Ka puma naute a che (Kohhranah sponsorship pawisa)

Hman ni Vanglaini ka chhiar chu ka vei zawng, ka sawi thiam chiah loh an rawn sawi a. Kohhran activity kaihhnawiha sorkar sum hman thu kha ka lo chhiar a, ka puma naute a che dawt a, tawi te hian ka han chhunzawm duh ta a ni.

Tun hma kha chuan Biak in sa tur khan sum kan tuak a, kohhran mipui a hmei a pa, a pui a nawiin kan hnatlang ṭhin kha a ni ngai a. Thingtlangahte phei chuan a châk lak khawm theih ang zawng zawng hi chu kohhranin hnatlangin kan la khawm ṭhin.

Mau kan sat a, thing tuai kan pu a, khaw ṭhenkhat lung nei ṭha deuhte chuan rora hi a chhutin an chhu vek a, lungrem tur an chher bawk a, an thawh nasat dan kha ka mitthlaah a la lang. Hei hi tunah pawh thingtlangah chuan an la kalpui reng a, khawpui kohhran lian tam tak hian hetianga hnatlang hi kalsanin Biak in sakna atan loan an la ta hi ka vei chu a ni.

Biak in sakna atan loan kan han puk a, mahni thawhlawm tlingkhawmin a daih tawk Biak in pawh nei ngam lova, bank-a a pung awma loan puk hi Pathian mite tih turah ka dah lo. Bank hian a pung awmin an puktir a, bank sumdawnaah Kohhran hian a ṭanpui ve tihnaah ka ngai. Hei hi kan kalphung a ni chho mek tawh a, huaisen taka inkhawmpui rorelin “Kohhran Biak in sakna atan loan lak tawh loh ni rawh se,” tihte hi rel ngam se ka duh.

Keia ngaih danah chuan tun hnaia an intihhmuh tak,
ṭhalai lam programme-a TV-a an chhuahtir tura sorkar aṭanga sponsorship an hmu hi chu Kohhran chhunga seng luh loh tawp tur a ni. He thil tih phalsaktu kohhran hruaitu lam pawh an in ennawn a
ṭha ang.

Zep thu a cheng lo, kan kohhran lian bera ṭhalai lamte zai intihsiakna chu mimal sumdawng hrang hrangin an sponsor rup mai a, kohhran kalphung ka hriat nen chuan inpersan tak a ni. Kohhranah chuan miin thawhlawm an thawh ṭhin a, mi tam tak chuan hming puanzar an duh lova, Pathian nen an inkar thil a ni.

Tunah chuan kan kohhran activity tihhlawhtlinna turin mimal sumdawng kan dawr kual a, “Chumi khami programme chu tih ve kan tum a, sum lo thawh ve ula, keini lamin TV-ah kan lo tilar che u anga in remchang thei mial em?” tiin kan va dawr kual ta a ang a, hetia kal zel hi Mizoram kohhran kal dan tur a nih chuan inennawn a ngai ta.

Private TV programme anga kohhran TV prog-ramme-a sponsorship kan seng lut a nih chuan, Lal Isua hunlaia Temple-a sumdawnna an lo kalpuia a rawn phin darhte kha min hriat chhuahtir a, engpawhnise kan kalsual thui hma hian kohhran tih tur chin leh tih ve loh tur hi kan kohhran hrang hrang hruaitute hian lo ngaihtuah nawn ve rawh se.

Mahni thawhlawm tlingkhawmin a daih tawk Biak in pawh nei ngam lova, bank-a a pung awma loan puk hi Pathian mite tih turah ka dah lo. Bank hian a pung awmin an puktir a, bank sumdawnaah Kohhran hian a ṭanpui ve tihnaah ka ngai. Hei hi kan kalphung a ni chho mek tawh a, huaisen taka inkhawmpui rorelin “Kohhran Biak in sakna atan loan lak tawh loh ni rawh se,” tihte hi rel ngam se ka duh

- Rodenga Chhakchhuak