Uisa eite u.... le le le le!

Maneka strikes again! Hmar chhak bial miten ui sa an ei tawh lohna tur leh, dan lova ram chhung hmun dang aṭanga ui an lak luh ṭhin tihtawp dan tur ngaihtuah tur-in Women and Child Development Minis-ter, Maneka Gandhi-i'n DoNER Minister, Jitendra Singh a ngen leh ta rup mai.

Kan pi Maneka hi hmanah pawh, 'An ui talh chu a mawngkua aṭangin a ka-ah thir tlawnin an vit tlang a, hmun biru lai pawh ni lo, hmun ualau ber mai, lamlian sirah an rawh a, a rapthlakin nunrawnthlak chung-chuang lutuk' min ti vak tawh kha a ni a, Minister a nih loh lai pawha ui leh ran dang, na taka humhalhtu a ni reng a ni.

A sawi dan phei chuan, Food Safety and Standards Regu-lation, 2011-ah ui, zawhte leh ran ṭhen-khat hi ei atana talh thiang lo a nih avangin ui sa ei hi dan kalh a ni a, ui-a sumdawngten an phurh kualnaah zahngaihna nei map lovin bungraw dang ang maiin an phur a, hei hi tihtawp vat a ṭul niin DoNER Minister chu a hrilh.

Maneka Gandhi hian Nagaland-ah phei chuan state dang aṭangin a sa ei atan ui 30,000 chuang, dan lova lak luh a ni
ṭhin niin a sawi a, a ká hnawh chunga buara-a khung a nih bakah talh a nih hmain, ei tur pawh pek a ni lo a, a talhtute pawhin rawng takin an tihlum kher
ṭhin niin a sawi bawk a, DoNER Minister hnena lehkha a thawn-ah hian Humane Society International-in Nagaland-a ui sa an ei dan a zir chianna report pawh a thil tel bawk.

A thil sawi ṭhenkhat hi dik deuh deuh a awm a, Mizoramah pawh Maxicab hnung lama ar leh ui ilo phuar beha tlanpui vâwk vâwk hi a awm fo a, ar leite pawh a letlinga khaia thên kawng tluan mai kan awm fo. Hengte hi hmuh hrehawm tak chu a ni hrim hrim mai. Uisa ei khap leh khap loh chu thu hran ni se.

Uisa hi sa zahawm lo pawla ngaih a ni deuh a, pawi deuh chu, zu nena sawi zawm kan ching lutuk leh, engtin tin emaw kan sawi pàwr vak kher zel hi niin ka hria. A ei duh chuan sa dang ang hian ei ve mai tur ni àwm tak a ni a, chutianga ei leh chhungkuaa 'chawlhni sa'-a hmang pawh chu an awm nual. Kan fak tlawr vel peih lutuk leh, ruih nena inzawm ang hiala kan sep vel ṭhin avang hian, sakhaw mi urhsun deuh tan phei chuan tiltîp hial turah kan chhuah fo a ang viau.

Maneka-i hlauh vang hrim hrim pawh ni lovin, ran hi ei atana kan vulh emaw, kan lei emaw pawh ni se, tihduhdah emaw, an laka nunrawn emaw kher hi chu ṭul lo tak a ni a, kan ei duh a nih pawhin, kan ken kual vel dan leh kan talh dan thleng hian, tiduhdah leh nunrawng rawng hi kai lo hram se a ṭha hrim hrim mai.

Kan pi leh puten an se chhun tur an chaih hah hmasa hnêp an tih phei kha chu, a sa pawh a tui ka ring meuh lo. Kan vawk vulh dan leh talh dante pawh hi ei atan a nih chuan tihhmasawn leh tihthianghlim zel a
ṭha ang.

- RK Lianzuala