ngam tawh lovin, ka wallet ami cheng 20 note thar ber chu ka pe ta a ni. Ka thawveng hawk a, cheng sawm note, chutah pawh a hlui tawh lehnghal pawh ka pek duh lohna thinlung, 'Tisa thil tih' chu Thlarauvin ka tihlum leh nghal ta a ni.

Hemite pafa ang hi midang pawh an awm ang. Khawlaia naupang hruaia kalten Kutdawh an hmuh remchanna hmuna naupang hnena Kutdawh pawisa an pektir lai ka hmu zeuh zeuh tawh, ropui ka ti thin hle. Mahse, hemi tuka ka hmuh pafate hi chuan, la zing tak, mi veivak pawh an la awm meuh loh laiin, Kutdawh pawisa pe tur liau liaua lo chhuak an ang tlat. Naupang khan an kutah pawisa an rawn humsa tlat a ni. In lam atanga anmahni chhunglama tirtu Thlarauthianghlim hna thawh ngei nia ka rin avangin ropui ka ti a, ka puangzar lo thei lo a ni. Anmahni chuan ka lo hmu reng tih pawh an hre lo ang. Hetiang deuh bawk hian hmanah pawh, Aizawl North College zirlai la naupang deuh mipa pahnih, titi bawrh bawrh chunga ka hmaa kalte zinga pakhat zawk chuan, a thianpa leh midang tumahin an hmuh loh theih dan ber tura Kutdawh hnena pawisa a thlak ru zauh lai ka hmu tawh. Ka va um phaa, Pathianthute nen lawmthu ka hrilh ve nual a, Chanchinbuah pawh ka ziak nghe nghe a ni.He tlangval pawh hi midang leh kan ram tan malsawmna lo ni zel se la, Pathian tihmi lo ni zel rawh se.

Kutdawh kan tanpui emaw, tu chungah pawh leh, eng thilah pawh, mahni inchhungkhur ngeiah pawh thil tha ti nia kan inhriatte kan chhuang lutuk thin hian buaina min thlen zawk fo a ni. Thenkhat chuan Kutdawh pawisa an pe turte hi an han hawikuala, miin an hmu lo ang tih hlau awm takin an khawsa thin. Chutiang mite chuan pe lo law law se an tan a tha zawk ang. Pathian hmuhah an pek hma aiin an sual zawk a ni. Eng kawngah pawh kan thil tha tihte kan chhuan lutuka chapopui nana kan hman hian, Pathian kan ti lawm lova, kan thil pek leh kan thil tih kha tu hnenah mah leh, tu thinlungah mah a nung lova, a petu leh a peka tan nung taka hlawkna engmah a awm lo. Kan mize tarlanna a ni a, mite ngei kan hlawhna mai mai a ni. Bible-in, " I kut dinglamin a tih chu i kut veilamin hre suh se, " a tihte, mi thenkhatin an thil tih that nia an hriat midang leh mipui hmaa tarlan, tihlar leh miin an hre lo ang tih an hlauh lutuk thin avangin, " Chu'ng mite chuan leiah an lawmman an la tawh" a tihte hi hre reng ila.

Aw le, eng thil pawh kan tihah leh, eng thil tha pawh, mite tanpui leh midang tana thil tha tur nia kan hriat kan tih reng rengte hi, Pathian atanga chhuak, Pathian tihna atanga tih, Thlarauthianghlim tihtir ngei ni zel sela, tu hnenah pawh nung takin hna a thawk ang a, engkimah malsawmna a lo ni zel dawn nia. Hemite pafa thil tih pawh hi chhunglam dik atanga lo chhuak ni lo se, kei hian an hriat miah lohvin ka lo chawimawi daih lovang. An chhungkuain midang tan leh kan ram tan malsawmna lo ni zel se la, Pathian tih chhungkua lo ni zel rawh se. " In thil tha tihte chu mi hriat lohvin a rukin ti thin rawh u. In Pa Vana mi chuan a hmu reng si a."

- K Hmingthankaia