Hmasawnna, kan hmanhmawh

Mizote hi kan rilru a hmanhmawh ṭhin a, thil ṭha hi kan nghak hmen meuh lo ṭhin. Hmasawnna kawngah pawh hian kan rilru a hmanhmawh lutuk a, thil ṭha lo thleng tur hi kan nghak hman lo a, kan lo vir chung zel.

Hmasawnna hi kan hmuh theiha rawn lang tup tup a, naktuka rawn thleng nghal rup rup turah kan han ngai ngawt a. Sorkar hmalakna, ram hmasawnna tura a hnathawh hrang hrangte pawh naktuk maia puitling a, changkang nghal ut ut turah kan inngai a. Hetiang rilru kan put avang hian rotling tak tak tur aiin, tun huna chhawr nghal mai theih, rei tak emaw, nakin zela kan la chhawr tur hi kan ngaih pawimawh loh zawk phah a ni.

Kan rilru hman-hmawh lutukna hian thil ṭha nghah chhuah aiin thil ṭha vak lo, ṭha anga lang neih thuai thuai kan duh zawk a, chu chuan infrastructure lamah min hnufumtir a ni. Pu Ṭhena hmathlir kha a hunlai chuan ngaihven a hlawh lutuk lo. Thlipui a siam tam mai mai tih vel kha mi ṭhenkhatin an sawisel dan a ni. Khang a ruahmanna kha hlawhtling ta se chuan tunah te hian kan chhawr nasat turzia mai chu. Kan rilru hmanhmawh avang hian thil ṭha tur hi kan tichhe zawk a ni.

Sorkarin hma-sawnna turin hna a thawk a, tun huna kan hmuh nghal mai loh avang te, kan chhawr nghal mai loh avangtein hmasawnna hna ngaihthahah kan ngai a. Sorkar hian hna thawk miah lo anga kan ngaihna chhante hi a rah chhuah tuna seng nghal kan tum ṭhin vang a ni. Hmasawnna hi vawi leh khata neih thut thut tur chi a ni lo a, kum têl tak meuh meuh nghah a ngaih chang a awm ṭhin. Tuna changkan nghal kan tum chuan nakkinah kan changkang thei lo zawk ang.

Mizote rilru hman-hmawh lutuk avang hian ram chauh ni loin chhungkua leh mimal pawhin kan tuar a ni. Hausa leh nei hi kan inti hma lutuk a, kan chapo bawk si a, hei hi hma kan sawn chak lohna chhan a ni.

Mizote hi consu-merism-in min rûn nasa lutuk a, hei hian kan ram ei leh bar thlengin a nghawng a ni. Ram puma hma-sawnna kan duh rual hian, mahni chhung-kuaa hmasawn hma-sak phawt kan duh a. Kan bungrua leh kan in leh loten hma a sawn phawt loh chuan ram hma-sawn-na tak tak kan ngaih-tuah thei lo. Kan rilru puthmang hi kan thlak loh chuan hma-sawnna tak tak hi chu kan la hlat deuh ang.

- Lalramchhana Hauhnar