SOCIAL MEDIA HMAN THIAM I ZIR ANG U
"Have more than you show, say less than you know". - William Shakespeare
Smart phone a lo chhuak a, Internet khawvel chu kan kutah kan hum ta reng mai a. Social media platform hrang hrang he smart phone-ah hian an rawn bilh tel a, mihring smart pangngai chuan an hmang thiam nghal mai laiin mihring smart lem lo rual bawkin he social media platforms–WhatsApp, Facebook, Instagram etc te hi kan hmang thiam lo a, hengho hi mihring hman leh awm awl hlei hlei an ni mai si a. An awm awl luat avangin an duh loh deuh deuh thil an dam chhunga ser reh thei tawh lo pawi chu anmahni ngeiin an khawih ta ṭhin a ni. ṭhenkhatin saruak thlalak leh mipat hmeichhiatna hmang laite kan live a, ṭhenkhatin kan saruak thlalakte kan zuar thul, ṭhenkhat thung erawh chuan mahni engmah ni uk si loa, political party hruaitu hrang hrang mimal nun zeldin thu bawl nen chawm kawpin nileng zankhuain kan rak pui anih hi.
ṭhenkhat thung erawh chuan midang nun tih ral khel tumin ṭawng dang English, Hindi etc a thu maksak leh insawiṭhaihna lam thil ziak apiang a dik leh dik lo pawh ngaihtuah hauh loin, phelh leh phuai deuh phengphungin Mizo ṭawngin kan letling a. Kristian sakhua pawi sawina lam thu anih ngat phei chuan mi thiam leh degree nei ṭha pui puite hi a khar chhawng (forward) taima an la ni ta nghe nghe a. Hetiang thilte hi rilru zim tak kan put avang leh India ramah hian enhran bik nia kan inzirtir tlat rah a ni. India ram sorkar hotute rilru put hmang nia kan suangtuah chhe lutuk ang hian a tak takin thla hnih khat lek pawh kan chungah hian han awm ngat se, nuam kan ti na maw chu?
Heng bakah hian politics lam sawihona group hrang hrang siam an awm a, chu group chu a lun chur chur hle mai. Mahse, heng group ti luntute zingah hian Mizoram nghahfak mi thiam leh hriatna nei ṭha future politician han tih tur ang hi pakhat te mah an awm lo ti ila kan ti sual thui lutuk lo turah ngai ila. Social media-a political party ṭan lam neia mahni party ni lo leh mahni party hruaitu ni lo chu ar-a chuk tui lo khawpin nileng zan khuaa ṭawngkam hriam leh chhe tak tak hmang bei kual rengte hi han bel chiang deuh ila, an awmna political party-ah pawh nihna fumfe nei lo leh pektlak lem loh, an ṭan party an sorkar pawha party office vela tirhkah leh therhlo chhe te te hmanga fuihpawrh theih level hi an ni reng lo ang tih tunge sawi thei?
Chuvangin Mizoram mipui nawlpui tana thil ṭangkai leh sawtpui tur sawi tur social media-ah hian kan hria anih loh chuan ngawih hi i chuh teh ang u.
Prime Minister ropui leh rorum Indira Gandhi khan, ṭawng tlem la, thawk tam rawh (work more talk less) tih kha India ram politician-te leh mipuite hnena a thu chah nung reng tur a ni.
Social media platforms a awm hnu hian nileng zankhua a rak reng mai kan tam ta hle a, rilru fim leh ṭawngkam ṭhain a lo daih seng bik lo a, mi dang thinlung kan hliam pheng phung a nih hi.
William Shakespeare-a thu sawi, "Have more than you show, say less than you know," ( I pho chhuah aia tam nei la, i hriat aia tlem sawi ang che) a tih letling chiah hian keini Mizo tam takte hi kan khawsa ta mai em ni ang?
~ Huna Kawlvawm