Ram dang leh hnam dang mite

Social media-ah hian khua leh veng ṭhenkhatah raltlante an veng/khuaah sumdawn/dawr hawn phal loh tih an puang ṭhin hi sorkar dan ang tak chuan phal a ni lo a ni mai thei.

Ka lo ngaihtuah ve ṭhin chu, kan rama raltlan, Myanmar, Manipur etc aṭanga rawn lutte hi kan Zo hnahthlakpui, kan Kristianpui, thlahtu lama kan u leh naute an ni a. Kan rama Mosolman, Evi leh Adama aṭang tih loh chu eng lai maha kan u leh naute, ringtupui an ni lo tawp a. Heng mite sumdawn thiam em em, kan ram zawi zawia min chim pil mektute mah kan ngaimawh loh a, kan u leh naute ngei, an duh vang pawh ni lo, an ram namenloa a buai vanga loh theih loha kan rama sahimna zawnga rawn lutte lo huphurh em em hi a ṭha em maw ni dawn le tih ka ngaihtuah fo. Ei leh bar an zawn ve a ngai a, rilṭama thih an duh a nih ngawt si loh chuan. Amaherawhchu, raltlan an ni emaw, ni lo emaw, vai pawh ni se, khawtlang duh loh chi ruih theih thilte an zuar a nih erawh chuan khauh takin dodal ila, an sumdawn zel phal loin an dawr hial kharsak ila.

Chuti a nih si loh a, thianghlim taka kan Kristianpui, kan u leh naute ei zawn nan ṭha taka an sumdawnte khap leh dodal hi a ṭha ber ang em, Pathian duh dan pawh a ni ang em tihte hi ka rilrua awm ṭhin a ni.

Meghalaya-ah Khasi hoin anmahni sumdawnna a chim pil zo deuhthawtu Maruari, vaite do ngam si loa an tlangmipui, Kristianpui, Mizo leh Naga hote an cho ngam tawk an huphurh em em ṭhin khu kan ang riaua hriatnate ka nei.

Bible-ah pawh kan rama ram dang mite chu tiduhdah lo tur leh dan ang khat hmanga inenkawl tur kan nih thu a inziak si a (Exodus 2:22 etc). Chuvangin, kan rama vai min chimral mektute hnawk ti mang si lo a, raltlan, kan Zo hnahthlakpui Kristiante laka ka huatthu kan tichhe viau mai hi kan tih tur pawh a ni ang em aw! Amaherawhchu, ka sawi tak angin drugs an lo zuar ru ṭhinte a nih erawh chuan action na takin la ila.

Veng pakhata Myanmar sumdawng ho inhmuh khawmnaa an thusawi ka hriat pakhat chu, Mizoram mi dawrkaite’n an huatna chhan pakhat chu, an tihtlawm theih ṭhin vang niin an sawi a. An sawihonaah chuan, Mizoram mite ang bawkin zuar to ve mai ila, kan lakna a tlâwm a, kan hlawk ting a ni mai tiin an sawi a ni awm e.

Kan rama sumdawng ho hian vawi leh khata hlawk thûr thûr an duh lutuk avangin lndia rama thil man tona ber state kan nih phah a, anni tih ang hian intihtlawmsiak ila, an hralh tam na nâ nâ chuan a tawpah an hlep tam mai ang. Chu chu kan rama hnam dang sumdawngte tih dan a ni a, kan tluk lohna a ni.

Kan hriat angin, khawchhak lam aṭangin kan ramah ruih theih thil ṭha lo tak kan ramah a hluar phah a ni tih chu mi zawng zawng hriat a ni a. He thil hi kan zavaia thuneitute nen ṭangruala kan do tlan a pawimawh a ni. Do tlang turin Burma mite pawh sawm ila, min puih duh loh erawh chuan sawrkarin a tih dan tur a hre mai turah ka ngai a ni.

- Prof. Chawngsailova