Kan ram neih chhun

Mi tin mai hian, kan ṭhalaite Nun suattu Ruihhlo hi kan hua a, kan do a, a sawt lem hlei lo va, mahse, tih ṭawngkam hi khawvel famkim loh zia tilang chiangtu ṭawngkam a ni si a. Mahse, Ruihhlo avangin Tlawmngai pawl a pen chhuak a, YMA-in theih tawpin a thim a var thlu lovin, harsatna karah leh, a milian, a mité thlenga sawiselna karah nghet takin a kalpui zel a. Tun hnaiah pawh rapthlak tham zet an man a, mahni sum sengin an HUN leh THA, mahni hna ṭul an kalsan a. Mahse, tih a ṭul leh ṭhin.

Ruihhlo an man a, a hlawkna teltute chu Mifing, Ruihhlo laka fihlim, Majistret leh Ukil-te an ni hlauh asin le. Sumin kan mit a tidel a, kan hnam ral mek ai hian a hlu zawk a ni ang e, mimal tin kan inen fiah a hun kan ti em? Sum ngah leh ropuina, inchhekarbawmna hian dam reina a keng tel lo va, chhungkaw hlimna leh chaw ei tuina a keng tel chuang si lo. Kan ram hian, chhantu a ngai a, mifel tam tak an awm a, khualrel chhiatna laka kan la him rengna chhan hi e, zing tin, ruahsur karah leh thlasik khawvawt tak kara kum lama chawhnu tawhten, khum lum nuam tak thawhsanin Biak ina kan ram leh hnam tâna ṭawngṭai hram hram ṭhintute vang a ni. Lalpa'n hriselna pe se la, Dam reina pe mawlh rawh se .

Aw le, ka thu ziakah hian helh thei tur a awm ngei ang, mahse, han chhut ve mah teh u, thu dik lo chu a ni si lo, tu mah mimal takin kan inti lo va, hei hi Media a ni a, Writer–zalenna a ni. Tu natna mah thlen lo hram rawh se.

Keini ang, nula ṭhentkhatte Beng pawh chen lo, patling kal phe ve hlawk hlawk si hi e, ka fel famkim bik loh zia lah ka hai bik lo. He khawvel thlaler, lungngaihna chhum dum hnuaia harsatna pal tlang ve fotu ka ni asin.

Ka pa khan a kokichhuanin khawlai min lênpui em ka hre lo va, hmeithai, nu der dep tak chawi len ve mai ka ni. Eng dinhmun ṭha mah chang pha ve ngai lo, ka nihnate avang hian ṭhenrual zingah pawh ka tawmim a, ka thaw ve phawr phâwr ngai hek lo. Mi zinga awm aiin ram lama mahnia khawsak mai hi nuam ka ti zawk reng a nih hi maw. Ka tun hma nun khan ka nunah thu a la sawi reng a, harsatnaa tah hriam, mangannain a ensan ngai loh leh a zui reng ka ni a, hringnun buaina hi ka tân a mikhual ngai hek lo. Chutiang karah chuan lêng mah i la, innghahna pakhat chiah ka nei, chu chu LALPA PATHIAN ngei hi a ni. He leiah hian ropui taka chhinchhiah tûr hming leh chanchin ka nei lo. Nimahsela, ni tin leh zan tin, phek tin ka ziahte hian ka hmaah chatuân kawngkhar chuan min nghak reng si a, chu hmun ka thlen ve hunah chuan ka hringnun thawnthu hi eng ang chiaha ngaihnawm nge a nih ve ang?

Awle, tute paw'n kan ram dinhmun chhiatzia kan hre vek a, mimal taka he ruihhlo hi kan do lo a nih zawngin, kan chânin maian chan pawh a tluk lo thuai ang, tih hi, kei, ka nu fapa chhaw vah mai pawh hian ka hai lo ve.

- Zothansanga, Chhiahtlang Kawn veng.

Ph : 9612333536