Pu LALTHANGFALA SAILO – KUM 92 (Ka ṭhianpa mak, ropui leh chhuanawm)
Ṭhangthar zelah a hming leh a chanchin sawi tawp ni a awm lo ang. Lâr khelh nan ka ṭhianpa ka ti ve ngawt lo. Ngai mah the, Govt. Mizo High School-ah pawl 7 aṭanga pawl 10 (Matric) pass thlenga kaiho kan ni. Ani Sailo lal fapa matric chung lamah bahlah loin a kal tluang a; kei 1963-a ka graduate ve meuh kha chuan college-ah zirtirtu a lo ni hman tawh. A nupui Pi Lalhrimi pawh Sailo lal fanu a ni a, kei hnuvai rama Kâwl-ek-thai ve khan BA (third year leh fouth year) Pachhunga College-ah ka zirpui ve hman a, kan BA rual ta. Aizawl-Chaltlangah kan inṭhenawm zui leh ta zel bawk a. Kan ṭhian inpawl khat ho re-union pawh 2012 khan kan hmangho leh a, kan tlem sâwt ta hle!
Mite sawi tam loh thu kilkhawr ka sawi duh a ni. Mak ka ti ṭhin. A tumruhzia Sapṭawngin will – power, determination, perseverance, resilience leh devotion zawng zawngin a fûn kim sen loh amahah hian a infâwk khawm! Han inkawm hian rilru han sawi ila, ‘Aw’ a ti thei zel mai. A hetih vang hian thusawi thiam lo ve tak si hi Mizo Academy of Letters (MAL) President-ah ṭhangkhat liam zân (kum 25 chuang zet) a ni thei. America President chu kum 4 term vawi 2 bak an ni thei lo. Amah anga kan high school pawlpui Pu K. Malsawma pawh Mizoram Upa Pawl President a ni zâwn tluk tluk a. Dan siam ṭhat phah hial ngai khawpa hotu lu ber term bituk siam ngai zuk nia le! High school kal lai kha chuan average chunga lêng hret chauh an ni. Fala tiin ka sawi mai zel tawh ang. A ze dang mak bik tlemte chauh sawi ila.
Taksaa a tuarchhelzia leh a fei em emzia hi sawi hmaih chi a ni lo. Thi mai thei dinhmunah thla 6 vel zet a awm. 2024 December thla chawhnu lama Durtlang Hospital-a a awm lai khan ka duhsakna leh ka ṭawngṭaisak dan chu, dama lo chhuak a, an in lum ngeia Mas leh kumthar hmang turin a ni chauh! A fate’n a khua a har, be rawh an ti a, ka phone-in chutiang chuan ka sawi; a dan pangngaiin min bia. Biak rei chi a ni lo tih ka hria. Ina an inenkawl hnu khan vawi 2 aia tlem lo kan inbia, a ngai reng.
Zirna leh thiamna leh leadership a insiamsak chhoh zel dante hi asin mak ka tih chu. Heta chhuanawm ka tih chu, pawl 10 kan nih lai vel khan SANGI INLENG hi a drama ang chiah lo hian MZP Magazine-ah a tichhuakin ka hria; Assistant Editor ka ni a, Editor Pu KL Hnuna (RIP) a ni. Kei pawhin ‘Huan rama kel lut’ pawi a sawi lo e ka lo ti tawh. Khang hun lai aṭang khan thlir the, Calcutta-a college ṭha ber St. Xavier’s College aṭang daiha graduate, láwn sang ta tual tual Fala kha ka chhuang chho ve zel!
Padma Shree hi a phu hliah hliah. Natak Akademi Award a dawn a lawm ni khan Pu Laltluangliana Khiangte chuan Fala te chhungkuaah chuan MA degree nei mi 6 an chengho a ti daih tawh. Anmahni nupa, an fapa pahnih te nupa = 6 tunah phei chuan Ph.D pahnih monu an nei hial tawh. Ngaihnêp vang ni miah loin, award tumtlang, hraw pui pui a dawn zozaite hi – keini a pakhat tê chauh pawh dawng ve lo chuan a ropuizia leh a chhuanawmzia kan hre chiang khawp mai.
Nun tam nei an ni. Champhai College khi a hoa din a ni a, Principal hmasa ber a ni. Aizawl-a NEHU Campus-ah khan Deputy Registrar-in a awm reng tawh. Zing kara kea kal taima a ni a, ama ho hian K. Malsawma te, Vanlalduha Sailo te, HD Pachhunga te a huhoin an kal dial dial ṭhin kha mitthlaah a châm reng: Hmanlai a ni dêr ta!
Kohhranah mak takin Pathian awm ring lo anga sawi deuh tawh kha tihdanglam a ni a. Rei tak tual upa niin rawng a bawl ta a. A fanu pasal Rev. Lalhleia pawh kan Synod hnuaia Family Guidance and Counselling Course zir chhuak hmasa ber niin ka hria. Hmun hrang hrangah rawng an bawl mek zel.
Taksa, rilru, thlarau nun kawng kan zawhho dante pawh hi, ‘Ka ṭhianpa’ ka ti mek mek bawk a, tawitê sawi ve ṭhain ka hria. Delhi-a kan awm lai khan zu in ngai tawh lo chu Dr. Nghakliana te, Pu Lalchuangliana te ho khan kan phak ve tawk tein Delhi Mizo Inkhawm (DMI)-ah khan min kaihruai a, Committee Member-ah khan kan awm ve chhung zawng khan thlan ni vein, Chaltlang Kohhranah sande sikul zirtirtu leh thuhriltu-ah Fala te nen kan thawk a. Chaltlang South Kohhrana kan awm hnuin upa ang hialin Pathianni zan thuhriltute kan ni ho a, taksa awngrawp vangin kan châwl ve ve tawh a ni.
Duhsakna kan dawng tlang tam khawp mai. Fala nupui Pi Hrimi phei chu Bial Kohhran Hmeichhe hruaitu a la ni zel theiin ka hria. Ropuina ramah Fala chu thlamuangin châwl rawh se.
- F. Lalremsiama
Mb: 8415994340