Officers leh drivers

Tun hma, ât deuh lai khan officer ṭhenkhatin sawrkara an driver-te anmahni awmpui leh chhiahhlawh chhawra chhawr ching an awm ṭhin. Mahse, tunlai hi chuan mi kan lo changkang ta a, tu pawhin mahni tih tur leh tih loh tur, thil mawi leh mawi lo, tih âwm leh âwm lo hriat nachang kan lo hre ta hle a. Tin, mi tin hi thil sawisel lamah kan lo huai ta bawk a, driver-te leh an pu/pite inkar pawh hi a ṭha tain, office hour leh sawrkar duty piah lama inchhawr a awm ta meuh lo niin a lang.

Ât lai officer ang kha an la awm em tih hriat tumin May 2025 chhung khan sawrkar department pasarih office-a driver room-ah ka kal a, a ṭhen pawnah a fâlin ka kawm a, a ṭhen a huhoin, a ṭhen anmahni bika hruaitute uluk takin ka kâwm a ni. Hetia ka tih chhan chu, a hnuaia officer angte hi kan lo la awm takin ka ti a ni.

Officer â chuan:

1. Sawrkara a driver chuan mahni in lamah, a nupui fanaute leh chhungkuaah tunlai chhung tin zingkar buai em em ang hi nei vein, ama fate ngei pawh sikul kal tur buaipui ve a ngai ang tih haider luiin, a tu leh fate sikul kal thlah turin zing dar 7 velah a in turn-up tir ṭhin. Hei hian driver-te chhungkuaah manganna leh buaina tam tak thlenin, inhauhna leh thinurna tam tak a hring ṭhin.

2. Driver-te chu hlawh tlem zawk leh chhungkaw din tir leh khawsak harsa zawk an nih avangin, office chawlh huna tih tur tam tak hmachhawp an nei ve ang a, mihring ve tho an nih angin, an nupui fanau leh an chhungte nen tih tur leh kal duhna an lo nei ve ang tih hriatsak duh miah lova mahni hnaa chhawr ching an awm ṭhin.

3. Driver leh an chhungte’n sawrkar chawlh an lo hisâp, an lo thlakhlelh ve em em chu engmahlova chantirin, mahni in saknaah emaw, Aizawl pawna an huana zan riak hiala hruai daih ching an awm ṭhin.

4. Officer chu kohhran tênau deuha hotu lian a nih chuan, office hun piah lam, zing leh zan emaw, office kal loh ni apiang leh, Inrinni leh Pathianni hmanga kohhran thila Aizawl pawna zan riak hiala zin chhuahpui ching an awm a; Aizawl chhungah pawh mitthi râl leh kohhran thil leh, inkhawm hruai tur vela driver-te office hour lova chhawr ching an awm ṭhin.

5. Chungkaw inhmuh khawm leh chaw ei khawm hun, Sunday-a mahni thil hote tea driver koh bo daih ching an awm ṭhin.

6. Officer â chuan a driver chu a nghet lo a la nih avanga khawsak harsa an ni ang tih ngaihtuah a hnêka a nghet lo a nihna tak chu remchang leh vaukhâna hmang a, duh duha chhawr ching an awm ṭhin. Hetiang driver-te hi an khawngaihthlak tak zet. An pute an hnial chuan thlawn mai an hlau si a, nakina la ngheh ve beiseiin, harsa tak chung pawhin an pute thu chu hlau takin an zawm lo thei lo a ni.

Driver ka kawmte hi chuan khitiang officer khi chu an department-ah an awm tawh loh thu leh, felfai taka an awm thu leh, office hour bak an thawh ngai lo thu te, meeting leh eng emaw vanga haw tlai leh zin chânga haw tlai an neih thute min hrilh a ni. Kei pawhin chungte chu sawrkar hnain a ken tel vek alawm ka ti.

Mahse, ka driver kawmte hian officer sikul naupang inhruaitir ching an la awm zeuh zeuh thu leh, a nghet lova thawkte an zuam bik lutuk chu an ngaihmawh hle a, kei pawh uar taka sawi turin min ti a ni. Mahni fate leh chhungkua buaipui hman ve miah lova chhung tin buai hun lai, zingkara mi fate buaipui chu ṭha lo an ti hle.

Aw le, a chunga ka sawi tak officer â ang khi chu heng ka kawm tak driver-te awmna department ni lo, Mizoram sawrkar hnuaia khawi department emaw-ah hi chuan an lo la awm ngei niin a hriat a. Hetiang officer âte hian mi nun leh mi chhungkuaah buaina leh harsatna tam tak an thlen a, inhauhna, thinurna leh inmawhchhiat tawnnate mi chhungkuaah an thlen nasa a. Anmahni ngei thlavang pawh an tâwng nasa ṭhin tih hriain, mi chan mahni chana dah thiamin lo harh chhuak se tih vanga rawn ziak ka ni e.

Tin, khitiang officer leh driver ang khi an lo awm a nih a, he thu ziak avanga officer-in a driver chunga hlei a len a nih chuan, hei aia chiang zawkin ka rawn sawi leh ang.

- K. Hmingthankaia