Kristianna leh Zoram khawvel

Vawiin kan thupui tur hi a phurawm ang reng viau mai, mi tin ngaihven leh ngaih pawimawh ṭhin a nih ve ka ring. Nia, sakhuana hian mihringte nunah hmun tam tak a luah a, vawiin thlengin kan buaina ber leh sawrkar lian leh chak tak tak te pawn an buaipui ber a ni. Ni tin deuhthawa kan hriat ṭhin chu silaia mi pawng kah vakna te, thihchilh bomb, indona a ni ve ṭhin. Heng hote hian an pathian tan an martar a, hna ropui leh ṭha tak an thawk an inti ve tlat ṭhin a ni.

Mizote hian sakhuana hi kan la urhsun ve em aw? Kan khawtlang nunte hi chu a zau ve helh hawlh ti ila a sual lemin ka ring lo. Tunah hian zu hmuna mi pawh ni se martar han ngam nghal ṭhak hi chu an tam ka ring deuh tlat mai. Zu in loh tur, ruihhlo tih loh tur, eiruk loh tur, tihte hi chu kan zawm tak tak ngam lo leh si lo mai thei. Mizote zingah hian vanram ka kai chiang dawn, nunna bu-ah ka hming a awm han ti fak fak thei hi eng zat nge awm ang aw? Nia, vanram kawng chu a bumboh a, a hrehawm a, ni tin kross put a ni.

Kristianna chu

Kristiante awm dan tur zawng zawng chu Bible-ah hian a inziak vek a, Pathian mizia pawh hriat theih a ni. Uire ṭhin chuan a tih tawh tur a ni lo, inzuar ṭhin chuan a sim tawh tur a ni, dawt sawi ṭhin chuan sawi tawh loh tur, eiruk tawh loh tur, thamna pek/lak tawh loh tur. Amah ang bawkin a ṭhenawmte a hmangaih tur a ni, a unauin a chunga thil a tih sual chuan vawi khat mai ni lo, vawi sawmsarih hmun sawmsarih a ngaidam tur a ni. Miin ka puan min laksak chuan a dang pawh pek tur, biang lehlama ben chuan lehlam pawh dawh tur. A hun lai chuan Pharisaite kha sakhaw mifel tawp, ṭha chungchuang an ni; Isua chuan heng mite felna hi in khûm tur a ni, min ti. Kan awm dan tur Bible-in a sawite hi zawm thlap thlap thei ta ila, vawiinah hian Pathian chu chawimawiin a awm ngei ang. Kawng hnih a awm a, pakhat zawk chu hremhmun, a dang leh chu vanram kalkawng; ringtu intite zawng kal kawng chu vanram, ring lotute chu hremhmun lamah.

Zoram khawvel

Vawiin thlenga kan ngaihsan chu nalh taka inchei, man to tak, lirtheite pawh a chhuak thar apiang, in leh lote tunlai leh changkang tak. Hman deuha Hnam Chhantu Pawl hruaitu pakhatin a sawi, "Tunah hian loan/installment ten car, motor-te lei ve ta rup rup ila, mite chuan, e, a hnaah hian a hlawhtling’ min ti ang a, min ngaisangin, min chung en daih tawh ang,” a ti. Nia, kea kal vàwk vàwk ṭhinte pawh hi kan hmu hniam a, mi rethei kan ti. Miin car/scooty-a a tlan bap bap chuan mi hausa, awm thei kan ti a, kan hmu sang viau ṭhin. Hausa leh awmthei lemchangte hi kan ngaisang viau tlat mai. Mahni nihna dik tak nena lang ngamte hi chu kan ngaisang vak lo ṭhin khawp mai.

Pa kan ngaisang a, pa kan tum dan erawh a ṭha vak lo a ni ang, Mizo mipate kan thi zawih zawih reng mai. Kan hmeichhiate'n ei an zawng a, lehkhate pawh a thiam hlei hlei an lo ni ta. Chhungkaw hotu ber nihna hi mipate’n kan tlin ta mang lo, loh theih lohin hmeichhiate kutah a tlu lut mek a ni. Hmeichhiate'n ro an rel tak tak hunah chuan kan khawvel chu a dang lam ve ngei ang le. Hei hi chu a tira siamtu’n min duan dan kha a ni chiah tawh lo.

Hun lo la awm tur

Kan hma lam hun tur hi chu tu ma'n kan sawi lawk thei lo, ruahmanna erawh kan siam thei. Kan han sawi tum ber hi tun aṭanga kum 20/30 hnuah Mizote hi engtin nge kan awm ang? Kan ropui dawn nge kan tlachhhe dawn tih a ni deuh ber mai. Google kan râwn ṭhin angin Bible bawk hi i'n rawn leh teh ang. Zawlneite thil hrilhlawk kan hmu nual ang a, vanram thu, sim rawh u, tihte pawh kan hmu ang. Tehkhin thu ṭha tak mai, tuh rah seng a awm bawk a. Miin a lo-ah buh a tuh chuan buh vek chu a seng leh ang, thil dang a seng dawn lo. Dragon fruit kan chin chuan balhla chu kan seng daih dawn lo, dragon fruit ngei chu kan seng leh ang.

Aw le, vawiinah kohhranin eng nge a tih ṭhin le? Mizoram sawrkarin eng nge a tih ṭhin le? Chutiang zelin khawtlang, chhungkua leh mimal tinte'n. Min endiktu hian kan chhungril leh ngaihtuahna, suangtuahnate pawh pakhat mah hmuh hmaih a nei si lo. Vawiina kan thil tih a ṭha lo a nih chuan chu vek chu kan la seng dawn. Kan insiamṭhat si loh chuan hmabak a ṭha lo vang. Kan vawiin hian nakina mi tur thui tak a hril dawn a ni.

A tlang han kawm dawn ta ila. Presbyterian inkhawmpui lianah khan inkhawm tihtlem tih kha kan bengverh zawng a nih ve hlawm ka ring. A chhan ni ber chu, khuate a lo pui ta viau a, hnam dangte nen kan lo insumdawn tawn nasa ve ta a. Chhun leh zan te pawh angkhat renga hman a lo ngai ve ta thuak thuak mai. Ni hian min daih ta lo. Chuvang chuan inkhawmte pawh hi tunlai mila tihdanglam a ṭha tawh lawm ni, tihna a ni.

Inkhawm tihtlem hi zirchianna (Synod) aṭanga hmuh dan chuan, rin aiin vote-tu a hmu tam lo tlat mai. Kal dan ngai ṭha tawk rih tih hi an thu tihtluk chu a ni. Kristian ram England, USA te an ropui rem rem viau mai, Pathianin hmun sang takah a dah ta a ni ber mai e. Mizo Kristiante pawn kan chang ve thei reng a ni. A ram leh a felna kan zawng hmasa ang a, tichuan, kan mamawh chu kan nei ngei dawn a ni. Pathian duh zawng ti ṭhintute hi chu hmun sang takah an awm nge nge ṭhin. Hetih lai hian, Solomon-a meuh pawh kha a kal sual phah leh si. Chuvang chuan, chan tawka lungawi hi zir ila, hma lam pan zel turin tum i tiruh ang u.

- Lalchhandama Colney,

Ph – 9862982321