Kohhran tihah A mawi em?

Tunlai chu kohhran kheina leh nekna lam chhiar tur a awm zauh zauh a, hei hi ka ngaimawh rualin ka vei ve tlat thil hi kohhran kheina huang chhungah a lut mai thei a, ka sawi chhuah loh chuan ka ngaih-dan ang pu mi midangte hian an sawi chhuah ve theihna kawng ka hawnsak dawn si lo. In ngaihdan hriat ve ka chak avangin kohhran huanga advertisement leh sponsorship lakluh hi ka han sawi teh ang.

KṬP leh ṬKP Conference velah hian kohhran sumin a daih loh vang lam aiin, sorkar lam pawh hi kan intihhmuh. Tun hnaiah sorkar advertisemnt sum tam tak hi kohhran ṭhalai inkhawmpuiah a lut a, chutah chuan awareness campaign hrang hrang chhuanlama hmangin pawisa an hmang ta a, hei hi ka ngaimawh khawp mai.

Kan ṭhalai inkhawmpuite hi kohhran sumin a daih tawka ti mai tawh lovin sorkar aṭanga pawisa hmangin kan kalpui a, sorkar hotu lamin kohhran tihlungawi lah chu an lo chak ve bawk si a, kohhran hian sorkar aṭanga advertisement sum tam tak a pawt a, hei hi tunge maw sawi chhuak ang le? Kohhran huang chhung committee-ah ni se tumahin an hnial dawn si lova, kan kal phungah hei hi a bet tlat tawh a, sawi chhuaktu awm hi a
ṭhain ka hria.

Tichuan kohhran huang chhung aṭangin TV show ang chi eng eng emaw kan han ti ve at a, zai intihsiak leh quiz hi tunlaia an uar deuh chu a ni. Hengte hi kohhran sum
aṭanga tih theih ni se inelna
ṭha leh tunlai tak, inkaihhruaina ṭha a ni tih hi ka pawm dan a ni. Tunah erawh hi chuan sponsorship kan zawng ta a, hei hi engtia ngaih tur chi nge maw ni le? Sorkar leh mimal sumdawng sum hmanga kohhran programme ang deuh thil lo buatsaih ve hi, engtin nge kan ngaih le?

Zaipawl intihsiakte pawh tun hmain a awm ṭhin a, kohhran suma tih a ni a, tunah chuan sponsorship nen a kal kawp ta vek mai a, hei hi kan kal zelna turah a him em? Kohhran hruaitute hian hei hi kan phal zel dawn em ni? Hman deuh khan HIV/AIDS dona chi khatah Red Ribbon Choir competition tiin kohhran hrang hrang zaipawl kan inzai siak tawh a, khate kha ka lo ngaimawh ru tawh a ni.

Heng thil hi sapram koh-hran aṭanga teh dan ka thiam lova, sapram kohhran tlak chhiat chhan pawh ka hre ve lova, anni lam kal dan a nih leh nih loh pawh ka hre lo. Keia ngaihdan mawl takah chuan kohhran hi chuan kal dan nghet hi nei ila, midang suma thil tih ngai tur khawpa hautak programme chu paih ila, keimahni suma programme ṭha kan huaihawt thei a nih chuan ṭhalai beng za tlatte tana thil ngaihnawm leh hmuhnawm ṭha pek hi chu ka support zawng a ni. Chumi pek tum na lama sponsorship zawn erawh kohhran kalphungah chuan a inhmeh ka ti thei lo.

Heng ka sawite hi tute emaw tan rilru tihnatna lo ni lo se ka duh a, nguin taka ka ngaihtuah hian kan kohhran kal zel dan turah tun hma anga kan phak tawka kal mai kha a ṭha ka ti a, kan phak tawkin a tlin a nih chuan programme chu a lian thei ang ber leh a ropui thei ang ber duhtu ka ni. Kan tlin loh thil tih nana sumdawng pawisa leh sorkar pawisa hmanga kal hi chu kan tih loh tawp turah kei chuan ka ngai.

Kohhran thila sorkar leh mimal sumdawngte sponsor-ship leh advertisement seng luh hi sual a nih chu ka hre lova, kan kohhran kal dan tura ka duh loh thil erawh a ni. Ka ngaihdan hi a dik ber lo maithei a, in ngaihdan hriat ve ka chak avang leh ka vei avangin ka rawn au chhuah pui mai a ni.

- Lalnundanga