Kan picnic dân hi

Picnic hi intihhlimna ṭha tak a ni a, Mizote pawhin kan uar ta hle. Kan hlâwkpuina langsar tak chu inkungkaihna leh inpawhna boruak ṭha hi a ni ngei ang. Hna hahthlâk tak tak, rim taka thawk tân hlei hlei a ṭha niin mithiamten an sawi a, engthawlna hun awm lo khawpa bur ngar ngar chu hna a hlâwk thei lo tihte hi a pawmawm khawp mai. Hetiang mite tân chuan picnic fo pawh a ṭul reng a ni.

Chhungkaw picnic te, ṭhianzaho picnic te, lehkha zirho class picnic te hi kan uar ta viau a. Whatsapp group khata awmho thlengin kan picnic zel a. Kan uar deuh deuh dawn ni pawhin a lang. Hnam fing apiangin chhungkaw picnic an uar, sum an khawl lâwk a, a khât tâwkin an picnic ṭhin nia sawi te pawh a dik ang. Mahse, hun kan hman dân erawh a inpersan viauin a rinawm.

Intihhlimna hmun Picnic spot pawh tunhnai mai aṭangin a pung hluai a, hmun nuam leh remchâng tak tak a ni hlawm. A hman man nei tan chuan harsatna a awm ta lo. Lui, tlâng, ramngaw, thingtlang khua thlengin hmun remchâng kan ngah. Ṭhâl favâng boruak nuamin min tuam dai leh ṭan ta bawk nên, kan 'zo-zia' intihhlim châkna a lo ṭhangharh leh ngei ang a. Kan picnic hlawm ngei ang; mah se, picnic dân kan thiam a ngai mang e.

Thil ṭha ni mahse, picnic hi kan hmang thiam lo fo. Zu leh ruih theih thil nêna hman ngei ngei tum kan ni fur awm a sin! Engatinge picnic-na hmunah kan intihbuai foṭ intihlim tura kal si, inhmel-hriat satliah pawh ni lo kan insual buai
ṭhin te hi ngaihtuahna tibuaitu a tling.

Picnic hlutna pakhat chu eiin hmanga inpawlna boruak ṭha hi a ni awm e. Mahse, kan man lo fo. Ei tur tuihnai tak tak siamin che tlâng dial dial ila mah ila, kan ei hma hauhin kan hlâwkpui tawh. Ka eia kan inho te hi picnic inpawhna boruak ṭha siamtu ber pakhat a ni a. Kan ruihbosan mai mai zel a, engmah loah kan chhuah fo, pawi tak a ni.

Tui chen hi intihhlimna ṭha tak a ni ang. Picnic Spot-ah pawh tuichenna hmun a awm deuh zel. Cheng thiam lo tan pawh khâwk rum rumin tuiin kan intheh vel thei a. Naupanlai tui chek nuam tihna a lo ṭhangharh a, puitling tân pawh ṭe hawm hawm a awl, kan ri teng tung zel. Mahse, mi rama him taka an hman theih hi kan nunna latu, hmangaihte chatuan atana min pawt ṭhentu a ni fo; a pawi ngawt mai. Ruih vang awm bawk mah se, tuichenna hmanraw ṭha neih loh vang leh tui chêng viltu kan awm lo ṭhin hi a ni pakhat ang.

Zu hi mipui hmaah kan chhawp dawn a nih chuan inkaihhruaina fel tak a awm ang a, khauh taka kenkawhzui a ṭul angin tui chenna (swimming pool) chhawp a nih dawn chuan himna (security) a awm tel tur a ni. Hnam fingte hlimna hmun hi kan ṭahna thlanmual a ni reng palh ang e.

Picnic hi inṭhianṭhatna thuk zawk, innelna ril zawk, inpawh lehzual nan a ṭha. Mahse, innel sate pawt ṭhentu a ni ve thei. Chuvangin, ṭhenkhatin damdawi an dampui ngei kha ṭhalai ṭhenkhat tân nunna pawt tawitu a lo ni reng ang hian ṭhenkhat tan picnic hi sâwt pui mahse
ṭhenkhat tan chuan chhiatna thlentu a lo ni palh thei. Chuvangin, hengte hi picnic dawnin inbuatsaih nân hmang thei ila a ṭha ang e.

