LEILUNG CHHIATNA THLEN THEITUTE LEH RUAHTUI KHAWL I NGAIHVEN ANG U
Kan Missionary hmasa Pu Buangate'n Thawnthu hlui chu min hrilh rawh tih hlaa 'Chu thu chu min hrilh fo rawh...min hrilh nawn fo loh chuanin a bo leh thuai ang e' a tih ang deuh khan, Aizawla chhiatna thleng ṭhin ṭhenkhat hi eng vangin nge ni? tih leh, heti khawpa ruahtui tlak tamna rama awm si, tuia kan harsa tlat hi mi tam tak mak tih a nih thute hi kan inhrilh nawn fo a ngai dawn a ni.
CHHIATNA THLENG ṬHIN HI ENG VANG NGE?
A chhan ber chu ni lo mah se, a chhan zinga mi ni ṭhinte:
1. Tui luankawr mumal loh vang: Cyclone Shakti avanga tunhnaiah Aizawl hmun hrang hranga leimin kha ngun taka kan en chuan, tui luankawr (drain) mumal loh vang a tam hle a ni. Aizawlah hian step leh kawng chu kan nei ṭha thawkhat viau tawh a, kan tui luankawr (drain) erawh a la beitham hle, kan neih chhun pawh a te deuh bawk niin a lang. Step leh kawng kan ngaih pawimawh ang hian tui luankawr kan ngaih pawimawh a hun viau tawh niin a lang. Tui luankawr kan neih angte tihfai ṭhat hi ngaih pawimawh a ṭul em em bawk.
2. Vawk In vang: AMC chuan ni 15 January 2024 aṭang khan ‘Vawk khuahkhirh’ Aizawlah a kalpui ṭan a. Chhiatna thleng ṭhin ṭhenkhat ngaihtuah chuan a lawmawm hle. Vawk in hnuai hi a huh deuh reng a, chu chuan lei kha a hreuh a, a lo rei deuh phei chuan a hláwm (block) in a tla hlawk mai ṭhin a ni. Tin, mi ṭhenkhat sawi danin vawk in bul hnaiah hian Sazu hi an awm duh em em a, chu'ngte chuan kua an hreuh a, chu'ng kuaah chuan tuite lutin, khua reiah lei a min duh em em bawk niin an sawi bawk.
3. Ek In vang: Aizawl lemin tam tak hi Soak Pit aṭanga leia tui lut vang a nih thu Directorate of Geology & Mining record ah a lang. Mumal zawka kan Septic Tank leh Soak Pit-te pawh hi kan chinfel a hun ta. An record loh pawh hi Geologist-te report tam takah hmuh tur a awm bawk.
4. Tuidawn mumal loh vang: Aizawl lei minna bulhnai in ṭhenkhat hi en ila, tui dawn a awm mumal lo fo mai. Tuidawn kan siam hian tui luang ral mai mai tur kan khawl bak piah lamah, leimin siamtu kan veng nghal a lo ni.
5. Lei laih fimkhur loh vang: Hmunhma kan tih danglam dawnin mi thiamte ngaihdan ni lova, keimahni ngaihdan leh duh dana kan laih (sawisak) avang hian chhiatna a thleng nasa hle bawk.
6. Inthlahdah/Ngaihthah vang: Lei/lung lam pawh hi natna ang deuh hi a ni a. A tira sum tlem té hmanga siamṭhat mai theih hi, a lo rei chuan sum tam tak sen a ngai tawh ṭhin a ni. Lei kan lai vak a, tinghet (reinforce) leh nghal mai lovin hun rei tak kan dah vung vung ṭhin. Lirnghing chhe té lo thleng vang emaw, ruah a lo surin emaw a min mai ṭhin. Lei hi a min laklawh tawh chuan tihngheh leh a har ṭalh tawh ṭhin a ni.
RUAHTUI KHAWL I NGAIHVEN ANG U
State Meteorological Centre, Directorate of Science and Technology, Government of Mizoramin a tarlan danin, kum khat chhungin Aizawl khawipuiah hian square metre 1-ah ruahtui liter 2,000 vel tla ang a ni. A feet zawngin han sawi ta ila, Feet 12x12-a zauah hian ruahtui liter 50,000 aṭanga 60,000 bawr vel tla ang a nih ber chu. Heti khawpa ruahtui tlak tamna hmuna awm si, eng emaw harsatna avanga tui pump theih loh leh khaihlak hlek chang a, Aizawl khawpui tuia kan buai ṭhin hi a dik lo deuh em aw? Mi puitling, mawhphurhna hria awmkhawmna hmun kan ni bawk a. Hemi lamah hian ngaihtuahna i séng teh ang u. Ruahtui van tla kan dawn kum tin hi alo thlawna luan raltir mai mai lovin khàwla dahṭhat dan; chhung tin leh in tin hian i ngaihtuah ang u khai.
TU MAWHPHURHNA NGE?
Kan sawi zawng zawngte hi tu emaw tih tur leh mawhphurhna bik a ni lo va, kan zavai (sorkar, vantlang, chhungkua leh mimal tin) tih tur niin alang. Chapona lam zawng ni lovin, 'Keimah lo hi chu Aizawl khawpui siam ṭha tur hi an awm chuang lo ve' tih ngaihdan kan neihte hi a hun tawh em aw?
~ Jessy J. Laltlanzauva, Geologist