Ei rukna tihluartu khawtlang

Ei rukna hi kan haw hle tawh emaw ka tih laiin, tunhnaia ka thil leh hriat aṭangin ei rukna hi kan lo la haw tak tak lo tih a lang. Ei rukna tihluartu lian tak pawh kan khawtlang hi a ni a, kan nunphung leh kan rilru puthmangte pawh hian mawh a phur nasa hle.

Veng chhunga sorkar hnathawk lian deuh an awm chuan khawtlanga pawl neuh neuh hian an zar zo kan tum a. Eng emaw thil hlekah pawisa kan thawhtir a, a nih loh pawhin eng emaw tal tum turin kan beisei ṭhin.

Anni tan lah khaw-tlang chu an lo zahawm ṭhin a, pawisa an lo pe a, an hlawhin a tlin bak thleng thlengin anmah-ni aṭangin pawisa kan beisei a, anni tan lah an beisei ang lo tihhlawhtlin loh kha a hrehawm duh viau.

Kohhran hnuaia committee peng hrang hrangten sum kan tuakin veng chhunga sorkar hnathawk lian deuh chu lei ngei ngei turah kan ngai a, a chang chuan kan bel tawp tawp fo mai. Krismas leh thawhlawm dang thawh tur pawhin kan beisei sang deuh ṭhin. An sum lakluh aṭang chuan khawtlang leh kohhranin kan beisei ang zawng zawng hi pe ta se chuan an khawsakin nasa takin a tuar ang. Hetiang hi a nih avangin khawtlang hian ei ru lo thei lo dinhmunah kan dah ṭhin a ni.

Ei ruk hi chu han haw tak tak ngam tur kan ni lo. Ei rute sum hmuh kan duhpui ve chhung chuan ei ruk hi han haw ngam tur kan ni lo.

Sumdawngten eng ati nge hlep tam tak ûma thil an zawrh
ṭhin? A chhan pakhat chu khawtlangin anmahniah beiseina kan neih dan a dik loh vang a ni. Dawrkai lian deuh chu sorkar hnathawk lian kan beisei dan ang tho hian khawtlanga pawl neuh neuh hian anmahniah beiseina kan nei a. Veng chhunga club neuh neuh te, pawl hrang hrangten sponsor leh thawhlawm eng eng emaw kan beisei a. Chung mipui leh khawtlangin an beisei ang an tihhlawhtlin theih nan chuan man to tak taka thil an zawrh a ngai ṭhin.

Hetiang rilru kan put chhung hi chuan kan khawtlang leh ramah hian ei rukna hi kan tibo tak tak ngai lo ang.

Ei ru leh hlep uchuak uma thil zuarte pawisa kan beisei a, anmahni aṭanga eng emaw hlawkna kan beisei tlat reng chuan ei rukna hi a zung nen kan phoro thei ngai lo ang a, sorkar hian theihtawpin ei rukna tihbo tumin hma la mah se, mipuiin kan duh ang tih nana hman kan tum tlat chuan awmzia a nei lo ang.

- Lalkhawngaiha Palian