Thlai thar leina chungchang

Vanglaini chanchinbu 17th June 2025 chhuaka Chhiartute Thukhawchangah khan 'Congress hotupain thu dik lo a sawi' tih thupui hmangin Zothansanga inti khan Pu Lalnunmawia Chuaungo thusawi inkalh anga ngaiin dik hlel takin a ziak niin ka hria.

Session hmasa berah Chief Minister ngeiin cheng vaibelchhe 110 kan dah, ni li chhungin a ti a. December-ah Governor pawh kumin financial year aṭang hian kan lei nghal dawn a ni tiin thu an sawitir a ni. Chu chu December 14, 2023 a nih kha. Hemi financial year an tih hi kum 2023-24 kha a ni.

Mahse, kum a'n zo va, cheng vaibelchhe 110 an dah aṭang khan kut hnathawktute thlai thar lei nan sum hman an nei lo. Kuthnathawktute thlai thar lei tura hnathawk tura an rawih tutu emaw khan cheng nuai 10 dawn an hmang thung a, mahse, kut hnathawktute kutah cheng khat pawh a lut lo. Zothansanga hian a hre ṭhelh zawk a ni.

Sorkar thar ngang a nia tia hrethiamin sorkar kum tharah chuan an sawi angin an ti ang tiin kan beisei hle zui zawk a, ngaihdamna leh hriatthiamna sang tak nen kan thlir a. Kum 2024-25 pawh kan hmang zo va, enga lawi lei chu an nei leh chuang si lo. Kum 2025-26 sorkar kum kan chuangkai a, kuminah phei chuan thlai thar leina tur abikin a hmaa an tih anga dah an nei lo zawk a ni.

Pu Lalnunmawia Chuango thusawi hi a inkalh lo va, CM ngeiin kum 2023-24 financial year-a vbch 110 dah a tihah khan kuthnathawktute thlai thar lei a ni lo. An intiam ang ni lo nasaa hmunphiah, sawhthing lei hi kum 2025-26 kum hman mek hi a ni zawk; Zothansanga hian a hre ṭhelh hle a ni.

Pu Lalnunmawia Chuaungo hian ZPM sorkar intiamna anga an tihhlawhtlin si loh, intiam anga awm lo ZPM sorkar a ti hi a tidik tak zet zawk.

Mizorama sawhthing thar tura ngaih chu 14,83,253 quintal a ni tih Horticulture Minister-in Pu VL Zaithanzama, MLA zawhna a chhanna a ni a. Sorkarin June thla thleng kan lei ang an ti a, May 20-ah pawh quintal nuai khat an lei tling awrh chauh. Chutiang khawp chuan mipui tan harsatna an thlen nasa a, mi tam takin cho ngam lovin an la phum mai mai a ni. Kuthnathawktute'n a chi an lin zat pawh an la leisak lo a ni a tih pawh thu dik tak a ni.

Thu dik leh belhchian dawl a ni em tih pawh chian hmasa lo leh finfiah lo va; a pawng ataka sorkar faka chet lak vak hi ramhlui zia dik tak a ni. A Kristian lo va, a Mizo lo bawk. Zei taka thu dik hrûla mahni inhaivûr theih nana Mizo mipuite kaihhruai sual ṭhinna hi mipui hian an hne tawh zawk niin ka hmu.

ZPM hian thil ṭha tam tak an intiam a, an intiamnate tu mahin kan theihnghilh hauh lo. An intiamnate tihlawhtling vek se kan duh avanga sorkarna siamtir kan ni tih hi an hai palh ang e.

Sawhthing hi tun dinhmunah a hralh san lai berin kg ah Rs 18-in hralh a ni a, a hniam berah kg ah Rs 10-in an hralh mek a. ZPM intiamna nen chuan vana rah ang a ni mek a ni.

- Lalfakzuali