Dawi, ai leh khawhring an la awm em?
Tunlai Kristian era-ah hi chuan tu fa mah hian dâwi leh âi tih leh khawhring tih vêl hi a awm kan ring lêm lo a ang ṭhin ka ti. Mizoram angah ngat phei chuan khawhring han tih hian hmânlai thilah kan ngâi nghâl ringawt zêl a, kan la hre tam tâwk lo a ni chêk ang chu.
Kei erawh Pathian khawngaihna zârah dàwi leh âi leh khaw-hring beih tuarin ka la awm ngâi lo va; amaherawhchu, ka chhehvêla mite leh
ṭhian ṭhenkhatte heti ang lam tuar ka hmu ta fo mai hi a mak ka tiin hrehawm ka ti vè ṭhin.
Khawhring pawh sawi tur a awm. Khaw-hring hi khûng Manipur, Burma, Meghalaya, Assam, Nagaland, adt-ah khuan a la tamin a la lâr vet vet hlé. Khaw-hring lam pang hi sawi tur ka ngah ang reng a, a sei lutuk dâwn a; sawi vek lo mai i la. An hnathawh dân leh a lan chhuah dân pawh sei vek sen a ni lo e.
Sawi tur a tam, kan sawi sêng lo vang. Hêng khawhring, dâwi leh âi te hi tunlai ṭhangtharte hian thawnthu mai maiah kan lo ngâi palh ang tih ka hlau a. Thawnthu mai ni lo, a tak tak tunlai hun thlenga la awm a ni tih kan hriat a ṭul.
Insawiṭhaihna lam ni lo se la, Kristian ram kan ni a, ringtute tân a hlauhawm ve lo, Mizoramah chute ang thil eng mah a awm ve lo tih ngawt tur a ni lo. Mizoramah ngêi pawh dâwi leh âi châwi, khawhring nêi tam tak kan awm ang; hmânlai anga a lang a pauva mi seh leh tihnat erawh an tum lo a. Mahse, sehna hun remchâng: damloh hun, chauh hun te an zawng reng a nia.
Kristian ram inti mah i langin, kan kristian dân hi ramhuaite hlauh tur chi kan ni lo mi tam tak ringtu zia en hian. Ramhuaite hlauh ringtu ?ha tak hi chu kan tlêm hlé tih a lang bawk. Tin, hêng dâwi âi châwi leh khawhringte hi Pastor narân, pui-thiam nazawng leh rawngbawltu nazawngin an hnawt chhuakin a ngam kher lo bawk.
A nih leh nang, ramhuai te, dâwi leh ai te leh khawhring te hlauh rawn ringtu
ṭha, Isua zuitu i ni ngei em? I ni lo a nih chuan insiam ṭha la, chuti lo zawngin engtik niah emaw chuan hêng thil bawlhhlawhte hian an hneh hun che a lo la thleng ngei ang.
Ramhuai tihbuai te, dâwi ai tihbuai leh khawhring tihbuai te enkawl tura phai lam leh vairam kan pan duh zel hian a entir pakhat chu: Mizoram Kristianna hi a lo va rin tlâk tak tak tawh lo êm tih hi a ni. Mi zawng zawng sawina erawh a ni lo, a tam zawkte hi chu ringtu ṭha kan ni lo chiang mai.
- Kamliana Lhouvum