Mizo nu thlaphâng au aw

Hmelmate chuan ṭhalaite rawn bitumin an vehthlem a, Hmuh theih ral thuam keng si lovin, khaw tin leh veng tinte an fang vel a, Luh ngam lohna in an nei reng reng lo. Ṭhalai leh Rawltharte an duh duha an thunun theihte chu, mi a ang maiin an awm a, an thi zawih zawih mai a ni. Mi tam tak an hliam a, eng mah thawk thei lovin an ṭhu nghek nghuk mai bawk a. He thil rapthlak tak hi a hmuhin nu pakhat Mizo nu ngei mai Lalsangzuali Sailo chu mangang leh thlaphang takin a au chhuak a, Ani lah hmeichhe awm nem mai a nih avangin tih theih a nei tlem si a. Tu mah a au harh zo lo ni tur a ni. A hmuh hmelmate do turin, eng pawl mahin thapui thawha beihpui thlak an awm lo. Hmelmate chuan hma an sawn duai duai a, kan ram an tuam chhuak rang ngei mai, Lalsangzualite In chhung ngei pawh an luh chilh em ni dawn le?. Heti taka hmelmate chet dan leh hnathawh dan a hmuh chian leh a hriat chian dan aṭang hian:- "Setana dawihlo kan ram hmelma lian, Dawi bur kengin aw a vak vel ruai a," tiin a sawi ṭan a, "kan ram hmelma lian," a ti a ni. He hmelma hi eng ang hmelma nge ni le?. Mite chuan a sawi hi hmelmaah an ngaihpui ve lo em ni ang?.

Rokunga'n " "Doral hlau reng renga ramṭuan ni lenna," a tiha doral ang em em chuan an hlau lo a ni mahna, Mahse, a doral sawi chuan "Ṭhalai hmel mawite tihmel hem zotu, Zofa dawn tuai a man, a rapthlak e," a ti tlawk tlawk mai si a. A hlau ngang ni tur a ni. Fiah tak maiin,:- "A tur a na e, zung zam a fan zo, Rawlthar dawntuaite a dawi a mek che, Nangma tan a pawi lua, I dawn chiang lo a ni," tiin a sawi a, Chutah Mizo ṭhalaite chu fuih zui nghalin, 'Aw, Mizo tlangval, fam khua i lawi dawn e, Sim rawh, ban san la, ruihhlo i hmelma a ni. Aw, ṭang fan fan." a ti vawng vawng mai a ni.

Hmelma a tih chu a van sawi chiang tak em, kan ram runtu hmelma chu, Hmelma hlauhawm tak niin a hre tlat a, " Hei ngei hi maw lo ni, min chimral mektu," tiin kan hnam min chimral theitu hmelma a ni, a tihial a nih chu, A sawi awmzia ka hre thiam lo, a tih chi ta miah lo mai le. Tichuan, duhthawh takin, tihian a sawi zui nghal a, "Sakruang kimtlang mawi, thisen zungzam nen, An chiu chhe zo maw, mi a an chang ta, Thlanmual leh hremhmun panin an tlan mek e." a tizui hial a. He hmelma doral lian hi beih pui turin mite a sawm a, "Harhin ṭangin tho r'u, i bei let ang" tiin, Nimahsela. Sawrkar emaw Kohhran emaw pawh a au harh zo lo em ni ang,? A hmeichhiatpui MHIP pawhin amah angin an hlauhpui lo a ni mai thei a ni. Bei lettu an awm thawm hriat a ni lo va, Chung ang dinhmunah chuan Lalsangzuali hi ding mah se, zam mai a tum lo, Kan ram leh hnam dinhmun a hmuh dan chu, Zep nei miah lovin tihian a sawi ta zel a, "Chhungkua a dam lo, khawtlang a dam lo, Hnam pum a dam lo, kan ral zel ni tin, Kan hmelma doral a huangtau lua e, Ṭhian chhan thih ngam Mizo fa thawh a hun e." tiin.

Nimahsela, Mizote chu thluaka sum lut natna vei an tam avangin an hmelma ruihhlo chu hlauh ahnekin sumdawn nan an duh a, han dopui duh hmel reng reng a hmu si lo. Ṭhian chhan thih ngam hnam inti ṭhinte khan, "Sum ngah ngah hmelṭha an ti zo ta a, Hnam boral nih pawisa lo a, mi mala sum ngah nih duh zawk an tam ta a ni ngei ang. Ruihhloa sum dawng a, sum ngaihte pawh, khawtlangah leh kohhranah endawng leh hnualsuat loin miten an zahin an tlawn luai luai si a, Nimahsela, Lalsangzuali chuan, khawi veng leh khuate angin emaw ruihhlo zuarte a tlawnin a hlau ve lo va, thinrim takin, hlauhna nei miah loin a hau ta piap piap mai a. 'Ruihhlo zuartu, aw, lo ngaithla lul teh, Chung khuanu leng leh zaleng i bum lo, Kan ram kan hnam hmelma i lo ni nang ngei kha, Ei zawnna dang dap la, i hlim zawk ang," tiin.

Kan ram leh hnam hmelma nia a hriat dona kawngah chuan a huisen khawp mai, Tute angin emaw lal duh vang ringawtin ram leh hnam a hmangaih ve lo a, Ruihhlo zuara hausate a hlau ve hek lo. Nimahsela, mihringte hian Pathian tel lo chuan tih theih hi kan nei tlem a ni tih hre chiang em emtu he Mizo nu hian, ruihhlo bawia tangte an chhuah theihna pawh, Pathian ṭanpuina a pawimawh tih a hre chiang em em bawk a, Pathiana tlukluh mai loh chu tihtheih dang a nei lo tih hriain, a tawpah chuan, tihian a ṭawngṭai ta a. "Aw Lalpa, ruihhlo ngaite, a zuarte hi, I hmangaih leh khawngaihna thu han hriattir ta che, An thinlung khauh luhlul tak hi, I Thlarau Thianghlimin luah khat la, Sim thei turin ṭanpui ang che. Amen. tiin. Lalsangzuali Sailo hi kan ram leh hnam tan chuan, a van ropuiin a va hlu tak em, Kan ram leh hnam hian theihnghilh theih a ni tawh dawn em ni le?

- Hausanga Hauzel