Electric connection endik mek hi

Tunlai hian Power & Electricity department chuan electric connection an endik mek a. He endik hna thawh hian power supply a tihṭhat dawn mai bakah, sorkar sum heu ṭhin nasa takin a sukiang ngei dawnin a lang.

Hetianga endik hna hi hman hman aṭang khan lo thawk tawh se chu kan power leina leibâ ang chi pawh a awm lo deuh ang a, current awm lo tih pawh a khât deuh mahna! Uluk takin thawktute’n an endik se, ngaihhnathiamna awm loin, ngam bik leh ngam loh bik awm loin rualkhai takin endik se a duhawm khawp mai.

In kan sa a, kan power mamawh contracted load te, plug kan vuah duh zat engkim power supply an pek hmain an endik vek ṭhin a. Hun a lokal zel a, kan duh duhin plug kan vuah belh vak vak a, kan current load a tira mi aiin nasa takin a lo sang ta ṭhin a. Chuvang chuan Power department lam pawhin an rin phak bakin power supply an mamawh belh a, chu tak chu uluk taka endik a ngai ta a ni.

Electric connection an endik tawhnaah chuan electric meter kaltlang loa current lo pawh kawi te an hmu chhuak ta nual a; hetianga meter kaltlang lova pawh hi a dik thlawt lo. Hetianga a rûka thil tih avang hian kan transformer, hman nia min châwm zo ṭhin khan min châwm hneh ta lo a, a kan phah fo a, kan buai phah em em a ni. Hei pawh hi thawktute’n uluk tak leh ṭhahnemngai takin endik hna hi thawk teh se.

Meter kaltlang loa current an pawh tam zawk chu tui lumna leh meilum ai nana heater an hmang vak vakte chu a dik lo. An contracted load ang loa current hman ruk a tam avangin sorkar kal tawh zawng zawng aṭang khan sum hlohna nasa tak a ni. Sorkar pachhe em em hnuaiah hian mipuite pawhin dik takin kan tih tur kan tih a hun ve tawh. ZPM sorkara a changtu Minister hoa he hmalakna hi a ṭha thlawt a, huaisen takin han kalpui se. Mipui pawhin sorkara kan chawi ve tur dik tak kan chawi hreh loh a pawimawh.

Electric connec-tion enfiah ngai khawpa mipui kan awm hi Congress emaw, MNF emaw, ZPM emaw sorkar vang a ni lo, mipui nawlpui kan dik loh vang a ni. Chuvangin, political party anga inchirhthehna chi a ni lem lo e.

- Lalkhirhvela