1. Kan Picnic chhan kan hre chiang tur a ni. Boruak ṭha leh nuam siam chunga intisâwt tawn tur kan nih hre chunga picnic tur a ni ang. Mahni chauha picnic kan nih chuan thuhran ni se.

2. Zu leh ruih theih thil dang chu ken leh ruih loh tur. Kan duh phawt chuan picnic loh hun, ni dang atân khêk zawk ila. Kan intihhlimna boruak ṭha chu engmahin a tihchhiat kan phal tur a ni lo. Kan rui a nih chuan kan picnic puite hmel êng kan zah zo tawh lo tihna a ni a, an zînga tel fo tlâk kan ni lo tihna a ni.

3. Ei tur kan kente chu a huhoin siam ila, infiamna (game) kan tih pawhin a huho zelin ti tlâng dial dial ila, nuam kan ti ang. Picnic pui, midang theihnghilh ṭhaka nuam tawl duh chu pianpui finna takngial pawh hmang thiam lo kan ni ang. Picnic ho ni si, hun hman dân rualkhai lo chu vên tlat tur a ni ang.

4. Tui kan chêng duh a nih pawhin kan hman tlân hunah tui chen hun siamin a huhoin chên mai tur a ni. Lo tla fal bîk awm loh tur. A huho zelin ti ila, picnic hlawhtlinna chu a ni nghal ang. Tui tlâk pawh a awm lo nge nge ang.

5. Rui chunga engmah tih loh a him ber, tui chên ngat phei chu ruang nena haw a hnai tih hriat reng tur. Picnic lai na na na chuan rui lo hai loa hun hman ngei ngei tur a ni; ruih leh picnic a inrem lo.

6. Picnic laia inhauh, inhnial, insual tih vel pawh pumpelh ngei tur a ni. Kan inhau a nih chuan Kohhran rawngbawltu zu permit nei si ang deuh a ni a. Thil inhmeh lo, dodal tlat chi a ni. Pehhel tum tlat tur. I pehhel thei ngang lo a nih chuan rilru lam daktawr pan mai a ṭul ang.

7. Picnic hi fimkhur hle mah ila, vanduai theihna thil a tam. Motor accident, tui tlâk te pawh ruih vang kher loh pawhin a thleng fo. Chuvangin, himna kulhpui Pathian hnenah kal chhuah hmâin inhlân phawt a pawimawh. In haw thlen veleh lawmthu hrilh theihnghilh loh ni bawk se. A mawia Pathian biak mai mai tur a ni lo; thinlung takin biak ni se.

8. Kan picnic chhan chu kan hausak vang ni lo se, a nuam tih vang ngawt pawh ni suh se. Pathian ropui nan picnic ni se. A hnên aṭangin malsawmna tam tak kan dawng a; lawmthu sawi paha intihlim ni zawk rawh se.

9. A theih phei chuan picnic kal hoin pawisa remchan ang zelin thawhkhawm ila, SRS, YMA hnenah ruihhlo do nan emaw thil dang remchângah chhûng lut ila. Tichuan, picnic hmangin mi nunna kan pawtsei thei ang a, kan tu leh fate tân Zoram nuam leh hrisel kan siam thei ang. Mipui vantlang tana ram hrisel (welfare of the people) siamtu tur sawrkar berin a zuar ta si! Zu avanga kan hmangaihte mual liam phuk phuk hi a run thlâk em mai. Kan theihna apianga chet chhuah hi kan tihtur a ni ang.

Bible chuan, "Chutichuan, in ei pawhin, in in pawhin, in tih apiangah pawh, Pathian ropuina tur hlirin ti rawh u" (I Kor 10:31) a tih kha maw. Kristian picnic dân tur ngeiin zofate hi i picnic
ṭhin ang u.

- Lalbiakhlira